വളരെക്കാലമായി പ്രേക്ഷകര്‍ കാത്തുകാത്തിരുന്ന ഒരു വിവാഹം കൂടി കഴിഞ്ഞിരിക്കുകയാണ്, അഹാന കൃഷ്ണയും നിമിഷ് രവിയുമാണ് ആ പുതിയ താരദമ്പതിമാര്‍. പാന്‍ ഇന്ത്യന്‍ ഛായാഗ്രാഹകൻ നിമിഷ് രവിയും കൃഷ്ണകുമാറിന്റെ മകളും അഭിനേത്രിയും സോഷ്യല്‍ മീഡിയ ഇന്‍ഫ്ലുവന്‍സറും യൂട്യൂബറുമൊക്കെയായ അഹാന കൃഷ്ണയും തമ്മിലുള്ള പ്രണയം കഴിഞ്ഞ കുറച്ചു നാളുകളായി വാര്‍ത്തകളില്‍ ഇടം പിടിച്ചിരുന്നതാണ്. നിമിഷിനെക്കുറിച്ച് ചോദിക്കുമ്പോള്‍ പലപ്പോഴും ഒരു കള്ളച്ചിരിയോടെയാണ് അഹാന മറുപടി പറഞ്ഞിട്ടുള്ളത്. എന്നാല്‍ എല്ലാ അഭ്യൂഹങ്ങള്‍ക്കും വിരാമമിട്ട് അഹാനയെ ജീവിതപങ്കാളിയാക്കി സ്വീകരിച്ചിരിക്കുകയാണ് നിമിഷ് രവി.
ഇപ്പോഴിതാ തന്റെ വിവാഹചിത്രങ്ങള്‍ സോഷ്യല്‍ മീഡിയയിലൂടെ ആരാധകര്‍ക്കായി പങ്കിട്ടിരിക്കുകയാണ് അഹാന കൃഷ്ണ. തിരുവനന്തപുരം കോവളത്തെ സ്വകാര്യ റിസോർട്ടിലായിരുന്നു വിവാഹം. ഞായറാഴ്ച നടന്ന വിവാഹത്തിന്റെ ചിത്രങ്ങളാണ് അഹാന പങ്കുവെച്ചത്. രാജകീയ പ്രൗഢിയോടെ നടന്ന ചടങ്ങിൽ രണ്ടുപേരുടെയും കുടുംബങ്ങളും ഏറെ പ്രിയപ്പെട്ടവരും മാത്രമാണ് പങ്കെടുത്തത്.
‘‘നിമിഷ്, നിന്നെ 20-ാം വയസ്സിൽ കണ്ടുമുട്ടി, 30-ാം വയസ്സിൽ നിന്നെ വിവാഹം ചെയ്തു...
എന്റെ ഉറ്റ സുഹൃത്ത്, കാമുകൻ, ജീവിത പങ്കാളി, ആത്മസുഹൃത്ത്, ആശ്വാസമായി ചേർത്തുപിടിക്കാവുന്ന തലയിണ, എന്റെ കപ്പ്‌കേക്ക്... ഇപ്പോഴിതാ എന്റെ ഭർത്താവും. നിനക്കൊപ്പമായിരിക്കുമ്പോൾ എന്റെ ഹൃദയം എപ്പോഴും പതിയെ സ്ഥിരതയോടെ കൃത്യമായ താളത്തിൽ മിടിക്കുന്നു. ഒരുമിച്ച് പ്രായമാകാനും നമ്മുടേതെന്ന് വിളിക്കാവുന്നൊരു ലോകം ഒരുമിച്ച് പടുത്തുയർത്താനും. ജീവിതകാലം മുഴുവൻ അതിനപ്പുറവും ഒരേ ടീമായി തുടരുന്നതിനായി ഒരേ ടീമായി മുന്നോട്ട് പോകാം...
