കൊച്ചി: ഇന്ന് പുലര്‍ച്ചെ കൊച്ചിയില്‍ അറസ്റ്റിലായ റിപ്പോര്‍ട്ടര്‍ടിവി എംഡി ആന്റോ അഗസ്റ്റിന്റെ വയനാട്ടിലെ വീട്ടില്‍ നിന്നും 138 മദ്യക്കുപ്പികള്‍ പിടിച്ചതായി എഫ്ഐആറില്‍. ഏകദേശം 67 ലിറ്റര്‍ മദ്യം വരും. ആന്റോയ്ക്ക് എതിരേ നിയമവിരുദ്ധമായ മദ്യക്കടത്തും കൈവശം വെയ്ക്കലും അനധികൃത മദ്യവില്‍പ്പന, വില്‍പനയ്ക്കായി മദ്യം സൂക്ഷിക്കല്‍, നികുതിവെട്ടിച്ച് മദ്യം കൈവശം വെയ്ക്കല്‍ തുടങ്ങിയവയാണ് ചുമത്തിയിരിക്കുന്ന കുറ്റങ്ങള്‍.
അതേസമയം എങ്ങനെയാണ് വീട്ടില്‍ മദ്യശേഖരമെത്തിയതെന്ന് അറിയില്ല. താന്‍ ജീവിതത്തില്‍ മദ്യപിച്ചിട്ടില്ലെന്നായിരുന്നു എക്‌സൈസ് കേസില്‍ അറസ്റ്റിലായതിന് പിന്നാലെ ആന്റോ അഗസ്റ്റിന്റെ പ്രതികരണം. താന്‍ മദ്യപിക്കുന്നയാള്‍ അല്ലെന്നാണ് ആന്റോയുടെ പ്രതികരണം. വയനാട്ടിലെ വീട്ടില്‍ അനധികൃതമായി മദ്യം സൂക്ഷിച്ചെന്ന കേസില്‍ ആന്റോ അഗസ്റ്റിനെ വ്യാഴാഴ്ച പുലര്‍ച്ചെയാണ് എക്‌സൈസ് അറസ്റ്റ് ചെയ്തത്.
മെസ്സിയുടെ പേരില്‍ തട്ടിപ്പ് നടത്തിയയെന്ന കേസില്‍ റെയ്ഡിനെത്തിയ എസ്‌ഐടി സംഘം റിപ്പോര്‍ട്ടര്‍ ടിവി ഓഫീസില്‍നിന്ന് 6300 ഡോളറും കണ്ടെടുത്തിട്ടുണ്ട്. ഇതില്‍ കേന്ദ്ര ഏജന്‍സികള്‍ക്ക് റിപ്പോര്‍ട്ട് നല്‍കും. വിദേശനാണ്യ വിനിമയച്ചട്ടം ലംഘിച്ചിട്ടുണ്ടെങ്കില്‍ നടപടി വേണമെന്നും ആവശ്യപ്പെടും. എസ്‌ഐടി റെയ്ഡിന് പിന്നാലെയാണ് എക്‌സൈസ് സംഘം ടിവി ചാനലിന്റെ ഓഫീസിലെത്തിയത്.
അറസ്റ്റിനിടയില്‍ നാടകീയരംഗങ്ങളും അരങ്ങേറി. അറസ്റ്റ് ചെയ്യാനെത്തിയ സംഘത്തോട് എഫ്‌ഐആര്‍ പകര്‍പ്പ് കാണിക്കാന്‍ ആന്റോ ആവശ്യപ്പെട്ടു. എഫ്‌ഐആറിന്റെ ഡിജിറ്റല്‍ പകര്‍പ്പ് കാണിച്ചെങ്കിലും ഹാര്‍ഡ് കോപ്പി തന്നെ വേണമെന്ന് പറഞ്ഞതോടെ പെരുമ്പാവൂര്‍ എക്‌സൈസ് ഇന്‍സ്‌പെക്ടര്‍ എഫ്‌ഐആറിന്റെ ഹാര്‍ഡ് കോപ്പിയുമായി എത്തിയാണ് ആന്റോ അറസ്റ്റിന് വഴങ്ങിയത്.
എക്‌സൈസുമായി ബന്ധപ്പെട്ട കേസ് എന്താണെന്നറിയില്ല. എവിടെയാണ് മദ്യം സൂക്ഷിച്ചതെന്നോ എന്താണ് സംവിധാനമെന്നോ അറിയില്ല. താന്‍ ഇവിടെയാണെല്ലോ. മെസ്സിയുമായി ബന്ധപ്പെട്ട രേഖകള്‍ കൊടുത്തു. എക്‌സൈസുമായി ബന്ധപ്പെട്ട് ഏതോ കേസില്‍ അറസ്റ്റ് ചെയ്തിരിക്കുകയാണ്. രണ്ടു മണിക്ക് തടഞ്ഞുവെച്ചതാണ്. ജീവിതത്തില്‍ മദ്യപിച്ചിട്ടേയില്ല. എന്തായാലും പോയിനോക്കാമെന്നാണ് ആന്റോ പ്രതികരിച്ചത്.
Comments