വസ്ത്രാലങ്കാരത്തിലൂടെ സിനിമയുടെ അണിയറയിലെത്തി പിന്നീട് ഹാസ്യരസമുള്ള കഥാപാത്രങ്ങള്‍ ചെയ്ത് പ്രേക്ഷകരെ ചിരിപ്പിച്ചും ക്യാരക്ടര്‍ റോളുകളിലൂടെ പിന്നീട് കരയിപ്പിച്ചും ചിന്തിപ്പിച്ചുമൊക്കെ മലയാളികളുടെ വീട്ടിലെ ഒരംഗമായി മാറിയ താരമാണ് ഇന്ദ്രന്‍സ്. മികച്ച നടനുള്ള സംസ്ഥാന ചലച്ചിത്ര പുരസ്‌കാരത്തിന് പുറമെ ദേശീയ-രാജ്യാന്തര പുരസ്‌കാരങ്ങളും നേടിയ താരം കേരളത്തിന്റേയും മലയാളത്തിന്റേയും അഭിമാനം രാജ്യത്തിന് പുറത്തും ഉയര്‍ത്തിപ്പിടിച്ച പ്രതിഭ കൂടിയാണ്.
അന്യഭാഷകളിലടക്കം ശ്രദ്ധ നേടിയ ഇന്ദ്രസിന്റെ അഭിനയമികവിനൊപ്പം പല താരങ്ങളും എടുത്തു പറയുന്ന ഒന്നാണ് താരത്തിന്റെ വിനയം നിറഞ്ഞ പെരുമാണ്ണം. മറ്റു ഭാഷകളിലും ഇന്ദ്രസിനൊപ്പമഭിനയിച്ച മിക്ക താരങ്ങളും പൊതുവേദിയിലടക്കം പറയാറുള്ളത് താരത്തിന്റെ വിനയത്തെക്കുറിച്ചാണ്. സൂപ്പര്‍സ്റ്റാറുകളെപ്പറ്റി പറയുമ്പോള്‍ താരത്തിന്റെ വാക്കുകളിലും ചലനങ്ങളിലും എന്തിന് ചിരിയിലടക്കം ആ വിനയം തെളിഞ്ഞു നില്‍ക്കാറുണ്ട്.
ഇപ്പോഴിതാ സൂപ്പര്‍സ്റ്റാര്‍ സുരേഷ്ഗോപിയും താനും തമ്മിലുള്ള വലിയൊരു ആത്മബന്ധത്തെക്കുറിച്ച് പറയുകയാണ് ഇന്ദ്രന്‍സ്. സുരേഷ് ഗോപി തനിക്ക് മുതിര്‍ന്ന സഹോദരനെ പോലെയാണെന്നാണ് ഇന്ദ്രന്‍സ് പറയുന്നത്. സിനിമയില്‍ വസ്ത്രാലങ്കാരം ചെയ്തിരുന്ന കാലം മുതലുള്ള അടുപ്പമാണെന്നും താന്‍ തുന്നിയ ഷര്‍ട്ട് പുതച്ചാണ് സുരേഷ് ഗോപിയുടെ മകളെ യാത്രയാക്കിയതെന്നും ഇന്ദ്രന്‍സ് പറയുന്നു. മുമ്പൊരിക്കല്‍ സിനിമാ രംഗത്തെ ഏറ്റവും പച്ചയായ മനുഷ്യനാണ് ഇന്ദ്രന്‍സ് എന്ന് സുരേഷ് ഗോപി പറഞ്ഞിട്ടുള്ളതിനെക്കുറിച്ച് അവതാരക ചോദിച്ചപ്പോഴാണ് താരം മനസ്സു തുറന്നത്.
