തിരുവനന്തപുരം: അമേരിക്കന്‍ യാത്രയില്‍ സര്‍ക്കാരിന് ചെലവില്ലെന്നും സ്വകാര്യ ചെലവിലാണെന്നും വിശദീകരിച്ച് രമേശ് ചെന്നിത്തല ഫേസ്ബുക്കില്‍. വിദേശയാത്ര സംബന്ധിച്ച ആവശ്യവും കാരണവും കൂടെ യാത്ര ചെയ്യുന്നവരുടെ വിവരവും പോസ്റ്റില്‍ പങ്കുവെച്ചിട്ടുണ്ട്.
തന്റെ അമേരിക്കന്‍ യാത്ര സര്‍ക്കാര്‍ ചെലവിലല്ലെന്നും സംഘാടകരുടെ ചെലവിലാണെന്നും വീഡിയോയില്‍ പറയുന്നു. ആദ്യകാലത്ത് ജയ്ഹിന്ദ് ടിവിയുടെ നേതൃനിരയില്‍ ഉണ്ടായിരുന്ന ഫെലിക്‌സ് സൈമണിന്റെ മകന്റെ വിവാഹത്തില്‍ പങ്കെടുക്കാനാണ് താനും ഭാര്യയൂം അമേരിക്കയില്‍ എത്തിയതെന്നാണ് വിശദീകരണം. മൂന്നര പതിറ്റാണ്ടു നീണ്ട ബന്ധം ഫെലിക്‌സുമായി ഉണ്ടെന്നും അമേരിക്കയില്‍ പ്രവാസി മലയാളി സംഘടനകളുടെ പരിപാടിയിലും ഓണാഘോഷങ്ങളിലും പങ്കെടുത്തതായും സാം പിത്രോദയുടെ വീട്ടില്‍ പോയി കൂടിക്കാഴ്ച നടത്തിയതായും പറയുന്നു. മന്ത്രി മോന്‍സ് ജോസഫ്, ജോസ് കെ. മാണി, പന്തളം സുധാകരന്‍, അന്‍വര്‍ സാദത്ത് തുടങ്ങിയവരും സന്ദര്‍ശനത്തിന് ഉണ്ടായിരുന്നു.
ചെന്നിത്തലയുടെ വിദേശയാത്ര സംബന്ധിച്ച് ഇടത് സൈബര്‍ ഹാന്‍ഡിലുകളില്‍ വ്യാപക പ്രചാരണങ്ങള്‍ നടക്കുന്ന സാഹചര്യത്തിലാണ് സാമൂഹ്യമാധ്യമ വീഡിയോയുമായി ആഭ്യന്തരമന്ത്രി എത്തിയത്. പിണറായി വിദേശത്ത് പോയാല്‍ കുഴപ്പം രമേശ് ചെന്നിത്തലയുടെ വിദേശയാത്രയ്ക്ക് ഇത് ബാധകമല്ലേ എന്നായിരുന്നു വിമര്‍ശനം.
Comments