തമിഴകത്തിനു ഏറെ പ്രിയപ്പെട്ട മാതൃക താര ദമ്പതിമാരാണ് സൂര്യയും ജ്യോതികയും. പരസ്പരം കരുത്തും പിന്തുണയും നൽകി കരിയറിലും വ്യക്തിജീവിതത്തിലും ഒരുപോലെ തിളങ്ങി നിൽക്കുന്ന താരദമ്പതിമാർ. സിനിമയില്‍ സഹതാരങ്ങളായി തുടങ്ങിയ അവരുടെ ബന്ധം പിന്നീട് അടുത്ത സൗഹൃദത്തിലേക്കും പ്രണയത്തിലേക്കും വളർന്നു. ഒരുമിച്ച്‌ അഭിനയിച്ച സിനിമകളിലൂടെ പ്രേക്ഷകരുടെ പ്രിയപ്പെട്ട ഓണ്‍-സ്‌ക്രീൻ ജോഡിയായ ഇരുവരും പിന്നീട് ജീവിതത്തിലും ഒരുമിച്ച്‌ നടക്കാൻ തീരുമാനിക്കുകയായിരുന്നു. ഇവർ രണ്ടാളും ഒരുമിച്ചു ജീവിതം തുടങ്ങിയിട്ട് രണ്ടു പതിറ്റാണ്ടു പൂർത്തിയായിരിക്കുകയാണ്.
ഇപ്പോഴിതാ തങ്ങളുടെ ഇരുപത് വർഷത്തെ ദാമ്പത്യ ജീവിതം പവിത്രമായി ആഘോഷിക്കുകയാണ് സൂര്യയും ജ്യോതികയും. രണ്ടു പതിറ്റാണ്ടു തികഞ്ഞ ദാമ്പത്യത്തെ താരങ്ങള്‍ മനോഹരമായി ആഘോഷിച്ചത് തങ്ങളുടെ വിവാഹ വാഗ്ദാന പുതുക്കല്‍ ചടങ്ങ് പാശ്ചാത്യ ശൈലിയില്‍ നടത്തിയാണ്.
ദമ്പതികളുടെ വിവാഹ വാർഷികത്തോടനുബന്ധിച്ച്‌ നടന്ന ചര്‍ച്ച് വെഡ്ഡിംഗില്‍ മക്കളായ ദിയയും ദേവുമാണ് മുൻപന്തിയിൽ ഉണ്ടായിരുന്നത്. അമ്മയെ കൈപിടിച്ചു അച്ഛന്റെ അരികിലേക്ക് കൊണ്ടു വരുന്നത് മകൻ ദേവാണെങ്കില്‍ ആ സമയം അച്ഛനൊപ്പം നിൽക്കുന്നത് മകൾ ദിയയാണ്. സ്കോട്ട്‌ലെൻഡിലെ ഒരു കൊട്ടാരത്തില്‍ വച്ചാണ് ആഘോഷങ്ങള്‍ നടന്നിരിക്കുന്നത്. ‘ദി സീക്വല്‍ ഞങ്ങളുടെ ഇരുപത് വർഷത്തെ പ്രണയത്തിന്റെയും പോരാട്ടത്തിന്റെയും ഓർമ്മ പുതുക്കല്‍’ എന്നാണ് ഈ ചടങ്ങിനെക്കുറിച്ച്‌ ജ്യോതിക കുറിച്ചിരിക്കുന്നത്.
‘‘അടുത്ത അധ്യായം...
ഞങ്ങളുടെ പ്രണയത്തിന്റെയും പോരാട്ടങ്ങളുടെയും ഇരുപത് വർഷങ്ങൾ ആഘോഷിച്ചുകൊണ്ട്, പരസ്പരമുള്ള പ്രതിജ്ഞകൾ പുതുക്കുന്നു.
ഇതൊരു ‘തികഞ്ഞ’ ദാമ്പത്യത്തിന്റെ ആഘോഷമല്ല. മറിച്ച്, അപൂർണ്ണതകളുടെയും വിട്ടുവീഴ്ചകളുടെയും പരസ്പര ധാരണയുടെയും ത്യാഗങ്ങളുടെയും നിസ്വാർത്ഥമായ സ്നേഹത്തിന്റെയും ആഘോഷമാണ്. ഇത് ‘നമ്മുടെ’ ആഘോഷമാണ്; നമ്മൾക്കു വേണ്ടി നമ്മൾ മാറിയതിന്റെ ആഘോഷം.