കഴിഞ്ഞ കുറച്ച് മാസങ്ങളായി എന്റെ സ്വപ്നവിവാഹം ഞാൻ മനസിൽ കണ്ടതുപോലെ തന്നെ യാഥാർഥ്യമാക്കാൻ അതിശയകരമായ ഒരു കൂട്ടം ആളുകൾ എനിക്കൊപ്പം പ്രവർത്തിച്ചു. ആറ് മാസം മുമ്പ് ഒരു കോടി ആശയങ്ങളുമായാണ് ഞാൻ റെഡ് ഡോട്ട് ഇവന്റ്സ് കമ്പനിയെ സമീപിച്ചത്. എന്റെ സൗന്ദര്യസങ്കൽപ്പങ്ങൾക്കും ഓരോ ചെറിയ കാര്യത്തിലുമുള്ള ശ്രദ്ധയ്ക്കും പ്ലാനിംഗിനും കൃത്യമായി ചേരുന്ന ഒരു ഇവന്റ് കമ്പനിയെയാണ് ഞാൻ തേടിയത്. ലോജിസ്റ്റിക്സ് മുതൽ എന്റെ ഓരോ ഡെക്കർ സ്വപ്നങ്ങളും വരെ നിങ്ങൾ അതിമനോഹരമായി പൂർത്തിയാക്കി. പാതിരാത്രിയിൽ ഞാൻ അയച്ച ഓരോ വോയ്‌സ് നോട്ടും പോലും കൃത്യമായി കേട്ടറിഞ്ഞ് അതനുസരിച്ച് എല്ലാം ഒരുക്കി. നിങ്ങൾ ശരിക്കും അത്ഭുതകരമാണ്...
ഫോട്ടോഗ്രാഫി & ഫിലിംസ് ചെയ്ത മാജിക് മോഷൻ മീഡിയ. നിങ്ങളുടെ പേരിനൊപ്പമുള്ള ‘മാജിക്’ എന്താണെന്ന് എനിക്കിപ്പോൾ ശരിക്കും മനസ്സിലായി. ഇതൊരു മികച്ച ടീമാണ്. രാജ്യത്തെ തന്നെ ഏറ്റവും മികച്ച വെഡ്ഡിംഗ് ഫിലിം കമ്പനികളിലൊന്നിന്റെ ക്യാമറയ്ക്ക് മുന്നിൽ നിൽക്കാൻ കഴിഞ്ഞത് വലിയൊരു ബഹുമതിയാണ്. ഞങ്ങളുടെ ജീവിതകാലം മുഴുവൻ സൂക്ഷിച്ചുവയ്ക്കാനുള്ള മനോഹരമായ നിമിഷങ്ങളും ഓർമ്മകളും അവർ സമ്മാനിച്ചു....
എംലോഫ്റ്റില്‍ നിന്നുള്ളതാണ് എന്റെ വിവാഹ സാരി. എന്റെ ആദ്യത്തെ ചോയ്സ്... ഒടുവിൽ ഏറ്റവും മികച്ച ചോയ്സുമായി മാറി. എന്റെ മനസിൽ ഒരു ചുവപ്പ് നിറമുണ്ടായിരുന്നു. വളരെ പ്രത്യേകമായൊരു ചുവപ്പ്. ജോയൽ ഒരുപാട് പരീക്ഷണങ്ങൾക്കും മാറ്റങ്ങൾക്കും നിർദേശങ്ങൾക്കും ആശയങ്ങൾക്കും നിങ്ങൾ ഇത്രയും തുറന്ന മനസോടെ നിന്നതിന് നന്ദി. ഒടുവിൽ ഞാൻ സ്വപ്നം കണ്ട സാരിയിലേക്ക് നമ്മൾ എത്തിച്ചേർന്നു. എന്റെ മക്കൾക്കും കൊച്ചുമക്കൾക്കും അഭിമാനത്തോടെ കൈമാറാൻ കഴിയുന്നൊരു സാരിയായി അത് മാറി...
