ചെന്നൈ: തമിഴ്നാട് മുന്‍ സ്‌കൂള്‍ വിദ്യാഭ്യാസ മന്ത്രിയും ഡിഎംകെ നേതാവുമായ അന്‍പില്‍ മഹേഷിന്റെ വീട്ടില്‍ റെയ്ഡ്. സ്വകാര്യ സ്‌കൂളുകളുമായി ബന്ധപ്പെട്ട 100 കോടി രൂപയുടെ തട്ടിപ്പ് കേസില്‍ മുന്‍മന്ത്രിയുടെ തിരുച്ചിരപ്പള്ളിയിലെ വസതിയില്‍ ഇന്ന് രാവിലെയാണ് ് സെന്‍ട്രല്‍ ക്രൈംബ്രാഞ്ച് റെയ്ഡ് നടത്തിയത്.
സര്‍ക്കാര്‍ അംഗീകാരങ്ങളും അനുമതികളും വാഗ്ദാനം ചെയ്ത് സ്വകാര്യ സ്‌കൂള്‍ മാനേജ്മെന്റുകളില്‍ നിന്ന് വന്‍ തുക പിരിച്ചെന്ന കേസിന്റെ അന്വേഷണത്തിന്റെ ഭാഗമായാണ് പരിശോധന. രാഷ്ട്രീയവേട്ട എന്നാണ് ഡിഎംകെ പ്രതികരിച്ചിരിക്കുന്നത്. റെയ്ഡ് നടക്കുമ്പോള്‍ അന്‍പില്‍ മഹേഷിന്റെ വസതിക്ക് പുറത്ത് നിരവധി ഡിഎംകെ പ്രവര്‍ത്തകര്‍ തടിച്ചുകൂടിയെങ്കിലും പോലീസ് തടഞ്ഞു.
ഈ കേസില്‍ ഡിഎംകെ ഭാരവാഹിയായ ബി.ടി. അരശകുമാറിനെ ക്രൈംബ്രാഞ്ച് ജൂണില്‍ അറസ്റ്റ് ചെയ്തിരുന്നു. അംഗീകാരങ്ങളും മറ്റ് നിയമപരമായ ക്ലിയറന്‍സുകളും നേടിത്തരാമെന്ന് വാഗ്ദാനം ചെയ്ത് പല സ്‌കൂള്‍ മാനേജ്മെന്റുകളില്‍ നിന്നും 100 കോടി രൂപയിലധികം പിരിച്ചെടുത്തതായി പോലീസ് ആരോപിക്കുന്നു. തമിഴ്നാട് പ്രൈവറ്റ് സ്‌കൂള്‍സ് അസോസിയേഷന്‍ എന്ന പേരില്‍ രജിസ്റ്റര്‍ ചെയ്യാത്ത ഒരു സംഘടന നടത്തിയിരുന്ന അരശകുമാര്‍, സ്വകാര്യ സ്‌കൂളുകള്‍ക്ക് അനുമതി ലഭിക്കുന്നതിന് തന്റെ രാഷ്ട്രീയ-ഔദ്യോഗിക ബന്ധങ്ങള്‍ ഉപയോഗിക്കാമെന്ന് അവകാശപ്പെട്ടിരുന്നു. സ്ഥിരമായ അംഗീകാരം, ഗ്രേഡ് നവീകരണം, വിവിധ സര്‍ക്കാര്‍ ഏജന്‍സികളില്‍ നിന്നുള്ള അനുമതികള്‍ എന്നിവ ഇതില്‍ ഉള്‍പ്പെടുന്നു.
റിപ്പോര്‍ട്ടുകള്‍ പ്രകാരം, 2024 ഡിസംബറില്‍ നടന്ന ഈ സംഘടനയുടെ ഉദ്ഘാടനച്ചടങ്ങില്‍ അന്നത്തെ സ്‌കൂള്‍ വിദ്യാഭ്യാസ മന്ത്രി അന്‍പില്‍ മഹേഷും സ്‌കൂള്‍ വിദ്യാഭ്യാസ വകുപ്പിലെ മുതിര്‍ന്ന ഉദ്യോഗസ്ഥരും പങ്കെടുത്തിരുന്നു. സ്വകാര്യ സ്‌കൂള്‍ മാനേജ്മെന്റുകളില്‍ നിന്ന് ധാരാളം പരാതികള്‍ ലഭിച്ചതിനെ തുടര്‍ന്നാണ് അന്വേഷണം. അരശകുമാറിന്റെ അറസ്റ്റിനെ തുടര്‍ന്ന്, തമിഴ്നാട് പോലീസ് പിന്നീട് അദ്ദേഹത്തിനെതിരെ ഗുണ്ടാനിയമം ചുമത്തിയിരുന്നു.
Comments