തിരുവനന്തപുരം: കേരള രാഷ്ട്രീയത്തിൽ വലിയ കോളിളക്കം സൃഷ്ടിച്ച സ്വർണക്കടത്ത് കേസിലെ പ്രധാന പ്രതികളായ സ്വപ്ന സുരേഷും പി.എസ്. സരിത്തും വിവാഹിതരായി. മുൻകാലത്തെ നിയമപോരാട്ടങ്ങളുടെയും വിവാദങ്ങളുടെയും നിഴലിൽ നിന്ന് മാറി, കൊച്ചി നെട്ടൂർ വടക്കേ പാട്ടുപുരയ്ക്കൽ ക്ഷേത്രത്തിൽ വെച്ചായിരുന്നു ഇരുവരുടെയും വിവാഹച്ചടങ്ങുകൾ നടന്നത്. തികച്ചും ലളിതമായി നടന്ന ചടങ്ങിൽ അടുത്ത ബന്ധുക്കളും സുഹൃത്തുക്കൾ മാത്രമാണ് പങ്കെടുത്തത്. സാമൂഹിക മാധ്യമങ്ങളിലൂടെയാണ് സ്വപ്ന തങ്ങളുടെ വിവാഹവാർത്ത പുറത്തുവിട്ടത്.
ജീവിതത്തിലെ ഈ പുതിയ വഴിത്തിരിവിനെക്കുറിച്ച് കുറിപ്പും പങ്കുവെച്ചിട്ടുണ്ട്. "ഒരുമിച്ച് ജീവിക്കാന്‍ മാത്രമല്ല ഞങ്ങള്‍ വിവാഹ ജീവിതം തെരഞ്ഞെടുത്തത്; ഞങ്ങളുടെ കുട്ടികള്‍ക്ക് സത്യവും ബഹുമാനവും മൂല്യങ്ങളും പഠിക്കാനാകുന്ന ഒരു അന്തരീക്ഷം സൃഷ്ടിക്കാനും, ഒരുമിച്ച് ഒരു ജീവിതം പടുത്തുയര്‍ത്താനും കൂടിയാണ്. മരണം വരെ ഞാന്‍ സുമംഗലി ആയിരിക്കാന്‍ എല്ലാവരുടെയും പ്രാര്‍ഥന വേണം." - സ്വപ്ന കുറിച്ചു.
സ്വർണക്കടത്ത് കേസ് പുറത്തുവന്നതോടെ കേരള സമൂഹത്തിൽ സജീവ ചർച്ചയായവരാണ് സ്വപ്ന സുരേഷും സരിത്തും. ഒരു കാലത്ത് അന്വേഷണ ഏജൻസികളുടെ ചോദ്യം ചെയ്യലുകളിലൂടെയും വിവാദ വെളിപ്പെടുത്തലുകളിലൂടെയും ഒപ്പത്തിനൊപ്പം നിന്ന ഇരുവരും ഇപ്പോൾ ജീവിതത്തിലും ഒന്നിക്കുകയാണ്. തിരുവനന്തപുരം തൈക്കാട് സ്വദേശിനിയായ സ്വപ്നയും തിരുവല്ലം സ്വദേശിയായ സരിത്തും നിലവിൽ കൊച്ചിയിലാണ് താമസം.
സ്വപ്ന സുരേഷിന്റെ മൂന്നാം വിവാഹമാണിത്. 2000-ത്തിൽ കൃഷ്ണകുമാറുമായുള്ളതായിരുന്നു ആദ്യ വിവാഹം. 2008-ൽ ഈ ബന്ധം വേർപെടുത്തി. തുടർന്ന് 2011-ൽ ജയശങ്കറിനെ വിവാഹം കഴിച്ചെങ്കിലും ആ ബന്ധവും പിന്നീട് നിയമപരമായി അവസാനിക്കുകയായിരുന്നു. വിവാഹശേഷം ഔദ്യോഗികമായി മറ്റ് വിശദാംശങ്ങളൊന്നും ഇവർ പങ്കുവെച്ചിട്ടില്ല.
Comments