തിരുവനന്തപുരം: മാസപ്പടിക്കേസില്‍ ഇ.ഡി. ഡിജിപിയ്ക്ക് കത്ത് നല്‍കിയിട്ടും കേസ് എടുക്കാന്‍ സംസ്ഥാന സര്‍ക്കാര്‍ കൂട്ടാക്കാത്തത് മുസ്‌ളീംലീഗ് എംഎല്‍എമാര്‍ കുടുങ്ങുമെന്ന പേടികൊണ്ടെന്ന് ബിജെപി സംസ്ഥാന ഉപാദ്ധ്യക്ഷന്‍ ഷോണ്‍ ജോര്‍ജ്ജ്.
ഇ.ഡി. കൈമാറിയ വീണയുടെ കൈപ്പടയിലെ കുറിപ്പില്‍ പറഞ്ഞിരിക്കുന്ന വിവരം ഭാവി ബിസിനസ് എന്നാണ് റിയാസ് പറയുന്നത്. എന്നാല്‍ അതിനുള്ള പണം എവിടെ നിന്നും വന്നെന്ന് വ്യക്തമാക്കണം. അനധികൃത സ്വത്ത് സമ്പാദനമാണ് നടത്തിയതെന്നും എകെജി സെന്റര്‍ അഡ്രസില്‍ കമ്പനി നടത്തിയത് അതുകൊണ്ടാണെന്നും പറഞ്ഞു. ഭാവി ബിസിനസിനായുള്ള പണം ആണ് ആ 20 കോടിയാണെന്ന് റിയാസ് പറഞ്ഞത്.
പുറത്തുവന്ന രേഖകള്‍ വെച്ച് ഒരുകോടി അമ്പത്തെട്ട് ലക്ഷം രൂപ അധികമായി കൈപ്പറ്റിയിട്ടുണ്ട്. ഇന്‍വേയ്‌സ് ഇല്ലാതെ എണ്‍പത്തഞ്ച് ലക്ഷമെങ്കിലും കൈപ്പറ്റിയിട്ടുണ്ട്. സേവനം നല്‍കിയെന്നാണ് പിണറായി പറയുന്നത്. എന്നാല്‍ ഒരു സേവനവും നല്‍കിയിട്ടില്ല. ഈ പണത്തെയെങ്കിലും കൈക്കൂലി എന്ന് വിളിക്കാനുള്ള സ്വാതന്ത്ര്യം കേരളത്തിലെ ജനങ്ങള്‍ക്ക് കൊടുക്കണമെന്ന് പിണറായിയോട് അഭ്യര്‍ത്ഥിക്കുന്നു.
ലക്ഷക്കണക്കിന് സഖാക്കളുള്ള നാട്ടില്‍ എ.കെ.ജി. സെന്റര്‍ എന്ന അഡ്രസ്സില്‍ ബിസിനസ് നടത്താന്‍ പ്രാപ്തിയുള്ള ഒരു സഖാവെങ്കിലും ഈ കേരളത്തിലുണ്ടോ. അവര്‍ക്ക് പിണറായിയില്‍ അഡ്രസ് ഇല്ലാഞ്ഞിട്ടല്ലല്ലോ എകെജി സെന്ററിന്റെ അഡ്രസ് നല്‍കിയത്.
മഞ്ഞഇല വീഴുമ്പാള്‍ പച്ച ഇല ചിരിക്കുമെന്ന് റിയാസ് നടത്തിയ പ്രതികരണം മുസ്‌ളീംലീഗ് ചിരിക്കുമെന്നാണെന്നും നിങ്ങള്‍ക്കും അത് വരുന്നുണ്ടെന്നുമാണ് പറഞ്ഞതിന് അര്‍ത്ഥമെന്നും പറഞ്ഞു. കള്ളപ്പണ ഇടപാടില്‍ അന്വേഷണം വേണം. അന്വേഷണത്തെ എന്തുകൊണ്ട് എതിര്‍ക്കുന്നു. എന്‍ഫോഴ്‌സ്‌മെന്റ് ഡയറക്‌ട്രേറ്റ് അന്വേഷിക്കണമെന്നല്ല വിജിലന്‍സോ കേരളാപോലീസോ അന്വേഷിക്കാനല്ലേ പറയുന്നത്.
