അന്തരിച്ച നടൻ സുശാന്ത് സിംഗ് രജ്‌പുത്തിന്റെ മുൻ മാനേജരായ ദിഷ സാലിയന്റെ മരണത്തില്‍ സമഗ്രമായ അന്വേഷണം നടത്താൻ ബോംബെ ഹൈക്കോടതി നിർദ്ദേശിച്ചതിനെത്തുടർന്ന്, സിബിഐ എഫ്‌ഐആർ രജിസ്റ്റർ ചെയ്തിട്ടുണ്ട്. ശിവസേനാ നേതാവും എം.എല്‍.എയുമായ ആദിത്യ താക്കറെ, അഭിനേതാക്കളായ ഡിനോ മോറിയ, സൂരജ് പഞ്ചോളി, റിയ ചക്രവർത്തി എന്നിവരടക്കമുള്ളവരുടെ പേരുകളാണ് എഫ്.ഐ.ആറിലുള്ളത്.
ഇപ്പോഴിതാ സി.ബി.ഐ രജിസ്റ്റര്‍ ചെയ്ത എഫ്.ഐ.ആറില്‍ തന്റെ പേരുണ്ടെന്നറിഞ്ഞതോടെ പ്രതികരണവുമായി എത്തിയിരിക്കുകയാണ് നടന്‍ സൂരജ് പഞ്ചോളി. ജീവിതത്തില്‍ ഇതുവരെ ദിഷ സാലിയനെയോ സംഭവവുമായി ബന്ധപ്പെട്ട് പേര് ഉയര്‍ന്ന ശിവസേന ഉദ്ധവ് വിഭാഗം നേതാവ് ആദിത്യ ഠാക്കറെയെയോ നേരിട്ടോ അല്ലാതെയോ കണ്ടിട്ടില്ലെന്ന് ഇന്‍സ്റ്റാഗ്രാമില്‍ പങ്കുവെച്ച പ്രസ്താവനയിലൂടെ സൂരജ് വെളിപ്പെടുത്തി. കേസില്‍ അന്വേഷണ ഏജന്‍സികളുമായി പൂര്‍ണ്ണമായി സഹകരിക്കാന്‍ തയ്യാറാണെന്നും മറച്ചുവെക്കാന്‍ ഒന്നുമില്ലെന്നും താരം കുറിച്ചു. മാധ്യമ വിചാരണകളെയല്ല തെളിവുകളെയാണ് വിശ്വസിക്കേണ്ടതെന്നും ഒരു യഥാര്‍ത്ഥ വ്യക്തിയുടെ ജീവിതത്തെയും കുടുംബത്തെയും അപമാനിക്കരുതെന്നും താരം ജനങ്ങളോട് അഭ്യര്‍ത്ഥിച്ചു.
‘‘ഇതൊന്ന് വായിച്ചുനോക്കൂ, കാരണം മാധ്യമങ്ങൾ ഇത് റിപ്പോർട്ട് ചെയ്യില്ലെന്ന് എനിക്ക് ഉറപ്പാണ്...’’ എന്ന ക്യാപ്ഷന്‍ നല്‍കിയാണ് സൂരജിന്റെ കുറിപ്പ്.
‘‘ചില വസ്തുതകൾ പൊതുസമൂഹത്തിന് മുന്നിൽ വ്യക്തമാക്കേണ്ടത് അത്യാവശ്യമാണെന്ന് തോന്നിയതുകൊണ്ടാണ് ഞാൻ ഇക്കാര്യം പങ്കുവെക്കുന്നത്. കഴിഞ്ഞ കുറച്ച് വർഷങ്ങളായി, അന്തരിച്ച ദിഷ സാലിയന്റെ ദൗർഭാഗ്യകരമായ മരണവുമായി ബന്ധപ്പെട്ട വിവാദങ്ങളിലേക്ക് വിവിധ മാധ്യമ റിപ്പോർട്ടുകളിലൂടെയും പ്രസ്താവനകളിലൂടെയും എന്റെ പേര് വലിച്ചിഴക്കപ്പെടുന്നുണ്ട്. ഇക്കാര്യം വളരെ വ്യക്തമായിത്തന്നെ പറയാൻ ഞാൻ ആഗ്രഹിക്കുന്നു.
