കൊച്ചി: പവര്‍ കട്ടില്‍ ജനം വലയുമ്പോള്‍ വൈദ്യുതിമന്ത്രിക്കും അപ്രതീക്ഷിത ഷോക്ക്! പ്രസംഗത്തിനിടെ വൈദ്യുതി മുടങ്ങിയതോടെ അല്‍പ്പനേരം കാത്തുനിന്നശേഷം മന്ത്രി സണ്ണി ജോസഫ് വേദിവിട്ടു. കച്ചേരിപ്പടി ആശിര്‍ഭവനില്‍ കെ.എസ്.ഇ.ബി. ഓഫീസേഴ്‌സ് ഫെഡറേഷന്‍ സംസ്ഥാനസമ്മേളനം ഉദ്ഘാടനം ചെയ്ത് മന്ത്രി പ്രസംഗിക്കുന്നതിനിടെയാണ് സംഭവം.
സംസ്ഥാനത്തെ വൈദ്യുതി പ്രതിസന്ധിയെക്കുറിച്ചും നിയന്ത്രണത്തെക്കുറിച്ചും വിശദീകരിക്കുകയായിരുന്നു മന്ത്രി. അദ്ഭുതങ്ങള്‍ പ്രവര്‍ത്തിച്ചോ സ്വിച്ചിട്ടപോലെയോ നിര്‍ത്താന്‍ കഴിയുന്ന ഒന്നല്ല വൈദ്യുതി പ്രതിസന്ധിയെന്ന് മന്ത്രി പറഞ്ഞു. വൈദ്യുതിവകുപ്പ് ഏറ്റെടുക്കുന്നതു മുള്‍ക്കിരീടമാണെന്ന് എ.കെ.ആന്റണി മുന്നറിയിപ്പ് നല്‍കിയിരുന്നെന്നും എന്നാല്‍, അത് പുഷ്പകിരീടമാക്കാനുള്ള ശ്രമത്തിലാണ് താനെന്നും പറഞ്ഞ് പൂര്‍ത്തിയാക്കിയതിനു പിന്നാലെയാണ് വൈദ്യുതി നിലച്ചത്.
വേദി ഇരുട്ടിലായതോടെ അല്‍പ്പസമയം അവിടെ തുടര്‍ന്ന മന്ത്രി പിന്നീട് ഉദ്ഘാടനച്ചടങ്ങ് പൂര്‍ത്തിയായതായി പ്രഖ്യാപിച്ച് മടങ്ങി. താന്‍ എപ്പോള്‍ പ്രസംഗം നിര്‍ത്തണമെന്നു കെ.എസ്.ഇ.ബിക്ക് അറിയാമെന്നും അതാണ് അവര്‍ വൈദ്യുതി നിര്‍ത്തിയതെന്നും മന്ത്രി പിന്നീട് തമാശരൂപേണ പ്രതികരിച്ചു. പകല്‍ സമയത്തുണ്ടായ ആ തടസം ഔദ്യോഗിക വൈദ്യുതി നിയന്ത്രണത്തിന്റെ ഭാഗമല്ലെന്നും അദ്ദേഹം പറഞ്ഞു.
Comments