നഗരസഭ അധ്യക്ഷയെ ‘പൂതന’യെന്ന് വിളിച്ചു; രാജു അപ്‌സരയ്ക്കെതിരെ പോലീസ് കേസുമായി മുന്നോട്ടുപോകും: ആലപ്പുഴ നഗരസഭാ അധ്യക്ഷ

ആലപ്പുഴ: സമരത്തിനിടെ നഗരസഭ അധ്യക്ഷ മോളി ജേക്കബിനെതിരായ ‘പൂതന’ പരാമർശത്തിൽ വ്യാപാരി വ്യവസായി ഏകോപന സമിതി സംസ്‌ഥാന പ്രസിഡന്റ് രാജു അപ്‌സരയ്ക്കെതിരെ കേസ് റജിസ്റ്റർ ചെയ്‌ത്‌ സൗത്ത് പോലീസ്.കെ.സി വേണുഗോപാല്‍ എംപി അടക്കമുള്ളവരുമായി ആലോചിച്ച ശേഷമാണ് പരാതി നൽകിയതെന്നും മോളി ജേക്കബ് പറഞ്ഞു.

നഗരത്തിലെ വഴിയോരക്കച്ചവടക്കാരെ മുല്ലയ്ക്കൽ തെരുവിലേക്കു പുനരധിവസിപ്പിക്കാനുള്ള നഗരസഭയുടെ നീക്കത്തിനെതിരെ കഴിഞ്ഞ ബുധനാഴ്‌ച വ്യാപാരി വ്യവസായി ഏകോപന സമിതി നഗരസഭയിലേക്കു മാർച്ച് നടത്തിയിരുന്നു. മാർച്ച് ഉദ്ഘാടനം ചെയ്തു സംസാരിക്കുന്നതിനിടെയാണ് രാജു അപ്സര നഗരസഭ അധ്യക്ഷയെ പൂതന എന്നു വിളിച്ച് അധിക്ഷേപിച്ചത്.

തനിക്കെതിരെയുള്ള പൂതന പരാമർശം മാനഹാനി ഉണ്ടാക്കിയെന്നും ഇതിന്റെ വിഡിയോ സാമൂഹിക മാധ്യമങ്ങളിൽ പ്രചരിച്ചതു മനോവിഷമം ഉണ്ടാക്കിയെന്നും കാട്ടിയാണു പരാതി നൽകിയത്.