കൊല്‍ക്കത്ത: പശ്ചിമ ബംഗാളില്‍ 252 മദ്രസകള്‍ അടച്ചുപൂട്ടാന്‍ നോട്ടീസ് നല്‍കി ബിജെപി സര്‍ക്കാര്‍. സര്‍ക്കാര്‍ സഹായം ലഭിക്കാത്തതും അനധികൃതമായി പ്രവര്‍ത്തിക്കുന്നതുമായ മദ്രസകള്‍ക്കാണ് നോട്ടീസ് നല്‍കിയിരിക്കുന്നത്. നൂറോളം മദ്രസകള്‍ക്ക് കാരണം കാണിക്കല്‍ നോട്ടീസും നല്‍കിയിട്ടുണ്ട്. മതിയായ വിശദീകരണം നല്‍കുന്നതില്‍ പരാജയപ്പെട്ടാല്‍ ഇവയും അടച്ചുപൂട്ടിയേക്കാം.
ഭീഷണി നേരിടുന്ന 252 മദ്രസകളില്‍ ഭൂരിഭാഗവും ഖാരിജി വിഭാഗത്തില്‍പ്പെട്ടതാണെന്ന് റിപ്പോര്‍ട്ടുകള്‍ വ്യക്തമാക്കുന്നു. ഇതില്‍ കുറഞ്ഞത് 44 എണ്ണം മാല്‍ഡയിലും, 37 എണ്ണം ഉത്തര്‍ ദിനാജ്പൂരിലും, 32 എണ്ണം സൗത്ത് 24 പര്‍ഗാനാസിലും, 25 വീതം നാദിയയിലും മുര്‍ഷിദാബാദിലുമാണ് സ്ഥിതി ചെയ്യുന്നത്. സംസ്ഥാനത്തെ അംഗീകൃതവും അംഗീകരിക്കപ്പെടാത്തതുമായ മദ്രസകളുടെ എണ്ണം തിട്ടപ്പെടുത്തുന്നതിനായി ജൂണില്‍ മുഖ്യമന്ത്രി സുവേന്ദു അധികാരി സംസ്ഥാന വ്യാപകമായ സര്‍വേയ്ക്ക് ഉത്തരവിട്ടിരുന്നു.
മദ്രസകളുടെ പ്രവര്‍ത്തനരീതി, വിദ്യാര്‍ത്ഥികളുടെ എന്റോള്‍മെന്റ്, ഫണ്ടിന്റെ സ്രോതസ്സുകള്‍, രജിസ്‌ട്രേഷന്‍ സ്റ്റാറ്റസ് എന്നിവ പരിശോധിക്കുന്നതിനായി കൊല്‍ക്കത്തയിലും മറ്റ് 22 ജില്ലകളിലും ന്യൂനപക്ഷ കാര്യ-മദ്രസ വിദ്യാഭ്യാസ വകുപ്പിന്റെ നേതൃത്വത്തില്‍ സര്‍വേ നടത്തിയിരുന്നു. സംസ്ഥാനത്ത് നിലവില്‍ സാധുവായ അനുമതിയോടെ 2,132 മദ്രസകള്‍ പ്രവര്‍ത്തിക്കുമ്പോള്‍, അംഗീകാരമില്ലാത്ത മദ്രസകളുടെ എണ്ണം 2,396 ആണെന്ന് മൈനോറിറ്റി കാര്യ-മദ്രസ വിദ്യാഭ്യാസ മന്ത്രി ശുദിറാം തുഡു പറഞ്ഞു.
മദ്രസകള്‍ക്കെതിരെയുള്ള നടപടി ബംഗാള്‍ രാഷ്ട്രീയത്തില്‍ വാഗ്വാദങ്ങള്‍ക്ക് കാരണമായിട്ടുണ്ട്. മദ്രസ വിദ്യാഭ്യാസത്തിന്റെ പശ്ചാത്തലത്തില്‍ ദേശവിരുദ്ധ പ്രവര്‍ത്തനങ്ങള്‍ തടയേണ്ടത് സര്‍ക്കാരിന്റെ ഉത്തരവാദിത്തമാണെന്ന് ബിജെപി സംസ്ഥാന അധ്യക്ഷന്‍ സമിക് ഭട്ടാചാര്യ പറഞ്ഞു. ബംഗാള്‍ മന്ത്രിയും മുതിര്‍ന്ന ബിജെപി നേതാവുമായ അഗ്‌നിമിത്ര പോളും മദ്രസകള്‍ക്കെതിരെയുള്ള നടപടി ന്യായമാണെന്ന് വിശേഷിപ്പിച്ചു.
ഇത്തരം സ്ഥാപനങ്ങള്‍ ദേശവിരുദ്ധ വിദ്യാഭ്യാസം പ്രോത്സാഹിപ്പിക്കുന്നു എന്നാണ് ആരോപണം. എന്നാല്‍ മദ്രസകള്‍ വെറുമൊരു വിദ്യാഭ്യാസ സമ്പ്രദായം മാത്രമാണെന്നും അവയ്ക്കെതിരെ ഭീകരവാദപരമായ ആക്ഷേപങ്ങള്‍ ഉന്നയിക്കുന്നത് ശരിയല്ലെന്നും തൃണമൂല്‍ എംഎല്‍എ കുനാല്‍ ഘോസ് വ്യക്തമാക്കി.
Comments