‘‘വളരെ വളരെ വലിയ ബന്ധമാണ്. കോസ്റ്റ്യും ചെയ്യുന്ന കാലത്ത് പൊന്നുച്ചാമി എന്ന സിനിമയുടെ സമയത്താണ് അദ്ദേഹത്തെ പരിചയപ്പെടുന്നത്. ഒരുപാട് പടങ്ങളില്‍ ഒരുമിച്ച് അഭിനയിച്ചു. കുടുംബമായിട്ടും നല്ല അടുപ്പമാണ്. കാണുമ്പോള്‍ കുറച്ച് നേരം മിണ്ടാതെ നില്‍ക്കും, പിന്നെ കെട്ടിപ്പിടിക്കും, വിശേഷങ്ങള്‍ ചോദിക്കും. അങ്ങനെയുള്ളൊരു ബന്ധമാണ്. അതിനുള്ള കാരണം എനിക്ക് അറിയില്ല.
അതിനകത്തൊരു നോവ് കിടപ്പുണ്ട്. തയ്യല്‍ക്കാരനെ സംബന്ധിച്ച് ഉണ്ടാകുന്നൊരു നോവും കൂടെയാണ്. ഒരു സിനിമ ചെയ്യുമ്പോള്‍ സാര്‍ കോസ്റ്റ്യും ഇട്ടുകൊണ്ട് വീട്ടില്‍ പോയി. കരുതി വെക്കേണ്ടത് നമ്മളാണ്. അടുത്ത ദിവസം കൊടുക്കേണ്ടതല്ലേ. ഞാന്‍ രാവിലെ കൊണ്ടുവരാമെന്ന് സാര്‍ പറഞ്ഞു. രാവിലെ വന്നപ്പോള്‍ മോള്‍ക്ക് ആ ഷര്‍ട്ട് ഭയങ്കര ഇഷ്ടപ്പെട്ടെടാ, അച്ഛന് നന്നായി ചേരുമെന്ന് പറഞ്ഞു, പോകുമ്പോള്‍ നീ എനിക്കിത് തരണേ എന്ന് അദ്ദേഹം പറഞ്ഞു.
പടം തീര്‍ന്നപ്പോള്‍ ഷര്‍ട്ട് സാര്‍ കൊണ്ടുപോയി. പെട്ടെന്ന് ഒരു അപകടത്തില്‍ ആ കുഞ്ഞ് മരിച്ചു പോയി. അടുത്ത സിനിമയുടെ സെറ്റിലേക്ക് വന്നപ്പോള്‍ സാര്‍ വേറൊരു ആളായിരുന്നു. നീ തന്ന ഷര്‍ട്ട് ഞാന്‍ മോള്‍ക്ക് പുതച്ചു കൊടുത്തെടാ, അവള്‍ക്ക് ഇഷ്ടപ്പെട്ടതല്ലേ എന്ന് പറഞ്ഞു. അത് വല്ലാത്തൊരു വേദനയായി. ഞങ്ങള്‍ തമ്മില്‍ എന്തോ ഒരു ബന്ധമുണ്ട്. മുതിര്‍ന്ന സഹോദരനെ പോലെയാണ് അദ്ദേഹം...’’ ഇന്ദ്രന്‍സ് പറഞ്ഞു. ഒരു യൂട്യൂബ് ചാനലിന് നല്‍കിയ അഭിമുഖത്തിലാണ് താരമിത് പറഞ്ഞത്.
ഒരു സിനിമയുടെ സെറ്റിൽ വെച്ച് ഇന്ദ്രൻസ് തുന്നിക്കൊടുത്ത, സുരേഷ് ഗോപിക്കേറെ പ്രിയപ്പെട്ട ഒരു മഞ്ഞ ഷർട്ട് പുതപ്പിച്ചാണ് തന്റെ മകള്‍ ലക്ഷ്മിയെ യാത്രയാക്കിയതെന്ന് സുരേഷ് ഗോപിയും വെളിപ്പെടുത്തിയിരുന്നു.
