കോഴിക്കോട്: സിഎംആർഎൽ കേസിൽ സർക്കാരിന് മെല്ലെപ്പോക്ക് നയമെന്ന് ബിജെപി ദേശീയ സെക്രട്ടറി കെ.സുരേന്ദ്രൻ. അഴിമതി നിരോധന നിയമ പ്രകാരം അന്വേഷിക്കേണ്ട വിവരങ്ങളാണ് ഇഡി നൽകിയത്. കേസെടുക്കുന്നത് നീട്ടിക്കൊണ്ടുപോകാനാണ് സർക്കാർ ശ്രമിക്കുന്നത്. അതിനു പിന്നിൽ ഗൂഢോദ്ദേശമാണെന്നും സുരേന്ദ്രൻ ആരോപിച്ചു.
അധികാര ദുർവിനിയോഗത്തിലൂടെ സംസ്ഥാനത്തിന് നഷ്ടം വരുത്തി കൈക്കൂലി വാങ്ങിയ പണമാണ് മൂന്ന് കോടി. അത് വീണ വിജയന്റെ കമ്പനി സിഎംഎർഎല്ലിന് നൽകിയ സേവനത്തിന്റെ പണമല്ല. ധാതു മണൽ കടത്താനുള്ള കൈക്കൂലി വാങ്ങലാണ് നടത്തിയത് എന്നും സുരേന്ദ്രൻ പറഞ്ഞു. പണം വിദേശത്തേക്ക് കടത്തിയെന്നും കണ്ടെത്തിയിട്ടുണ്ട്. ഇഡിയുടെ ശുപാർശ നിയമപരമായ അവലോകനത്തിനു വിധേയമാക്കുമെന്നാണ് സർക്കാർ പറഞ്ഞത്. എന്നാൽ, ആഭ്യന്തരമന്ത്രി സ്ഥലം വിട്ടിരിക്കുകയാണ്. അന്നത്തെ പ്രതിപക്ഷ നേതാവ് ബിജെപി-സിപിഎം അന്തർധാരയാണെന്നല്ലേ പറഞ്ഞിരുന്നത്. സംസ്ഥാന സർക്കാറിന് സർക്കാരിന് ഇച്ഛാശക്തിയില്ലെന്നും ആരെയോ ഭയപ്പെടുന്നുണ്ടെന്നും സുരേന്ദ്രൻ പറഞ്ഞു.
ലോക്സഭാ തെരഞ്ഞെടുപ്പ് പ്രചാരണ വേളയിൽ പിണറായി വിജയനെ അറസ്റ്റ് ചെയ്യാത്തത് എന്താണെന്നാണ് ചോദിച്ചത്. വിജിലൻസ് കേസെടുത്താൽ യുഡിഎഫ് നേതാക്കളിലേക്ക് എത്തുമോ എന്നുള്ള ഭയാശങ്കയാണ് സർക്കാരിനുള്ളത്. ഗുരുതരമായ പ്രശ്നമുണ്ടെന്ന് വിഡി സതീശൻ തന്നെ പറഞ്ഞു. എന്നിട്ടെന്താണ് കേസെടുക്കാത്തത്. സതീശൻ ഇക്കാര്യം ജനങ്ങളോട് വിശദീകരിക്കുമോയെന്നും സുരേന്ദ്രൻ ചോദിച്ചു. കേസിൽ എൽഡിഎഫിനും യുഡിഎഫിനും പങ്കാളിത്തമുണ്ട്. വൈകാതെ പിണറായി വിജയനെ പിന്തുണച്ച് കുഞ്ഞാലിക്കുട്ടിയും ലീഗുമെത്തും. മുമ്പും ഐസ്ക്രീം പാർലർ കേസുൾപ്പെടെ നിരവധി കേസുകൾ ഒത്തുതീർപ്പാക്കിയിട്ടുണ്ട്. രണ്ട് മുന്നണികളും ഒന്നാണെന്ന് തെളിയിക്കുന്നതാണ് ഈ കേസ്.
ഇക്കാര്യത്തിൽ സതീശന്റെ പൂക്കി മറുപടി മതിയാവില്ല. മുഖ്യമന്ത്രി ജനങ്ങളോട് നിലപാട് വ്യക്തമാക്കണം. സിഎംആർഎല്ലിന്റെ പുസ്തകത്തിൽ തന്റെ പേരോ മറ്റേതെങ്കിലും ബിജെപി നേതാക്കളുടെ പേരോ ഉണ്ടെങ്കിൽ കേസെടുക്കട്ടെ. കർത്തയുടെ കൈയിൽ നിന്ന് ബിജെപി നേതാക്കളാരു ഒരു രൂപ പോലും കൈപ്പറ്റിയിട്ടില്ല. പിണറായിയെ ജയിലിൽ അടയ്ക്കണമെന്ന് പറഞ്ഞവരിപ്പോൾ മിണ്ടാത്തതെന്താണെന്നും കെ സുരേന്ദ്രൻ ചോദിച്ചു.
Comments