ബോളിവുഡിന്റെ കിംഗ് ഖാന്‍ ഷാരൂഖ് ഖാനെ കാണുക സംസാരിക്കുക ഒരു സെല്‍ഫിയെടുക്കുക എന്നതൊക്കെ ആരാധകരെ സംബന്ധിച്ച് വിലമതിക്കാനാവാത്ത നിമിഷങ്ങളാണ്. നേരിട്ട് കാണാന്‍ കഴിഞ്ഞില്ലെങ്കിലും കിംഗ് ഖാന്‍ തങ്ങളുടെ മെസേജുകള്‍ക്ക് മറുപടി നല്‍കുക എന്നതു പോലും ആരാധകര്‍ ആഘോഷമാക്കാറുണ്ട്. അതുകൊണ്ടു തന്നെ എക്സിലൂടെ തന്റെ ആരാധകരുമായി സംവദിക്കുന്ന ‘എസ് ആർ കെയോട് ചോദിക്കാം’ സെഷൻ പലപ്പോഴും വൈറലായി മാറാറുമുണ്ട്.
ഇപ്പോഴിതാ ഷാരൂഖ് ഖാനൊപ്പമുള്ള ‘ആസ്ക് മീ എനിതിംഗ്’ സെഷനിലെ ഏറ്റവും പുതിയ സംവാദമാണ് സോഷ്യൽ മീഡിയയിൽ തരംഗമാകുന്നത്. പതിവു പോലെ തന്റെ തനതായ ശൈലിയിലും തമാശരൂപേണയുമാണ് കിംഗ് ഖാന്‍ മറുപടി നല്‍കുന്നത്. ക്രിസ്മസ് റിലീസുകളിൽ തന്റെ മകൻ അബ്രാം ഏത് ചിത്രം ആദ്യം കാണുമെന്ന ചോദ്യത്തിനുള്ള താരത്തിന്റെ രസകരമായ മറുപടിയാണ് ആരാധകര്‍ ഏറ്റെടുക്കുന്നത്.
വരുന്ന ക്രിസ്മസ് റിലീസായി തിയറ്ററുകളിലെത്തുന്ന ഷാരൂഖ് ചിത്രം ‘കിംഗ്’, മാർവൽ സിനിമാറ്റിക് യൂണിവേഴ്സിന്റെ ബിഗ് ബജറ്റ് ചിത്രം ‘അവഞ്ചേഴ്സ്: ഡൂംസ്ഡേ’ എന്നിവയിൽ ഏതാണ് മകൻ അബ്രാം ആദ്യം കാണുകയെന്ന ചോദ്യമാണ് സെഷനിൽ ഒരു ആരാധകര്‍ ചോദിച്ചത്.
ഇതിനു മറുപടിയായി, ‘ആദ്യം അച്ഛൻ തന്നെ വരും മക്കളെ...’ എന്നാണ് തന്റെ തനതായ ശൈലിയില്‍ തമാശരൂപേണ ഷാരൂഖ് മറുപടി നല്‍കിയത്.
സത്യസന്ധമായി പറയൂ, യഥാർത്ഥ ജീവിതത്തിൽ നിങ്ങൾ ചെയ്യുന്ന ഏറ്റവും ‘കിംഗ്’ കാര്യം ഏതാണ്? എന്ന ചോദ്യവും ഒരു ആരാധകന്‍ ചോദിച്ചു.
‘‘ജോലിക്ക് വൈകിയാൽ പോലും ആരെങ്കിലും എന്നോട് സംസാരിക്കുന്നതിന് മുൻപ് കിടക്കയിൽ കിടന്ന് തന്നെ മൂന്ന് കപ്പ് കാപ്പി കുടിക്കും...പിന്നെ സ്വാഭാവികമായും സെറ്റിൽ വെച്ച് വൈകിയെത്തിയതിന് വഴക്ക് കേൾക്കേണ്ടി വരും, അപ്പോൾ ആ ‘രാജകീയ’ ഭാവമൊന്നും ബാക്കിയുണ്ടാവില്ല താനും...’’എന്നായിരുന്നു തമാശനിറച്ചുള്ള ഷാരൂഖിന്റെ മറുപടി.
രൺവീർ സിംഗ് കേന്ദ്രകഥാപാത്രമായെത്തിയ ‘ധുരന്ധർ’ എന്ന സിനിമയെക്കുറിച്ചുള്ള അഭിപ്രായവും കിംഗ് ഖാനോട് ചോദിച്ചിട്ടുണ്ട്. ആദിത്യ ധർ സംവിധാനം ചെയ്ത സ്പൈ ആക്ഷൻ ത്രില്ലർ ചിത്രമായ ‘ധുരന്ധർ’, ഇതിന്റെ രണ്ടാം ഭാഗമായ ‘ധുരന്ധർ: ദി റിവഞ്ച്’ എന്നിവ കണ്ടോ എന്നായിരുന്നു ആരാധകന്റെ ചോദ്യം. ‘ഇരു ഭാഗങ്ങളും ഞാന്‍ കണ്ടു, വളരെയധികം ഇഷ്ടപ്പെട്ടു. ചിത്രത്തിന്റെ അണിയറപ്രവർത്തകർ ഒന്നടങ്കം മികച്ച പ്രകടനമാണ് കാഴ്ചവെച്ചിട്ടുള്ളത്...’ എന്നായിരുന്നു ഷാരൂഖിന്റെ മറുപടി.
ഡിസംബർ 18-നാണ് മാർവലിന്റെ ബിഗ് ബജറ്റ് ചിത്രമായ 'അവഞ്ചേഴ്സ്: ഡൂംസ്ഡേ' ആഗോളതലത്തിൽ തിയറ്ററുകളിലെത്തുന്നത്. തൊട്ടുപിന്നാലെ ഡിസംബർ 24-ന് ക്രിസ്മസ് സമ്മാനമായി ഷാറുഖ് ഖാന്റെ 'കിംഗ്' പ്രേക്ഷകരിലേക്ക് എത്തും. ഹോളിവുഡ് ചിത്രങ്ങളുടെ വമ്പൻ നിരയ്ക്കിടയിലും തന്റെ ചിത്രത്തിന്റെ റിലീസ് മാറ്റിവെക്കില്ലെന്നും ക്രിസ്മസ് അവധിക്കാലത്ത് പ്രേക്ഷകർക്ക് ആസ്വദിക്കാൻ പറ്റിയ മികച്ച വിരുന്നായിരിക്കും ഇതെന്നും അദ്ദേഹം വ്യക്തമാക്കി. മകൾ സുഹാന ഖാനൊപ്പം ഷാറുഖ് ആദ്യമായി ബിഗ് സ്ക്രീൻ പങ്കിടുന്നു എന്ന പ്രത്യേകതയും സിദ്ധാർഥ് ആനന്ദ് നിർമിക്കുന്ന ഈ ചിത്രത്തിനുണ്ട്.
Comments