‘‘ഇന്ദ്രന്‍സ് പണ്ട് സിനിമയില്‍ വസ്ത്രാലങ്കാരകനായിരുന്നു. എന്റെ ഒരുപാട് സിനിമകളില്‍ അദ്ദേഹം വസ്ത്രാലങ്കാരം നിര്‍വ്വഹിച്ചിട്ടുണ്ട്. എന്റെ ജീവിതത്തില്‍ ഒരു വലിയ, തുന്നിപിടിപ്പിച്ച ബന്ധമുണ്ട് ഇന്ദ്രന്‍സിന്. സുരേഷ് ഉണ്ണിത്താന്‍ സര്‍ സംവിധാനം ചെയ്ത ഉത്സവമേളം എന്ന സിനിമയില്‍ ഞാന്‍ ധരിച്ചിരിയ്ക്കുന്ന ഷര്‍ട്ടുകളെല്ലാം ഇന്ദ്രന്‍സ് തുന്നി തന്നതാണ്. ആ സിനിമയില്‍ ഒരു രംഗത്ത് ഞാനിടുന്ന മഞ്ഞ ഷര്‍ട്ടുണ്ട്. മഞ്ഞയില്‍ നേര്‍ത്ത വരകളുള്ള ഒരു ഷര്‍ട്ട്. മഞ്ഞ നിറത്തോടുള്ള എനിക്കുള്ള ഭ്രമം കാരണം അന്ന് മമ്മൂട്ടി അടക്കമുള്ളവര്‍ എന്നെ വിളിച്ചിരുന്നത് മഞ്ഞന്‍ എന്നായിരുന്നു.
ഷൂട്ടിങ് നടന്നുകൊണ്ടിരിക്കുമ്പോള്‍, ഈ ഷര്‍ട്ട് കൊണ്ടു വന്നപ്പോള്‍ ഞാന്‍ ഇന്ദ്രന്‍സിനോട് പറഞ്ഞു ഈ ഷര്‍ട്ട് എനിക്ക് കൊണ്ടു പോകാന്‍ തരണേ എന്ന്. ഷൂട്ടിങ് കഴിഞ്ഞ് പോവുമ്പോള്‍ ആ ഷര്‍ട്ട് പൊതിഞ്ഞ് ഇന്ദ്രന്‍സ് എനിക്ക് കൊണ്ടു തന്നു. ആ ഷര്‍ട്ട് ഞാന്‍ ഇടയ്ക്കിടെ ധരിക്കുമായിരുന്നു. 1992 ജൂണ്‍ 6 ന് എന്റെ മകളെയും ഭാര്യയെയും അനിയനെ ഏല്‍പിച്ച് എറണാകുളത്ത് വന്ന്, തിരിച്ച് പോകുന്ന വഴിക്കാണ് മകളുടെ അപകടം അറിയുന്നത്. പിന്നെ അവളില്ല. അന്ന് ഞാനിട്ടിരുന്നത് ഈ ഷര്‍ട്ടാണ്. നേരെ ആശുപത്രിയില്‍ പോയി. അവിടെയുള്ള കാര്യങ്ങളൊക്കെ നോക്കി. പിറ്റേ ദിവസം അടക്കത്തിന് അവളെ പെട്ടിയില്‍ കൊണ്ട് വന്ന് വച്ചപ്പോള്‍ ആ ഷര്‍ട്ട് ഊരി ഞാനവളുടെ മുഖമടക്കി മൂടി. എന്റെ വിയര്‍പ്പ് എപ്പോഴും അത്രമേല്‍ ഇഷ്ടപ്പെടുന്ന മകളാണ് ലക്ഷ്മി. അവളിന്ന് ഉറങ്ങുന്നത് ഇന്ദ്രന്‍സ് തന്ന ആ ഷര്‍ട്ടിന്റെ ചൂടിലാണ്...’’ എന്നാണ് കോടീശ്വരന്‍ പരിപാടിയില്‍ അവതാരകനായിരിക്കെ ഇന്ദ്രന്‍സുമായുള്ള കണ്ണ് നനയ്ക്കുന്ന ആ ബന്ധത്തെ കുറിച്ച് സുരേഷ് ഗോപി അന്ന് പറഞ്ഞത്.
Comments