ജീവിതത്തിൽ ഒരിക്കൽ പോലും ഞാൻ ദിഷ സാലിയനെ നേരിട്ടോ അല്ലാതെയോ കണ്ടിട്ടില്ല. അതുപോലെ, ആദിത്യ താക്കറെയെയും ഞാൻ ഒരിക്കലും കണ്ടിട്ടില്ല. എനിക്ക് യാതൊരു ബന്ധവുമില്ലാത്ത ഒരു വിഷയത്തിലേക്ക് എന്റെ പേര് വലിച്ചിഴക്കപ്പെടുന്നത് തികച്ചും അനീതിയും അതീവ ദുഃഖകരവുമാണ്; പ്രത്യേകിച്ച് എന്നെ ഈ വിഷയവുമായി ബന്ധിപ്പിക്കുന്ന യാതൊരു തെളിവും ഇല്ലാത്ത സാഹചര്യത്തിൽ.
എന്നെക്കുറിച്ച് വരുന്ന ഓരോ റിപ്പോർട്ടിനോടും വാർത്തയോടും പ്രതികരിക്കേണ്ടതില്ലെന്ന് കരുതിയാണ് ഞാൻ ഇത്രയും കാലം മൗനം പാലിച്ചത്. എന്നാൽ ഒരേ കാര്യം ആവർത്തിക്കുമ്പോൾ, സ്വന്തം നിലപാട് വ്യക്തമാക്കേണ്ട ഒരു ഘട്ടം വന്നെത്തുന്നു.
ഈ വിഷയത്തിൽ സിബിഐയും പോലീസും എന്നെ ചോദ്യം ചെയ്യുകയും ഏകദേശം 4-5 വർഷം മുമ്പ് തന്നെ എന്റെ മൊഴി രേഖപ്പെടുത്തുകയും ചെയ്തിട്ടുണ്ട്. എനിക്ക് മറച്ചുവെക്കാൻ ഒന്നുമില്ല. എന്നെ വീണ്ടും ചോദ്യം ചെയ്യാനോ കൂടുതൽ വിവരങ്ങൾ ശേഖരിക്കാനോ ഏതെങ്കിലും അന്വേഷണ ഏജൻസിക്ക് തോന്നുകയാണെങ്കിൽ, ഏത് അന്വേഷണത്തോടും സഹകരിക്കാനും അതിനായി ലഭ്യമാകാനും ഞാൻ പൂർണ്ണ സന്നദ്ധനാണ്.
ഇത്തരം കാര്യങ്ങളിലേക്ക് എന്റെ പേര് വലിച്ചിഴക്കുന്നതിന് മുൻപ് വസ്തുതകൾ പരിശോധിക്കണമെന്ന് മാത്രമാണ് ഞാൻ ആവശ്യപ്പെടുന്നത്. അന്തരിച്ച ദിഷ സാലിയന്റെ ദൗർഭാഗ്യകരമായ മരണവുമായി ബന്ധപ്പെട്ട സാഹചര്യങ്ങളെക്കുറിച്ച് നീതിയുക്തവും സമഗ്രവുമായ സിബിഐ അന്വേഷണം നടത്തുന്നതിനെ ഞാൻ ശക്തമായി പിന്തുണയ്ക്കുന്നു.
