ചെന്നൈ: തമിഴ്നാട് മുഖ്യമന്ത്രിയും നടനും രാഷ്ട്രീയക്കാരനുമായ വിജയ്യും, നടനും റേസറുമായ അജിത് കുമാറും ബ്രിട്ടനില്‍ നടത്തിയ കൂടിക്കാഴ്ച വലിയ ചര്‍ച്ചയാകുന്നു. കണ്ടുമുട്ടലില്‍ ഇരുവരും പരസ്പരം കെട്ടിപ്പിടിച്ചും കൈ കൊടുത്തും സ്‌നേഹം പങ്കിട്ടതോടെ കഴിഞ്ഞ മൂന്ന് പതിറ്റാണ്ടുകളായി നിലനില്‍ക്കുന്ന ഇവരുടെ സാങ്കല്‍പ്പിക വൈര്യത്തെക്കുറിച്ച് വലിയ ചര്‍ച്ചകളും സജീവമായി.
സില്‍വര്‍‌സ്റ്റോണ്‍ റേസിംഗ് മത്സരത്തില്‍ പങ്കെടുക്കുന്ന അജിത് കുമാറിനെ വിജയ് ഫ്‌ലാഗ് ഓഫ് ചെയ്തതിനിടയിലാണ് ഈ കൂടക്കാഴ്ച നടന്നത്. തമിഴ്നാട്ടില്‍ ലോകനിലവാരത്തിലുള്ള മോട്ടോര്‍ റേസിംഗ് സിറ്റി സ്ഥാപിക്കുമെന്ന സര്‍ക്കാര്‍ പ്രഖ്യാപനവുമായി ഇത് യാദൃശ്ചികമായി ഒത്തുവരികയും ചെയ്തു. അജിത് ഈ പദ്ധതിയെ സ്വാഗതം ചെയ്യുകയും ചെയ്തിരുന്നു.
ഈ രണ്ട് മുന്‍നിര താരങ്ങളുടെയും ഫാന്‍സ് ക്ലബ്ബുകള്‍ തമ്മില്‍ പലപ്പോഴും പോരടിക്കാറുണ്ട്. വര്‍ഷങ്ങളായി ഇവരുടെ ആരാധകക്കൂട്ടങ്ങള്‍ തമ്മിലുള്ള ഏറ്റുമുട്ടലുകള്‍ തെരുവുകളിലും സമൂഹമാധ്യമങ്ങളിലും ഒരുപോലെ അരങ്ങേറിയിട്ടുണ്ട്. അടുത്ത തലമുറയിലെ രജനീകാന്തും കമല്‍ഹാസനുമായാണ് ഇരുവരും പരിഗണിക്കപ്പെട്ടിരുന്നത്. രജനീകാന്തുമായാണ് വിജയിന്റെ മാസ് അപ്പീല്‍ പലപ്പോഴും താരതമ്യം ചെയ്യപ്പെട്ടിരുന്നത്. എന്നാല്‍ കമല്‍ഹാസന്റെ വൈവിധ്യവും സാങ്കേതിക അറിവുകളുമാണ് പലരും അജിത്തില്‍ കണ്ടത്. ഈ വൈര്യം വെള്ളിത്തിരയില്‍ മാത്രം ഒതുങ്ങിയിരുന്നില്ല.
എങ്കിലും, യുകെയില്‍ വെച്ചുള്ള ഈ കൂടക്കാഴ്ച രജനീകാന്തും കമല്‍ഹാസനും തമ്മിലുള്ള ആഴത്തിലുള്ള സൗഹൃദത്തെ ഓര്‍മ്മിപ്പിക്കുന്നതാണെന്നും, താരങ്ങള്‍ തമ്മിലുള്ള പരസ്യമായ സൗഹൃദത്തിനും പരസ്പര ബഹുമാനത്തിനും ഇത് വഴിയൊരുക്കുമെന്നുമാണ് പലരും വിലയിരുത്തുന്നത്. ഇതിനെ രാഷ്ട്രീയവും പരസ്യമായ പി.ആര്‍.വര്‍ക്കായുമാണ് വിലയിരുത്തപ്പെടുന്നത്. തന്റെ ആരാധകരുടെ പിന്തുണയ്ക്ക് പുറമെ, അജിത്തിന്റെ ആരാധകരുടെയും പിന്തുണ ഉറപ്പാക്കാന്‍ വിജയ്യുടെ ഈ നീക്കം സഹായിക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തല്‍.
Comments