ദേവാസുരം എന്ന ക്ലാസിക് ചിത്രത്തിന്റെ രണ്ടാം ഭാഗമായി എത്തിയ മാസ് ക്ലാസിക് ചിത്രമാണ് രാവണപ്രഭു. ആദ്യ ഭാഗത്തിൽ മംഗലശ്ശേരി നീലകണ്ഠന്റെ കഥ പറഞ്ഞ് പ്രേക്ഷകരുടെ മനസ്സിലിടം നേടിയെങ്കില്‍ രണ്ടാം ഭാഗത്തില്‍ മാസ് എന്‍ട്രിയായി എത്തിയത് മകൻ കാർത്തികേയനാണ്. മോഹൻലാല്‍ ഇരട്ടവേഷത്തില്‍ തകർത്ത് അഭിനയിച്ച ഈ ചിത്രത്തില്‍ മറക്കാനാവാത്ത ഒരുപാട് രംഗങ്ങളും ഡയലോഗുകളും ആക്ഷന്‍ സീനുകളും നിറഞ്ഞു നിന്നിരുന്നു.
പുത്തൻ സാങ്കേതിക മികവോടെ റീറിലീസായി പ്രേക്ഷകർക്ക് മുന്നിൽ വീണ്ടുമെത്തിയപ്പോഴും മോഹൻലാൽ ആരാധകർ അത് ഒന്നടങ്കം ഏറ്റെടുത്തു. ആഘോഷപൂര്‍വ്വമാണ് രാവണപ്രഭുവിനെയും അതിലെ സീനുകളെയും പ്രേക്ഷകര്‍ നെഞ്ചിലേറ്റിയത്. ആ സിനിമയെ ഇന്നും പ്രേക്ഷകര്‍ ഉത്സവമാക്കുന്നു എന്നതിന്റെ തെളിവാണിത്.
ഇപ്പോഴിതാ ‘രാവണപ്രഭു’വിന്റെ എഐ റീക്രിയേഷൻ വീഡിയോയാണ് സോഷ്യല്‍ മീഡിയ ഏറ്റെടുക്കുന്നത്. മോഹൻലാലിന്റെ കള്‍ട്ട് കഥാപാത്രമായ കാർത്തികേയനായി എത്തുന്നത് ബേസില്‍ ജോസഫാണ്. മോഹന്‍ലാലിനൊപ്പം കട്ടയ്ക്കു നില്‍ക്കുന്ന സിദ്ദിഖിന്റെ ശ്രീനിവാസന്‍ എന്ന പോലീസ് കഥാപാത്രമാകുന്നത് ടൊവിനോ തോമസാണ്. ഈ ചിത്രത്തിലെ ഏറ്റവും മികച്ച ആക്ഷൻ സീക്വൻസിന് തൊട്ടുമുമ്പുള്ള തകർപ്പൻ രംഗമാണ് എഐ റീക്രിയേറ്റ് ചെയ്തിരിക്കുന്നത്.
മോഹൻലാലിന്റെയും സിദ്ദിഖിന്റെയും തീപാറുന്ന ഡയലോഗുകള്‍ ബേസിലും ടൊവിനോയും അതേ മുഖഭാവത്തോടെ പറയുന്നത് വീഡിയോയില്‍ കാണാം. തമാശ പറഞ്ഞും പൊട്ടിച്ചിരിപ്പിച്ചും പ്രേക്ഷകരുടെ പ്രിയങ്കരനായ ബേസില്‍ മീശ പിരിച്ച് കാർത്തികേയന്റെ ഭാവത്തില്‍ കട്ട മാസായി നില്‍ക്കുന്നതാണ് ഈ വീഡിയോയുടെ ഏറ്റവും വലിയ ഹൈലൈറ്റ്. നിമിഷനേരം കൊണ്ടാണ് ഈ വീഡിയോ സോഷ്യല്‍ മീഡിയയില്‍ വൈറലാകുന്നത്.
‘മോളിവുഡ് മാഡ്’ എന്ന ഇന്‍സ്റ്റഗ്രാം അക്കൗണ്ടിലൂടെയാണ് ഈ വീഡിയോ പങ്കിട്ടിരിക്കുന്നത്. രസകരമായ നിരവധി കമന്റുകളും എഐ വീഡിയോയ്ക്ക് താഴെ വരുന്നുണ്ട്. ‘ബേസില്‍ തൂക്കി...’ എന്ന കമന്റാണ് അധികം പേരും നല്‍കുന്നത്. എന്നാല്‍ മോഹൻലാല്‍ ആകാന്‍ ബേസില്‍ ഇത്തിരി പാടു പെടുമെന്നും സിദ്ധിഖിന്റെ കഥാപാത്രമാകാന്‍ യുവനടന്മാർക്ക് പറ്റില്ലെന്നും കമന്റുകളുണ്ട്.
Comments