തിരുവനന്തപുരം: പലതരത്തില്‍ തനിക്ക് നേരെ മുമ്പും കടന്നാക്രമണം ഉണ്ടായിട്ടുണ്ടെന്നും എന്നാല്‍ തന്നെയോ പാര്‍ട്ടിയേയോ തകര്‍ക്കാന്‍ കഴിഞ്ഞിട്ടില്ലെന്നും പ്രതിപക്ഷ നേതാവ് പിണറായി വിജയന്‍. മുമ്പ് സ്വര്‍ണ്ണക്കടത്ത് കേസ് ഉള്‍പ്പെടെ ഉയര്‍ത്തിക്കൊണ്ടു വന്ന ആരോപണങ്ങളെ ജനങ്ങള്‍ ചവറ്റുകുട്ടയില്‍ തള്ളുകയായിരുന്നെന്നും വ്യക്തി എന്ന നിലയില്‍ തനിക്കെതിരേ ഉയര്‍ത്തുന്ന ആക്രമണങ്ങള്‍ പാര്‍ട്ടിയെ തകര്‍ക്കാനാണെന്നും എന്നാല്‍ അവരോട് സഹതാപമേയുള്ളെന്നും പറഞ്ഞു.
2016 ല്‍ എല്‍ഡിഎഫ് അധികാരത്തില്‍ വന്നപ്പോള്‍ ആ സര്‍ക്കാരിന് നേരെ ശക്തമായ ആക്രമണമുണ്ടായി. മുഖ്യമന്ത്രിയായിരുന്ന വ്യക്തി എന്ന നിലയില്‍ തനിക്കെതിരേയും ഉണ്ടായി. എല്ലാവരും ഒന്നിച്ചു നില്‍ക്കേണ്ട കോവിഡ് മഹാമാരി കാലത്തും ആക്രമണമുണ്ടായി. മഹാമാരി പടരാതിരിക്കാനുള്ള മുന്‍കരുതലുകള്‍ എടുക്കേണ്ട സന്ദര്‍ഭത്തില്‍ ആ ശ്രമങ്ങളെ അട്ടിമറിക്കുന്ന രീതിയിലുള്ള ഇടപെടലുകള്‍ ഉണ്ടായി. പിന്നീട് ബിരിയാണി ചെമ്പില്‍ സ്വര്‍ണ്ണം കടത്തി എന്നതടക്കം ഹീനമായ ആക്രമണം ഉണ്ടായി. അക്കാലത്ത് ഉയര്‍ത്തിയ ഒരു ആരോപണവും നിയമത്തിന്റെ മുന്നില്‍ വിലപ്പോയില്ല. ജനങ്ങള്‍ അതെല്ലാം ചവറ്റുകുട്ടയില്‍ ഇട്ടു.
2021 ല്‍ കേരളത്തില്‍ ആദ്യമായി എല്‍ഡിഎഫിന് തുടര്‍ഭരണം ജനങ്ങള്‍ നല്‍കി. ആക്രമണത്തിന്റെ മലവെള്ളപ്പാച്ചില്‍ തന്നെയാണ് പിന്നീടുണ്ടായത്. തന്നെയും സിപിഐഎമ്മിനെയും തകര്‍ത്തേ അടങ്ങു എന്ന വാശിയോടെ ഇടതുപക്ഷ വിരുദ്ധരുടെ സംഘടിതമായ ആക്രമണം ഉണ്ടായി. എല്‍ഡിഎഫിന് തുടര്‍ഭരണം ലഭിച്ചതോടെ എല്ലാ വലതുപക്ഷ ശക്തികളും ചേര്‍ന്നുള്ള സംഘടിത ആക്രമണമാണ് നടത്തിയത്. കേന്ദ്രം ഭരിക്കുന്ന ബിജെപിയും യുഡിഎഫും ആക്രമണത്തില്‍ കടുത്ത മത്സരം തന്നെ നടത്തി. ഇനിയും ഈ പ്രസ്ഥാനത്തെ തകര്‍ത്തുകളയാമെന്ന് മോഹം ആര്‍ക്കെങ്കിലുമുണ്ടെങ്കില്‍ അവരോട് സഹതാപം മാത്രമേയുള്ളെന്നും പറഞ്ഞു.
Comments