അതേസമയം, ഈ ദൗർഭാഗ്യകരമായ സംഭവത്തെച്ചൊല്ലി സൃഷ്ടിക്കപ്പെടുന്ന ദുരുദ്ദേശ്യപരമായ പ്രചാരണങ്ങളെക്കുറിച്ചും തെറ്റായ കഥനങ്ങളെക്കുറിച്ചും അന്വേഷണം നടക്കണമെന്ന് ഞാൻ വിശ്വസിക്കുന്നു; കാരണം, തെളിവുകളില്ലാതെ മറ്റൊരാളുടെ സൽപ്പേര് നശിപ്പിക്കാനുള്ള കാരണമായി ഒരാളുടെ മരണം മാറാൻ പാടില്ല.
ഇത് വായിക്കുന്ന എല്ലാവരോടുമായി ഒരു അഭ്യർത്ഥന: വാർത്തകളിലോ സോഷ്യൽ മീഡിയയിലോ കാണുന്നതെല്ലാം വിശ്വസിക്കരുത്! ഒരു തലക്കെട്ട് തെളിവല്ല. ഒരു ചർച്ചയും തെളിവല്ല. ടെലിവിഷനിൽ ഒരാൾ പറയുന്ന കാര്യങ്ങൾ വസ്തുതയാകണമെന്നില്ല. ഒരാളുടെ ജീവിതത്തെക്കുറിച്ചും സ്വഭാവത്തെക്കുറിച്ചും അഭിപ്രായം രൂപീകരിക്കുന്നതിന് മുൻപ് കാര്യങ്ങൾ പരിശോധിക്കുക. കാരണം, ടെലിവിഷനിൽ ചർച്ച ചെയ്യപ്പെടുന്ന ഓരോ പേരിന് പിന്നിലും യഥാർത്ഥ കുടുംബവും യഥാർത്ഥ ജീവിതവുമുള്ള ഒരു യഥാർത്ഥ വ്യക്തിയുണ്ട്.
ഞാൻ ഇത്രയും കാലം മൗനം പാലിച്ചു, എന്നാൽ എനിക്ക് യാതൊരു ബന്ധവുമില്ലാത്ത ഒരു വിഷയത്തിലേക്ക് എന്റെ പേര് തുടർച്ചയായി വലിച്ചിഴക്കപ്പെടാൻ ഞാൻ അനുവദിക്കില്ല. എനിക്ക് നിയമവ്യവസ്ഥയിൽ വിശ്വാസമുണ്ട്. അന്വേഷണ ഏജൻസികളിൽ എനിക്ക് വിശ്വാസമുണ്ട്. ഒടുവിൽ സത്യം പുറത്തുവരുമെന്നും എനിക്ക് ഉറപ്പുണ്ട്. വസ്തുതകൾ തെളിയട്ടെ, അന്വേഷണം നടക്കട്ടെ, സത്യം പുറത്തുവരട്ടെ. ജയ് ഹിന്ദ്...’’ എന്നാണ് സൂരജ് പഞ്ചോളി കുറിച്ചിരിക്കുന്നത്. സൂരജ് പഞ്ചോളി, ആദിത്യ ഠാക്കറെ, റിയ ചക്രവര്‍ത്തി, ഡിനോ മോറിയ തുടങ്ങിയ പ്രമുഖരുടെ പേരുകള്‍ പരാമര്‍ശിച്ചുകൊണ്ട് ദിഷ സാലിയന്റെ പിതാവ് നല്‍കിയ ഹര്‍ജിയിലാണ് ബോംബെ ഹൈക്കോടതി ഉത്തരവിനെ തുടര്‍ന്ന് സി.ബി.ഐ അന്വേഷണം ആരംഭിച്ചത്.
