രാവിലെ ഓഫീസിലെത്തുമ്പോൾ പാർക്കിങ് ഏരിയയുടെ ഭൂരിഭാഗവും കാറുകളാൽ നിറഞ്ഞുകിടക്കുന്നത് കണ്ടാൽ ഇന്ത്യയിൽ നിന്നെത്തിയ ഒരാൾക്ക് അൽപം അമ്പരപ്പ് തോന്നിയേക്കാം. സ്വീഡനിലെത്തിയ ഇന്ത്യൻ യുവതിക്കും സംഭവിച്ചത് അതുതന്നെ. രാവിലെ 7.45ന് ഓഫീസിലെത്തിയപ്പോൾ തന്നെ പാർക്കിങ് ഏരിയ 70 ശതമാനത്തോളം നിറഞ്ഞിരുന്നു.
സ്വീഡനിൽ ജോലി ചെയ്യുന്ന സ്വാതി എന്ന യുവതിയാണ് ഇൻസ്റ്റഗ്രാമിൽ പങ്കുവെച്ച വീഡിയോയിലൂടെ ഈ അനുഭവം വിവരിച്ചത്. രാവിലെ 7.45ന് താൻ ഓഫീസിലെത്തിയപ്പോൾ പാർക്കിങ് ഏരിയ ഇതിനോടകം 70 ശതമാനം നിറഞ്ഞിരുന്നുവെന്നും, ഇന്ത്യയിൽ താൻ പരിചയപ്പെട്ടിരുന്ന ഓഫീസ് സമയവുമായി താരതമ്യം ചെയ്യുമ്പോൾ ഇത് വലിയൊരു സാംസ്കാരിക വ്യത്യാസമായി തോന്നിയെന്നും യുവതി പറഞ്ഞു.
സ്വീഡനിലെ പല ജീവനക്കാരും നേരത്തെ ജോലി ആരംഭിക്കുന്നതിന്റെ മറ്റൊരു വശവും യുവതി ചൂണ്ടിക്കാട്ടി. നേരത്തെ ഓഫീസിലെത്തുന്നവർ ജോലി നേരത്തെ പൂർത്തിയാക്കി വൈകുന്നേരം കുടുംബത്തോടൊപ്പം സമയം ചെലവഴിക്കാൻ ശ്രമിക്കുന്നതാണ് ഈ രീതിക്ക് പിന്നിലെന്നാണ് അവർ വിശദീകരിച്ചത്. ജോലി സമയവും വ്യക്തിജീവിതവും തമ്മിലുള്ള സന്തുലിതാവസ്ഥയെക്കുറിച്ചുള്ള ചർച്ചകൾക്കും വീഡിയോ വഴിവെച്ചു.
ഇന്ത്യയിലും യൂറോപ്പിലും ജോലി സമയവുമായി ബന്ധപ്പെട്ട് തങ്ങൾക്ക് ഉണ്ടായിട്ടുള്ള അനുഭവങ്ങൾ നിരവധി പേരാണ് കമന്റ് ബോക്സിൽ പങ്കുവെച്ചത്. ഓഫീസിലെത്തുന്ന സമയം മാത്രമല്ല, ജോലി നേരത്തെ തുടങ്ങി നേരത്തെ അവസാനിപ്പിക്കുന്ന രീതിയും രാജ്യങ്ങൾക്കിടയിലെ തൊഴിൽ സംസ്കാരത്തിലെ വ്യത്യാസമായി മാറിയിരിക്കുകയാണ്. സ്വാതിയുടെ ചെറിയൊരു ‘കൾച്ചറൽ ഷോക്ക്’ വീഡിയോയാണ് ഇപ്പോൾ സമൂഹമാധ്യമങ്ങളിൽ ശ്രദ്ധ നേടുന്നത്.
Comments