ഈ സിവിൽ സർവ്വീസ് വിജയം വെറുമൊരു വിജയഗാഥയല്ല, മുംബൈ ചേരിയുടെ ഇതിഹാസ താരം മുഹമ്മദ് സിമാബ് ഖാൻ കേരളത്തിലേക്ക് !

തിരുവനന്തപുരം: മുംബൈ ചേരിയിൽ നിന്ന് ഉദിച്ചു ഉയർന്ന സിവിൽ സർവ്വീസ് വിജയഗാഥ മുഹമ്മദ് സിമാബ് ഖാൻ തലസ്ഥാനത്ത് എത്തുന്നു , വെറുതെ ഒരു സന്ദർശനമല്ല, പകരം തിരഞ്ഞെടുക്കപ്പെട്ട ചേരി പ്രദേശത്തെ മിടുക്കരായ കുട്ടികൾക്ക് മോട്ടിവേഷൻ നൽകി പുതിയ സിവിൽ സർവ്വീസ് തരംഗം സൃഷ്ടിക്കുക എന്നതാണ് ലക്ഷ്യം.

രാജ്യത്തെ ടോപ്പ് റാങ്ക് സർവീസുകളിലൊന്നായ ഇന്ത്യൻ അഡ്മിനിസ്ട്രേറ്റീവ് സർവീസ് (ഐ. എ. എസ്) ലേക്ക് സ്ഥി രോൽസാഹംകൊണ്ടുയർന്ന യുവ പ്രതിഭയാണ് മുഹമ്മദ് സിമാബ് ഖാൻ. സാധാരണ മരപ്പണിക്കാരന്റെ മകൻ എന്ന നിലയിൽ നേരിടേണ്ടിവന്ന തിരിച്ചടികളെ വിജയമുദ്രയാക്കിയ ഈ യുവ പ്രതീകം കേരളത്തിന്റെ യുവത്വവുമായി സംവദിക്കാൻ എത്തുന്നത് പുതുമയാകും.

2023ലെ സിവിൽ സർവീസ് മത്സര പരീക്ഷയിലൂടെ ഐ.എ. എസ് പടവുകൾ കയറിയ മുഹമ്മദ് സിമാബ് ഖാൻ ഇപ്പോൾ അസമിലെ ധു ബ്രി ജില്ലയിൽ യുവജനകാര്യമന്ത്രാലയത്തിനുകീഴിൽ ജില്ലാ യൂത്ത് ഓഫീസറായി സേവനമനുഷ്ഠിക്കുകയാണ്.അവിടെ യുവജന വികസനത്തിലൂടെയും രാഷ്ട്രനിർമ്മാണ സംരംഭങ്ങളിലൂടെയും അവർക്ക് അവസരങ്ങൾ സൃഷ്ടിക്കാൻ ശ്രമിക്കുകയും അദേഹം ചെയ്യുന്നു.

മുഹമ്മദ് സി മാബ് ഖാന്റെ ജീവചരിത്രം വെറുതേ വായിച്ചു കളയാനാവില്ല.ഒരു സുപ്രഭാതത്തിൽ അദ്ദേഹം കൈയെത്തി പിടിച്ചതല്ല ഐ.എ.എസ് പദവി. സാമ്പത്തിക പരാധീനതകളും പിതാവിന്റെ മരണവും നൽകിയ തിരിച്ചടികളെ നേരിട്ട് ആറുവർഷം നീണ്ട തപസ്യ യിലൂടെയാണ് അദ്ദേഹമത് കരസ്ഥമാക്കിയത്. സാമ്പത്തികമായി വളരെ പിന്നാക്കാവസ്ഥയിലുള്ള കുടുംബത്തിലാണ് ജനനം. മരപ്പണിയായിരുന്നു പിതാവിന്റെ തൊഴിൽ. അമ്മ സാധാരണ വീട്ടമ്മയും.കടുത്ത സാമ്പത്തിക പരാധീനതകൾക്കിടയിലും മകന് മെച്ചപ്പെട്ട വിദ്യാഭ്യാസം നൽകാൻ മാതാപിതാക്കൾ ശ്രദ്ധിച്ചിരുന്നു.