താജ് ഗ്രീൻ കോവ് റിസോർട്ട് നല്‍കിയ എന്റെ സ്വപ്ന വേദി. ഞങ്ങളുടെ ഏറ്റവും പ്രിയപ്പെട്ട സ്ഥലം! ഇതിനകം തന്നെ മനോഹരമായ പല ഓർമ്മകളും സൂക്ഷിച്ചിരുന്ന ആ സ്ഥലം, ഇപ്പോൾ ഞങ്ങളുടെ ജീവിതത്തിലെ ഏറ്റവും പ്രധാനപ്പെട്ട ഓർമ്മയുടെ വേദിയായി മാറി.
എന്റെ ബ്ലൗസും നിമിഷിന്റെ സ്യൂട്ടും തുന്നിയത് ഞങ്ങളുടെ പ്രിയപ്പെട്ട സാന്റിനി ആണ്. എപ്പോഴും സ്വയം മെച്ചപ്പെടുത്താനും മികച്ചത് ചെയ്യാനും ആഗ്രഹിക്കുന്ന ഷെയ്‌നിന് നന്ദി...’’ എന്നിങ്ങനെ സുദീര്‍ഘമായ ഒരു കുറിപ്പിനൊപ്പമാണ് അഹാന തന്റെ വിവാഹചിത്രങ്ങള്‍ പങ്കിട്ടിരിക്കുന്നത്. ചുവന്ന പട്ടുസാരിയിൽ ദേവതയെപ്പോലെയാണ് അഹാന കൃഷ്ണ പ്രത്യക്ഷപ്പെട്ടത്. സാരിക്കും മേക്കപ്പ് ലുക്കിനും ഇണങ്ങുന്ന തരത്തിലായിരുന്നു ആഭരണങ്ങളും ഹെയർസ്റ്റൈലും. നിമിഷ് ക്രീം നിറത്തിലുള്ള സ്യൂട്ടാണ് ധരിച്ചത്. നിമിഷ് രവിയ്ക്കൊപ്പമുള്ള വിവാഹചിത്രങ്ങള്‍ക്കൊപ്പം രണ്ടുപേരും ഒരുമിച്ചുള്ള ത്രോബാക്ക് ചിത്രവും അഹാന പങ്കുവച്ചിട്ടുണ്ട്.
ദുൽഖർ സൽമാനായിരുന്നു ചടങ്ങിന് എത്തിയ മുഖ്യാതിഥികളിൽ ഒരാൾ. വിവാഹ ചടങ്ങുകൾ നടക്കുമ്പോൾ ഹോസ്റ്റായി ദുൽഖറും വേദിയിൽ ഉണ്ടായിരുന്നു. മഞ്ജു വാര്യർ, രജിഷ വിജയന്‍, മേഘ്ന രാജ്, പൂര്‍ണ്ണിമ ഇന്ദ്രജിത്ത്, മിയ, സണ്ണി വെയ്ന്‍, മീരാ നന്ദന്‍, സംവൃത സുനില്‍ എന്നിങ്ങനെ തെന്നിന്ത്യൻ സിനിമാ ലോകം ഒന്നാകെ നവദമ്പതിമാര്‍ക്ക് സ്നേഹവും ആശംസയും നല്‍കി പോസ്റ്റില്‍ കമന്റുകള്‍ കുറിക്കുന്നുണ്ട്. വിവാഹ ചിത്രങ്ങളിൽ ഇരുവരും രവിവർമ പെയിന്റ് പോലെയായിരുന്നു കാണപ്പെട്ടതെന്നാണ് സോഷ്യൽമീഡിയയിൽ പ്രത്യക്ഷപ്പെട്ട കമന്റുകൾ. മതപരമായ ചടങ്ങുകൾ ഒന്നും ഉണ്ടായിരുന്നില്ലെന്നാണ് ഫോട്ടോകളില്‍ നിന്ന് മനസ്സിലാകുന്നത്.
Comments