ന്യൂഡല്‍ഹി: രാഷ്ട്രീയമായി വന്‍ വിവാദം ഉയര്‍ത്തിവിട്ട 'വന്ദേമാതര' ത്തിന്റെ പൂര്‍ണ്ണരീതിയിലുള്ള ആലാപനം സംബന്ധിച്ച തര്‍ക്കം കായിക രംഗത്തേക്കും. അഫ്ഗാനിസ്ഥാന് എതിരേയുള്ള ടി20 ആദ്യ മത്സരത്തില്‍ 'വന്ദേമാതരം' ആലപിച്ചതിനു പിന്നാലെ രാഷ്ട്രീയ വിവാദം. ഇതാദ്യമായിട്ടാണ് ഇന്ത്യയില്‍ ഒരു രാജ്യാന്തര കായിക മത്സരത്തില്‍ വന്ദേമാതരം ആലപിക്കുന്നത്.
അരുണ്‍ ജയ്റ്റ്‌ലി സ്റ്റേഡിയത്തില്‍ വന്ദേമാതരത്തിന്റെ ആറു ചരണങ്ങളും പ്ലേ ചെയ്തു. പിന്നാലെ 'ജനഗണമന'യും ആലപിക്കുകയായിരുന്നു. ഇതിന് പിന്നാലെ കോണ്‍ഗ്രസ് രംഗത്ത് വരികയും ചെയ്തു. കോണ്‍ഗ്രസ് നേതാവ് ഉദിത് രാജ് രൂക്ഷ വിമര്‍ശനമാണ് നടത്തിയത്. ഒരു കാര്യവുമില്ലാത്ത ഇക്കാര്യം കൊണ്ട് രാജ്യത്തിന് എന്തുനേട്ടമാണ് ഉള്ളതെന്ന് ചോദിച്ചു. ശാസ്ത്ര-സാങ്കേതിക മേഖലകളില്‍ മുന്നേറാന്‍ ഇത് സഹായിക്കുമോ അതോ് ഇന്ത്യന്‍ ടീമിന്റെ കരുത്തു കൂട്ടുമോ ഇക്കാര്യം പുതിയ തൊഴില്‍ അവസരങ്ങള്‍ കൊണ്ടുവരുമോ എന്ന് പരിഹസിച്ചു. കയറ്റുമതി ഇടിയും കടബാധ്യത കൂടുകയുമാണ്. ജെന്‍സീയുടെ ഗുരുതരമായ പ്രശ്‌നങ്ങളാണ് നേരിടുന്നത്. ഇതുകൊണ്ട് അതിനെല്ലാം പരിഹാരമാകുമോ എന്നും ചോദിച്ചു.
ദേശീയ ഗീതത്തിന്റെ 150-ാം വാര്‍ഷിക ആഘോഷങ്ങളുടെ ഭാഗമായി ഫെബ്രുവരി 6ന് ആഭ്യന്തര മന്ത്രാലയം വന്ദേമാതരം ആലപിക്കുന്നത് സംബന്ധിച്ച മാര്‍ഗനിര്‍ദ്ദേശങ്ങള്‍ പുറപ്പെടുവിച്ചിരുന്നു. എന്നാല്‍ പാര്‍ട്ടി പരിപാടികളില്‍ ദേശീയ ഗീതത്തിന്റെ ആദ്യ രണ്ടു ചരണങ്ങള്‍ മാത്രം നിലനിര്‍ത്താന്‍ അടുത്തിടെ ചേര്‍ന്ന വര്‍ക്കിങ് കമ്മിറ്റി യോഗത്തില്‍ കോണ്‍ഗ്രസ് പ്രമേയം പാസാക്കിയിരുന്നു. എന്നാല്‍ ഇനിമുതല്‍ ഓരോ ആഭ്യന്തര പരമ്പരയിലെയും ആദ്യ മത്സരത്തിന് മുന്നോടിയായി വന്ദേമാതരം ആലപിക്കാനാണ് ബിസിസിഐയുടെ നീക്കം. അതേസമയം നേരത്തേ വന്ദേമാതരം സംബന്ധിച്ച് കേന്ദ്രം പുറത്തിറക്കിയ മാര്‍ഗ്ഗനിര്‍ദേശങ്ങളില്‍ കായിക മത്സങ്ങളില്‍ ആലപിക്കുന്നത് സംബന്ധിച്ച് നിര്‍ദേശങ്ങള്‍ നല്‍കിയിട്ടില്ല.
Comments