മുംബൈയിലെ ചെമ്പൂരിലുള്ള ന്യൂ മോഡൽ ഇംഗ്ലീഷ് ഹൈസ്കൂളിൽ നിന്നും സ്കൂൾ വിദ്യാഭ്യാസം നേടിയ അദ്ദേഹം തുടർന്ന് കെ.ജെ. സോമയ്യ കോളേജിൽനിന്ന് മൈക്രോബയോളജിയിലും ബയോകെമിസ്ട്രിയിലും ബിരുദം നേടി. തുടർന്ന് ബിരുദാനന്തര ബിരുദവും കരസ്ഥമാക്കിയ അദ്ദേഹം തന്റെ ശ്രദ്ധ സിവിൽ സർവീസിലേക്ക് മാറ്റുകയായിരുന്നു.

സിമാബ് ഖാന്റെ ആ യാത്ര ചെറിയ യാത്രയായിരുന്നില്ല.ഈ യാത്രയുടെ ഒരു ഘട്ടത്തിൽ 0.66 മാർക്കിന്റെ വ്യത്യാസത്തിൽ അദ്ദേഹത്തിന് സിവിൽ സർവീസ് വിജയം ആദ്യ തവണയിൽ നഷ്ടമായി. എന്നാൽ ചെറിയ മാർക്കിന്റെ വ്യത്യാസത്തിൽ സംഭവിച്ച ഈ വലിയ പരാജയം അദ്ദേഹത്തിന്റെ ആത്മവിശ്വാസം തകർക്കുകയായിരുന്നില്ല, പകരം തന്റെ പരീക്ഷയെഴുത്തിന്റെ തന്ത്രം പുനർവിചിന്തനം ചെയ്യാനും തെറ്റുകളിൽ നിന്ന് പുതിയ പാഠം പഠിക്കാനും അദ്ദേഹം ഉപയോഗിച്ചു. അതോടെ തുടർന്നുള്ള യാത്ര അദ്ദേഹത്തിന് സ്ഥിരോൽ സാഹത്തിന്റെതായി.

പരാജയം പാതയുടെ അവസാനമായി കാണാതെ, ദിശമാറ്റാനുള്ള അവസരമായി ഉപയോഗിച്ചതാണ് അദ്ദേഹത്തിന്റെ വിജയത്തിന് അടിത്തറ യായത്. ഒന്നിൽ പിഴച്ചാൽ മൂന്ന് എന്ന് പറയുന്നതുപോലെ, 2023ൽ തന്റെ മൂന്നാമത്തെ ശ്രമത്തിൽ മുഹമ്മദ് സിമാബ് ഖാൻ സിവിൽ സർവീസ് പരീക്ഷയുടെ പ്രാഥമിക പരീക്ഷ വിജയകരമായി കടന്നു.തുടർന്ന് അദ്ദേഹം തന്റെ തുടർപഠനം ഡൽഹിയിലേക്ക് മാറ്റി.അവബോധവും ശരിയായ മാർഗ്ഗനിർദ്ദേശവും അദ്ദേഹത്തെ തുടർന്നും വിജയിയാക്കി.

സിവിൽ സർവീസ് അക്കാദമിയിലെ പരിശീലനത്തിന് ശേഷം 2025ൽ സിമാബ് ഖാൻ അസമിൽ യുവജനകാര്യ -കായിക മന്ത്രാലയത്തിന് കീഴിൽ ജില്ലാ യൂത്ത് ഓഫീസറായി നിയമിതനായി.ഇപ്പോൾ ധുബ്രി ജില്ലയിലെ താരം.മുംബൈയിലെ ഒരു ചേരിയിൽനിന്നും അസമിലെബി ധുബ്രിയിലേക്കുള്ള അദ്ദേഹത്തിന്റെ മാറ്റം ഭാരതത്തിന്റെ വൈവിധ്യത്തെ പുതിയ കാഴ്ചപ്പാടിൽ അനുഭവിക്കാനുള്ള അവസരം കൂടിയാണ് അദ്ദേഹത്തിന് നൽകിയത്. അതുകൊണ്ടുതന്നെ രാജ്യനിർമ്മാണ പ്രവർത്തനങ്ങളിൽ യുവാക്കളെ പങ്കാളികളാക്കുന്നതിനും സന്നദ്ധ പ്രവർത്തനങ്ങളും നൈപുണ്യ പ്രവർത്തനങ്ങളും പ്രോത്സാഹിപ്പിക്കുന്നതിലും ശാക്തീകരിക്കപ്പെട്ടവരും ഉത്തരവാദിത്വവുമുള്ള പൗരന്മാരെ സൃഷ്ടിച്ചെടുക്കുന്നതിലും അദ്ദേഹം പ്രത്യേകം ശ്രദ്ധ പതിപ്പിക്കുന്നു.