ഇതില്‍ വി.ഡി.സതീശന്‍ അന്വേഷണം നടത്താത്തത് പിണറായിയെ രക്ഷിക്കാന്‍ വേണ്ടി മാത്രമല്ല. അന്വേഷണം മുമ്പോട്ട് പോയാല്‍ മുസ്‌ളീംലീഗ് എംഎല്‍എ മാരും കുടുങ്ങുന്നത് കൊണ്ടാണ്. ലീഗ് എംഎല്‍എമാര്‍ വലിയ രീതിയില്‍ ഹവാല ഇടപാട് നടത്തുന്നുണ്ട്. കഴിഞ്ഞ പത്തിരുപത് വര്‍ഷമായി മലബാര്‍ കേന്ദ്രീകരിച്ച് സമാന്ത എക്കോണമി സൃഷ്ടിക്കാന്‍ മുസ്‌ളീംലീഗിന്റെ നേതാക്കള്‍ ശ്രമിക്കുന്നുണ്ട്. അതില്‍ മുഹമ്മദ് റിയാസും കണ്ണിയാണെന്ന് പുറത്തുവന്ന രേഖകളില്‍ നിന്നും വ്യക്തമാണ്.
ഈ പണമിടപാടിന്റെ കാലഘട്ടം പരിശോധിച്ചാല്‍ അത് 2024 - 25 ആണെന്ന് കാണാനാകും. എസ്എഫ്‌ഐഒ അന്വേഷണം പ്രഖ്യാപിച്ചതിന് തൊട്ടുപിന്നാലെയാണ് ഈ പണക്കൈമാറ്റം നടന്നിട്ടുള്ളത്. അന്വേഷണത്തിന്റെ പശ്ചാത്തലത്തില്‍ വിറളിപൂണ്ട് ഇവിടെ നിന്നും പണം ഗള്‍ഫിലേക്ക് മാറ്റാന്‍ ശ്രമിച്ചതാണ്. 2024 ജനുവരി 31 ആണ് എസ്എഫ്‌ഐഒ അന്വേഷണം പ്രഖ്യാപിച്ചത്. ഇതെല്ലാം നടന്നതാകട്ടെ 2025 ന് ഇടയിലാണ്.
സിപിഐഎമ്മിന്റെ തെറ്റുതിരുത്തല്‍രേഖ പ്രകാരം അനധികൃത സ്വത്ത് സമ്പാദനം നടത്തിയ മുന്‍മന്ത്രി റിയാസിനെയും മുന്‍ മുഖ്യമന്ത്രിയും പ്രതിപക്ഷ നേതാവുമായ പിണറായി വിജയനെയും പാര്‍ട്ടിയില്‍ നിന്നും ഇന്ന് തന്നെ പുറത്താക്കാന്‍ നടപടി സ്വീകരിക്കണമെന്നും ഷോണ്‍ ജോര്‍ജ്ജ് പറഞ്ഞു. ഇരുവരും അനധികൃത സ്വത്ത് സമ്പാദനം നടത്തിയെന്ന് റിയാസിന്റെ രാവിലത്തെ പ്രസ്താവനയില്‍ നിന്നു തന്നെ വ്യക്തമാണ്.
വീണയുടെ എക്‌സാലോജിക് കമ്പനി കൈപ്പറ്റിയത് ഒരു പൊളിറ്റീഷ്യന് വേണ്ടിയുള്ള പണമാണെന്ന് ഇന്‍ട്രിസെറ്റ് ബോര്‍ഡിന്റെ ഉത്തരവില്‍ കൃത്യമായി പറയുകയും ചെയ്യുന്നുണ്ട്. സിഎംആര്‍എല്‍ കമ്പനിയുടെ ചീഫ് ഫിനാന്‍സ് ഓഫീസര്‍ യാതൊരു സേവനവും നല്‍കാതെയാണ് പണം കൊടുത്തതെന്ന് പറയുന്ന വളരെ കൃത്യമായ മൊഴിയുണ്ട്. മുഖ്യമന്ത്രി ആയിരിക്കുമ്പോള്‍ സര്‍ക്കാരിന് 13.4 പോയിന്റ ശതമാനം ഓഹരി പങ്കാളിത്തമുള്ള കമ്പനിയുമായി മുഖ്യമന്ത്രിയുടെ മകള്‍ കരാറില്‍ ഏര്‍പ്പെടുന്നത് അധികാര ദുര്‍വ്വിനിയോഗമാണെന്നും പറഞ്ഞു.
Comments