ഈ ദിവസം ഇതാണ് എന്റെ പ്രതിജ്ഞകള്‍: സന്തോഷവതിയായിരിക്കുമെന്ന് ഞാൻ പ്രതിജ്ഞ ചെയ്യുന്നു - കാരണം ജീവിതത്തിന്റെ നല്ല വശങ്ങള്‍ മാത്രം കാണാനാണ് ഞാൻ ആഗ്രഹിക്കുന്നത്. ജീവിതം ആഘോഷിക്കുമെന്ന് ഞാൻ പ്രതിജ്ഞ ചെയ്യുന്നു - കാരണം, തന്നെക്കാള്‍ ഉപരിയായി നമ്മളെ ബഹുമാനിക്കുന്ന ഒരാളോടൊപ്പമുള്ള ജീവിതം ഒരു വലിയ സമ്മാനമാണ്. ഒരിക്കലും പരാതിപ്പെടില്ലെന്ന് ഞാൻ പ്രതിജ്ഞ ചെയ്യുന്നു - എന്തിനാണ് പരാതിപ്പെടുന്നത്? ആകാശത്തിന് പോലും ഭൂമിയെ സ്പർശിക്കാനുള്ള ഭാഗ്യമില്ലല്ലോ! ചുറ്റും നോക്കൂ, നിലനില്‍ക്കുന്നതെല്ലാം അപൂർണ്ണമാണ്; ആ വിടവുകള്‍ നമ്മള്‍ എങ്ങനെ നികത്തുന്നു എന്നതിലാണ് കാര്യം.
നന്ദിയുള്ളവളായിരിക്കുമെന്ന് ഞാൻ പ്രതിജ്ഞ ചെയ്യുന്നു - കാരണം, എന്നെ സംരക്ഷിക്കുന്ന ഒരാളുടെ കൈകളില്‍ ചേർന്ന് ഉണരുന്ന ഓരോ പ്രഭാതത്തിനും, എന്റെ ജീവിതത്തിന് അർത്ഥവും ജീവിക്കാനുള്ള കാരണവും നല്‍കിയ എന്റെ മനോഹരമായ മക്കള്‍ക്കും ഞാൻ നന്ദിയുള്ളവളാണ്. ആരോഗ്യവതിയായിരിക്കുമെന്ന് ഞാൻ പ്രതിജ്ഞ ചെയ്യുന്നു - കാരണം നമ്മള്‍ കെട്ടിപ്പടുക്കുന്ന ഒരേയൊരു യഥാർത്ഥ സമ്പത്ത് അതാണ്. എത്ര മനോഹരമായ വീടാണെങ്കിലും അതില്‍ ചോർച്ചയോ ചിതലോ അറ്റകുറ്റപ്പണികളോ ഉണ്ടാകുമല്ലോ. ഏറ്റവും മികച്ച അമ്മയായിരിക്കുമെന്ന് ഞാൻ പ്രതിജ്ഞ ചെയ്യുന്നു - ഭക്ഷണം പാകം ചെയ്യുന്നതുകൊണ്ടോ വീട് വൃത്തിയാക്കുന്നതുകൊണ്ടോ സഹായിക്കുന്നതുകൊണ്ടോ അല്ല, മറിച്ച് എന്റെ പുഞ്ചിരിയിലൂടെ; എന്റെ അച്ഛനും അമ്മയും ജീവിച്ച ജീവിതകഥ വീണ്ടും ജീവിക്കാൻ എന്റെ മക്കള്‍ക്ക് ആഗ്രഹം തോന്നിപ്പിക്കുന്ന അത്രയും മനോഹരമായ ഒരു പുഞ്ചിരിയിലൂടെ.
