ഉച്ചകോടി വിജയിപ്പിച്ചതിന് എല്ലാവർക്കും നന്ദി; ന്യൂഡൽഹി പ്രഖ്യാപനം ദിശാബോധം നൽകും: പ്രധാനമന്ത്രി

ന്യൂഡൽഹി: ബ്രിക്സ് ഉച്ചകോടിയിൽ സംസാരിക്കവേ, ഇന്ത്യയുടെ അധ്യക്ഷതയിലുള്ള സമ്മേളനം വിജയകരമാക്കാൻ പ്രവർത്തിച്ച എല്ലാവരോടും പ്രധാനമന്ത്രി നരേന്ദ്ര മോദി നന്ദി രേഖപ്പെടുത്തി. ഇന്ത്യയുടെ ബ്രിക്സ് അധ്യക്ഷത വിജയിപ്പിക്കുന്നതിന് സജീവമായ സംഭാവനയും പിന്തുണയും നൽകിയ എല്ലാവർക്കും ഹൃദയംഗമമായ നന്ദി രേഖപ്പെടുത്തുന്നതായി മോദി തന്റെ ഉപസംഹാര പ്രസംഗത്തിൽ പറഞ്ഞു.

"മനുഷ്യജീവിതത്തിൽ, ഇരുപതാം വയസ്സ് പക്വതയുടെയും ഉത്തരവാദിത്തത്തിന്റെയും ഒരു പുതിയ ഘട്ടത്തിന്റെ തുടക്കം കുറിക്കുന്നു," ഒരു വ്യക്തിയുടെ വളർച്ചയും ബ്രിക്സിന്റെ യാത്രയും തമ്മിൽ സാമ്യപ്പെടുത്തി മോദി പറഞ്ഞു.സാമ്പത്തിക സഹകരണവും വ്യാപാരവും മുതൽ ആഗോള ഭരണം, വികസനം, വളർന്നുവരുന്ന സമ്പദ്‌വ്യവസ്ഥകളുടെ മുൻഗണനകൾ വരെയുള്ള വിഷയങ്ങൾ ചർച്ച ചെയ്യാൻ ബ്രിക്സ് രാജ്യങ്ങളിലെ നേതാക്കളും പ്രതിനിധികളും ന്യൂഡൽഹിയിൽ ഒത്തുകൂടിയപ്പോഴാണ് അദ്ദേഹത്തിന്റെ പരാമർശങ്ങൾ വന്നത്.

ഉച്ചകോടിയിൽ അംഗീകരിച്ച ന്യൂഡൽഹി പ്രഖ്യാപനം നമ്മുടെ കാഴ്ചപ്പാടിനും ഭാവി സഹകരണത്തിനും വ്യക്തമായ ദിശാബോധം നൽകുമെന്ന് പ്രത്യാശിക്കുന്നു. ബ്രിക്‌സ് അതിന്റെ മൂന്നാം പതിറ്റാണ്ടിലേക്ക് കടക്കുകയാണ്. കേവലം ആശയങ്ങളും വാഗ്ദാനങ്ങളുമല്ല, മറിച്ച് മൂർത്തമായ ഫലങ്ങളാണ് ലോകം ഇപ്പോൾ നമ്മളിൽ നിന്ന് പ്രതീക്ഷിക്കുന്നത്. നമ്മുടെ കൂട്ടായ പരിശ്രമങ്ങളിലൂടെ ഈ പ്രതീക്ഷകൾക്കൊത്ത് ഉയരാൻ നമുക്ക് തീർച്ചയായും കഴിയുമെന്ന് ഉറപ്പുണ്ടെന്നും പ്രധാനമന്ത്രി പറഞ്ഞു.

കൂട്ടായ്മയുടെ ചരിത്രത്തിലെ അതിപ്രധാനമായ ഒരു ഘട്ടത്തിൽ ഉച്ചകോടിക്ക് ഇന്ത്യ ആതിഥേയത്വം വഹിക്കുന്നതിന്റെ പ്രാധാന്യം പ്രധാനമന്ത്രി എടുത്തുപറഞ്ഞു. ഈ വർഷത്തെ ബ്രിക്സ് ഉച്ചകോടി കൂട്ടായ്മയുടെ ഇരുപതാം വാർഷികം ആഘോഷിക്കുന്നതിനാൽ ഒരു ചരിത്രപരമായ നാഴികക്കല്ലാണെന്ന് അദ്ദേഹം പറഞ്ഞു. കഴിഞ്ഞ രണ്ട് പതിറ്റാണ്ടുകളായി ബ്രിക്സിന്റെ വളർച്ചയെക്കുറിച്ച് പരാമർശിച്ച മോദി, വാർഷികം കേവലം ഒരു സ്മരണാചരണത്തേക്കാൾ ഉപരിയാണെന്ന് പറഞ്ഞു. 20 വർഷം പൂർത്തിയാക്കുന്നത് കൂട്ടായ്മയെ സംബന്ധിച്ചിടത്തോളം ഒരു പുതിയ ഘട്ടത്തിന്റെ തുടക്കമാണെന്നും അദ്ദേഹം വിശേഷിപ്പിച്ചു.

ന്യൂഡൽഹിയിൽ നടന്ന 2026-ലെ ബ്രിക്സ് ഉച്ചകോടി പ്രധാനമന്ത്രി നരേന്ദ്ര മോദി ശനിയാഴ്ചയാണ് ഔദ്യോഗികമായി ഉദ്ഘാടനം ചെയ്തത്. അംഗരാജ്യങ്ങൾ തമ്മിലുള്ള സഹകരണം ശക്തിപ്പെടുത്തുന്നതിനും വികസ്വര രാജ്യങ്ങളുടെ താൽപ്പര്യങ്ങൾക്ക് കൂടുതൽ പരിഗണന നൽകുന്നതിനുമാണ് ഇന്ത്യയുടെ ബ്രിക്സ് അധ്യക്ഷതയുടെ മുൻഗണനകൾ രൂപകൽപ്പന ചെയ്തിട്ടുള്ളത്. അതിനാൽ തന്നെ ഇന്ത്യ ആതിഥ്യമരുളിയ 2026 ഉച്ചകോടിയുടെ പ്രാധാന്യം വളരെ വലുതാണ്.

അടുത്ത ഉച്ചകോടിക്ക് ചൈനയാണ് ആതിഥേയത്വം വഹിക്കുന്നത്. അടുത്ത ആതിഥേയ രാജ്യമെന്ന നിലയിൽ ചൈനയ്ക്ക് ആശംസകൾ നൽകാനും പ്രധാനമന്ത്രി മറന്നില്ല.