ഇന്ത്യയിലെ ഏറ്റവും കഠിനമായ പരീക്ഷകളിൽ ഒന്നായ സിവിൽ സർവീസ് വിജയിച്ചു എന്നത് മാത്രമല്ല സിമാബ് ഖാന്റെ വിജയം.സാഹചര്യങ്ങൾ ഒരാളുടെ വിധിയാകാൻ അനുവദിക്കാതിരിക്കുക എന്ന വലിയ പാഠം മറ്റുള്ളവർക്ക് സ്വന്തം ജീവിതത്തിലൂടെ കാട്ടിക്കൊടുത്തു എന്നതും അദ്ദേഹത്തിന്റെ വിജയത്തിൽ പ്പെടുന്നു. മുംബൈയിലെ ഒരു ചേരിയിലെ ഇടുങ്ങിയ വഴികളിൽനിന്നും വർഷങ്ങളുടെ തയ്യാറെടുപ്പിലേക്കും ഒരു മാർക്കിന്റെ അംശത്തിന്റെ പരാജയത്തിലേക്കും പിതാവിന്റെ നഷ്ടത്തിലേക്കും ഒടുവിൽ സിവിൽ സർവീസിന്റെ വിജയത്തിലേക്കുമുള്ള അദ്ദേഹത്തിന്റെ യാത്ര, സമ്പത്തിന്റെയോ വിഭവങ്ങളുടെയോ അഭാവം തങ്ങളുടെ സ്വപ്നങ്ങളെ എത്തിപ്പിടിക്കാൻ കഴിയാത്തതാക്കി മാറ്റിയിരിക്കുന്നുവെന്ന് വിശ്വസിക്കുന്ന ആയിരക്കണക്കിന് യുവ ഇന്ത്യക്കാർക്ക് ശക്തമായ ഒരു സന്ദേശം നൽകൽ കൂടിയാണ്.

മത്സര പരീക്ഷകളെ ഒരു സർക്കാർ ജോലിയിലേ ക്കുള്ള വഴിയായി കാണരുതെന്ന് മുഹമ്മദ് സിമാബ് ഖാൻ പറയുന്നു. രാജ്യത്തിന്റെ തീരുമാനമെടുക്കൽ,പൊതുസേവന സ്ഥാപനങ്ങളുടെ ഭാഗമാകാനുള്ള അവസരം എന്നിവയായി മത്സര പരീക്ഷകളെ കാണണമെന്നാണ് അദ്ദേഹത്തിന്റെ പക്ഷം. പ്രതിസന്ധികളെ അതിജീവിച്ചുള്ള മുന്നേറ്റത്തിന്റെയും പരാജയങ്ങളെ മറികടന്നുള്ള സ്ഥിരോൽസാഹത്തിന്റെയും സാഹചര്യങ്ങളെ അതിജീവിക്കുന്ന ലക്ഷ്യബോധത്തിന്റെയും കഥയാണ് സിമാബ് ഖാന്റെ ജീവിതം പറയുന്നത്. ജീവിതം എവിടെ തുടങ്ങുന്നു എന്നത് ഒരാളുടെ നിയന്ത്രണത്തിൽ അല്ലായിരിക്കാം. എന്നാൽ എത്ര ദൂരം മുന്നോട്ടു പോകണമെന്നത് ഒരാളുടെ ധൈര്യത്തെയും അച്ചടക്കത്തെയും ദൃഡനിശ്ചയത്തെയും ആശ്രയിച്ചാണി രിക്കുന്നത് എന്നതിന് തെളിവാണ് ഈ ഔദ്യോഗിക രജതരേഖയെന്നത് ശ്രദ്ധേയം.