ഷി ജിൻപിങിന് പക്ഷാഘാതം....ബ്രിക്സിൽ പങ്കെടുത്ത നേതാക്കളെക്കുറിച്ചുള്ള വ്യാജപ്രചാരണങ്ങൾ തള്ളി വിദേശകാര്യ മന്ത്രാലയം

ന്യൂഡൽഹി: ഡൽഹിയിൽ നടന്ന ബ്രിക്സ് ഉച്ചകോടിയിൽ പങ്കെടുത്തതിന് ശേഷം നിരവധി ലോകനേതാക്കൾ അസുഖബാധിതരായി എന്ന തരത്തിൽ സമൂഹമാധ്യമങ്ങളിൽ പ്രചരിക്കുന്ന അവകാശവാദങ്ങൾ വിദേശകാര്യ മന്ത്രാലയം തള്ളിക്കളഞ്ഞു. ഓൺലൈനിൽ പ്രചരിക്കുന്ന ഇത്തരം "ദുരുദ്ദേശ്യപരമായ പോസ്റ്റുകൾക്കെതിരെ" മന്ത്രാലയം മുന്നറിയിപ്പ് നൽകി.

വ്യാജ മുന്നറിയിപ്പ്!!! സമൂഹമാധ്യമങ്ങളിലെ ഇത്തരം ദുരുദ്ദേശ്യപരമായ പോസ്റ്റുകൾക്കെതിരെ ഞങ്ങൾ ജാഗ്രത പാലിക്കാൻ മുന്നറിയിപ്പ് നൽകുന്നു!" എന്ന് എം.ഇ.എ ഫാക്ട് ചെക്ക് യൂണിറ്റ് എക്സിൽ കുറിച്ചു.

ചൈനീസ് പ്രസിഡന്റ് ഷി ജിൻപിങ്, ദക്ഷിണാഫ്രിക്കൻ പ്രസിഡന്റ് സിറിൽ റമാഫോസ എന്നിവരുൾപ്പെടെ ഉച്ചകോടിയിൽ പങ്കെടുത്ത് മടങ്ങിയ നേതാക്കളുടെ ആരോഗ്യനിലയുമായി ബന്ധപ്പെട്ട് സോഷ്യൽ മീഡിയയിൽ പ്രചരിക്കുന്ന അവകാശവാദങ്ങളെ തുടർന്നാണ് ഈ മുന്നറിയിപ്പ്. ബ്രിക്സ് ഉച്ചകോടിക്കിടെ ഷി ജിൻപിങ് കുഴഞ്ഞുവീണുപോയെന്നും പക്ഷാഘാതം ഉണ്ടായതിനെ തുടർന്ന് ചികിത്സയ്ക്കായി ബീജിങ്ങിലേക്ക് കൊണ്ടുപോയെന്നും ചൈന ഡെമോക്രസി പാർട്ടി ചെയർമാൻ വാൻജുൻ ഷീ പോസ്റ്റ് ചെയ്തിരുന്നു. എന്നാൽ ഈ അവകാശവാദങ്ങൾ ചൈനീസ് അധികാരികളോ വിശ്വസനീയമായ മാധ്യമങ്ങളോ ഔദ്യോഗികമായി സ്ഥിരീകരിച്ചിട്ടില്ല.

റിപ്പോർട്ടുകൾ പ്രകാരം, ഉച്ചകോടിയിലെ അത്താഴവിരുന്നിൽ ഷി ജിൻപിങ് പങ്കെടുക്കാതിരുന്നതിനെ തുടർന്നാണ് ഈ അവകാശവാദങ്ങൾ ശ്രദ്ധിക്കപ്പെട്ടത്. എന്നിരുന്നാലും, ചൈനീസ് പ്രസിഡന്റിന് പക്ഷാഘാതം ഉണ്ടായെന്നോ അടിയന്തര ചികിത്സയ്ക്കായി ആശുപത്രിയിൽ പ്രവേശിപ്പിച്ചു എന്നോ ഉള്ളതിന് ഔദ്യോഗിക സ്ഥിരീകരണമൊന്നുമില്ല.

മറ്റൊരു സംഭവത്തിൽ, ഇന്ത്യയിലെ ബ്രിക്സ് ഉച്ചകോടിയിൽ നിന്ന് മടങ്ങിയതിന് ശേഷം സിറിൽ റമാഫോസ പൊതുപരിപാടികളിൽ നിന്ന് വിട്ടുനിൽക്കാൻ തീരുമാനിച്ചിട്ടുണ്ട്. ആരോഗ്യനില മോശമായതിനാൽ ഡോക്ടർമാരുടെ നിർദ്ദേശപ്രകാരം ദക്ഷിണാഫ്രിക്കൻ പ്രസിഡന്റ് വിശ്രമം എടുത്തതായി ബുധനാഴ്ച അദ്ദേഹത്തിന്റെ ഓഫീസ് അറിയിച്ചു. അദ്ദേഹത്തിന്റെ അസുഖത്തിന്റെ സ്വഭാവത്തെയോ തീവ്രതയെയോ കുറിച്ചുള്ള കൂടുതൽ വിവരങ്ങൾ പുറത്തുവിട്ടിട്ടില്ല.

തിങ്കളാഴ്ചയാണ് റമാഫോസ ബ്രിക്സ് ഉച്ചകോടി കഴിഞ്ഞ് മടങ്ങിയത്. പൊതുപരിപാടികളിൽ വീണ്ടും പങ്കെടുക്കാൻ തീരുമാനിച്ചിരുന്നെങ്കിലും, സാധ്യമായ ഇടങ്ങളിലെല്ലാം മന്ത്രിമാർ അദ്ദേഹത്തെ പ്രതിനിധീകരിക്കുമെന്ന് ഓഫീസ് അറിയിച്ചു. സെപ്റ്റംബർ 12, 13 തീയതികളിലാണ് ഡൽഹിയിൽ ബ്രിക്സ് ഉച്ചകോടി നടന്നത്. വിപുലീകരിച്ച ഈ കൂട്ടായ്മയിലെ നേതാക്കളും പ്രതിനിധികളും ഉച്ചകോടിയിൽ പങ്കെടുത്തിരുന്നു. ചൈനീസ് പ്രസിഡന്റ് ഷി ജിൻപിങ്ങും ഉച്ചകോടിയിൽ പങ്കെടുത്ത പ്രധാന നേതാക്കളിൽ ഉൾപ്പെടുന്നു.