ന്യൂഡൽഹി: റഷ്യൻ ഇന്ധനം വാങ്ങുന്ന പ്രധാന രാജ്യങ്ങളിൽ നിന്നുള്ള ഇറക്കുമതിക്ക് മേൽ 100 ശതമാനം വരെ തീരുവ ചുമത്താൻ വ്യവസ്ഥ ചെയ്യുന്ന ബിൽ യുഎസ് കോൺഗ്രസ് പാസാക്കിയ സംഭവത്തിൽ ഇന്ത്യ പ്രതികരിച്ചു. രാജ്യത്തിന്റെ വ്യാപാരവും സാമ്പത്തിക താൽപ്പര്യങ്ങളും സംരക്ഷിക്കാൻ ആവശ്യമായ എല്ലാ നടപടികളും സ്വീകരിക്കാൻ ഇന്ത്യ പ്രതിജ്ഞാബദ്ധമാണെന്ന് വിദേശകാര്യ മന്ത്രാലയം വ്യക്തമാക്കി.
റഷ്യൻ ക്രൂഡ് ഓയിലിന്റെ ഏറ്റവും വലിയ വാങ്ങലുകാരിൽ ഒരാളാണ് ഇന്ത്യ. പുതിയ നിയമം വഴി അമേരിക്കൻ പ്രസിഡന്റിന് 100 ശതമാനം വരെ പിഴത്തീരുവകൾ ചുമത്താനുള്ള അധികാരമാണ് ലഭിക്കുന്നത്. ഇന്ത്യയിലെ 140 കോടി ജനങ്ങളുടെ ഊർജ്ജ സുരക്ഷ ഉറപ്പാക്കുന്നതിൽ രാജ്യം ഉറച്ചുനിൽക്കുന്നു. വൈവിധ്യമാർന്ന ഉറവിടങ്ങളിലൂടെയും വിപണിയിലെ മാറിക്കൊണ്ടിരിക്കുന്ന സാഹചര്യങ്ങളുടെ അടിസ്ഥാനത്തിലും ഇന്ത്യ അത് തുടരുകയും ചെയ്യും എന്ന് വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ വ്യക്തമാക്കുന്നു.
റഷ്യൻ ഉദ്യോഗസ്ഥരെയും സമ്പദ്‌വ്യവസ്ഥയുടെ പ്രധാന മേഖലകളെയും ലക്ഷ്യമിട്ടുള്ള വിപുലമായ ഉപരോധ പാക്കേജ് യുഎസ് പ്രതിനിധി സഭ പാസാക്കിയതോടെയാണ് ഇന്ത്യയ്ക്ക് മേൽ അധികതീരുവ ഭീഷണി ഉയരുന്നത്. റഷ്യൻ ഊർജ്ജം വാങ്ങുന്ന രാജ്യങ്ങൾക്ക് മേൽ 100 ശതമാനം വരെ തീരുവ ചുമത്താൻ പ്രസിഡന്റ് ട്രംപിന് അധികാരം നൽകുന്നതാണ് 'ലിൻഡ്സെ ഒ. ഗ്രഹാം സാങ്ഷനിംഗ് റഷ്യ ആൻഡ് ഇറാൻ ആക്റ്റ് ഓഫ് 2026'.
Comments