ശിവസേന നേതാവും എംഎല്‍എയുമായ ആദിത്യ താക്കറെ, റോഹന്‍ റോയ്, നടന്മാരായ ദിനോ മോറിയ, സൂരജ് പഞ്ചോളി, ആദിത്യ പഞ്ചോളിയുടെ ബോഡിഗാര്‍ഡുകള്‍, റിയ ചക്രവര്‍ത്തി, ഷോയ്ക്ക് ചക്രവര്‍ത്തി, മുന്‍ പൊലീസ് ഉദ്യോഗസ്ഥന്‍ സച്ചിന്‍ വാസെ, മുന്‍ മുബൈ പൊലീസ് കമ്മീഷണര്‍ പരം ബിര്‍ സിങ്, ഡിസിപി വിശാല്‍ താക്കൂര്‍ എന്നിവരെയാണ് കേസില്‍ പ്രതി ചേര്‍ത്തിരിക്കുന്നത്. സംസ്ഥാന മുന്‍ ആഭ്യന്തര മന്ത്രി അനിഷ് ദേശ്മുഖ്, പൊലീസ് ഉദ്യോഗസ്ഥര്‍, ഫോറസിക് ഉദ്യോഗസ്ഥരുടെ പേരുകളും എഫ്‌ഐആറിലുണ്ട്.
കൊലപാതകം, കൂട്ടബലാത്സംഗം, ഗൂഢാലോചന, തെളിവ് നശിപ്പിക്കല്‍ തുടങ്ങിയ വകുപ്പുകള്‍ ചുമത്തിയാണ് കേസെടുത്തിരിക്കുന്നത്. കേസിന്റെ ഗൂഢാലോചനയിലും തെളിവ് നശിപ്പിക്കലിലും അന്നത്തെ മുഖ്യമന്ത്രി ഉദ്ധവ് താക്കറെയ്ക്കും മകന്‍ ആദിത്യ താക്കറെയ്ക്കും പ്രധാന പങ്കുണ്ടെന്ന് എഫ്‌ഐആറില്‍ പറയുന്നുണ്ട്. കേസുമായി ബന്ധപ്പെട്ട നിര്‍ണായക തെളിവുകള്‍ നശിപ്പിക്കുകയും പൊലീസിനെ ദുരുപയോഗം ചെയ്ത് കുറ്റവാളികളെ രക്ഷിക്കാന്‍ ശ്രമിക്കുകയും ചെയ്ത ഉദ്യോഗസ്ഥരയെും അന്വേഷണ പരിധിയില്‍ കൊണ്ടുവരണമെന്നും സിബിഐ ആവശ്യപ്പെട്ടിട്ടുണ്ട്.
2020 ജൂണ്‍ എട്ടിനാണ് ദിശാ സാലിയനെ മരിച്ച നിലയില്‍ കണ്ടെത്തിയത്. മുംബയ് മലാനിലെ കെട്ടിടത്തിന്റെ 14ാം നിലയില്‍നിന്ന് വീണു മരിച്ചുവെന്നാണ് പൊലീസ് നിഗമനം. ദിവസങ്ങള്‍ക്ക് ശേഷം സുശാന്തിനെ ബാന്ദ്രയിലെ ഫ്ലാറ്റില്‍ മരിച്ച നിലയില്‍ കണ്ടെത്തി. അന്ന് മുബൈ പൊലീസ് അപകടമരണത്തിനാണ് കേസ് രജിസ്റ്റർ ചെയ്തിരുന്നത്. പൊലീസിന്റെ അന്വേഷണത്തില്‍ വീഴ്ച സംഭവിച്ചതായി ആരോപിച്ച്‌ ദിശയുടെ പിതാവ് നല്‍കിയ ഹർജിയിലാണ് സെപ്തംബർ രണ്ടിന് ബോംബെ ഹൈക്കോടതി സി.ബി.ഐ അന്വേഷണത്തിന് ഉത്തരവിട്ടത്.
നേരത്തെ ദിഷയടേത് ആത്മഹത്യയാണെന്നാണ് പൊലീസ് അവകാശപ്പെട്ടിരുന്നത്. എന്നാല്‍ മകള്‍ കൂട്ടബലാത്സംഗത്തിനിരയായി കൊല്ലപ്പെടുകയായിരുന്നുവെന്ന് ആരോപിച്ച്‌ കഴിഞ്ഞ വർഷമാണ് പിതാവ് ഹൈക്കോടതിയെ സമീപിച്ചത്.
Comments