എന്റെ സൂര്യ, ഞാൻ വാക്ക് നല്‍കുന്നു: വഴക്കിടുകയും പിന്നീട് ഇണങ്ങിച്ചേരുകയും ചെയ്തുകൊണ്ട്, ഓരോ തവണയും നിന്നോട് കൂടുതല്‍ അടുക്കുന്ന ആ ‘അപൂർണ്ണയായ’ ഭാര്യയായി ഞാൻ എന്നും തുടരും. നമ്മുടെ സൗഹൃദത്തെ ഏറ്റവും വിലമതിക്കുമെന്ന് ഞാൻ പ്രതിജ്ഞ ചെയ്യുന്നു - കാരണം, ഭർത്താവായും മക്കളുടെ അച്ഛനായും കൂടെയുള്ള ഒരാളില്‍ തന്നെ തുല്യ പങ്കാളിയെയും, രഹസ്യങ്ങള്‍ പങ്കുവെക്കുന്ന ആളെയും, വിശേഷങ്ങള്‍ പങ്കുവെക്കുന്ന കൂട്ടുകാരനെയും, ഏറ്റവും അടുത്ത സുഹൃത്തിനെയും കണ്ടെത്തുക എന്നത് അപൂർവ്വമായ കാര്യമാണ്. അതിനാല്‍, തികഞ്ഞ പരസ്പര ധാരണയോടെയുള്ള നമ്മുടെ അടുത്ത ഇരുപത് വർഷങ്ങള്‍ക്കായി നമുക്ക് കാത്തിരിക്കാം - അപൂർണ്ണരായ നമ്മള്‍, എന്നാല്‍ പൂർണ്ണമായ ധാരണയുള്ളവർ... ജീവിതത്തില്‍ ഒരിക്കലും പരാതിപ്പെടില്ലെന്നും, തന്നെ സ്‌നേഹിക്കുകയും സംരക്ഷിക്കുകയും ചെയ്യുന്ന പങ്കാളിയെയും ജീവിതത്തിന് അർത്ഥം നല്‍കിയ മക്കളെയും ലഭിച്ചതില്‍ എപ്പോഴും നന്ദിയുള്ളവളാണ്... " എന്നാണ് വിവാഹചിത്രങ്ങളും വീഡിയോയും പങ്കിട്ട് ജ്യോതിക കുറിച്ചിരിക്കുന്നത്.
വീഡിയോയില്‍ സൂര്യയും ജ്യോതികയും ഒരു പള്ളിയില്‍ വച്ച്‌ വിവാഹവാഗ്ദാനങ്ങള്‍ പുതുക്കുന്നതായി കാണാം. മക്കളായ ദിയയും ദേവും, സൂര്യയുടെ സഹോദരനും നടനുമായ കാർത്തിയും മറ്റ് കുടുംബാംഗങ്ങളും അടുത്ത സുഹൃത്തുക്കളും ചടങ്ങില്‍ പങ്കെടുത്തിട്ടുണ്ട്. ചടങ്ങില്‍ വെള്ള നിറത്തിലുള്ള ഗൗണാണ് ജ്യോതിക ധരിച്ചത്. വെള്ള സ്യൂട്ട് ജാക്കറ്റും കറുത്ത പാന്റ്സും ധരിച്ചായിരുന്നു സൂര്യയുടെ എന്‍ട്രി.
2006 സെപ്തംബറിലായിരുന്നു മലയാളികളുടെയും തമിഴകത്തിന്റെയും പ്രിയ താരങ്ങളായ സൂര്യയുടെയും ജ്യോതികയുടെയും വിവാഹം. സൂര്യയും ജ്യോതികയും ആദ്യമായി ഒരുമിച്ച്‌ അഭിനയിച്ചത് വസന്ത് സംവിധാനം ചെയ്ത 1999-ലെ ‘പൂവെല്ലാം കേട്ടുപ്പാർ’ എന്ന ചിത്രത്തിലാണ്. തുടർന്ന് ഉയിരിലെ കലന്തതു, കാക്ക കാക്ക, പെരഴകൻ, മായാവി, സില്ലിനു ഒരു കാതല്‍ തുടങ്ങിയ സിനിമകളിലും ഇരുവരും ഒന്നിച്ച്‌ അഭിനയിച്ചു.
വിവാഹത്തിന് ശേഷം ജ്യോതിക സിനിമയില്‍ നിന്ന് കുറച്ച്‌ വർഷങ്ങള്‍ വിട്ടുനിന്നു. കുടുംബത്തിന് കൂടുതല്‍ സമയം നല്‍കാനായിരുന്നു അന്നത്തെ ജ്യോതികയുടെ. 2015-ല്‍ സംവിധായകൻ റോഷൻ ആൻഡ്രൂസിന്റെ ‘36 വയതിനിലെ’ എന്ന ചിത്രത്തിലൂടെയാണ് ജ്യോതിക വീണ്ടും അഭിനയരംഗത്തേക്ക് തിരിച്ചെത്തിയപ്പോള്‍ ഏറ്റുവമധികം സന്തോഷിച്ചതും പിന്തുണയും കരുത്തും നല്‍കിയതും സൂര്യയാണ്.
Comments