ചെന്നൈ: ആറ് ദിവസത്തെ ലണ്ടൻ സന്ദർശനം പൂർത്തിയാക്കി തമിഴ്നാട് മുഖ്യമന്ത്രി സി. ജോസഫ് വിജയ് ചെന്നൈയിൽ തിരിച്ചെത്തി. രാവിലെ എട്ടോടെയാണ് അദ്ദേഹം ചെന്നൈ വിമാനത്താവളത്തിലെത്തിയത്. നടൻ അജിത്തിന്റെ കാർ റേസ് കാണാനാണ് മുഖ്യമന്ത്രി ലണ്ടനിലെത്തിയതെന്ന പ്രതിപക്ഷ ആരോപണത്തിനിടെ, 15,300 കോടി രൂപയുടെ നിക്ഷേപ കരാറുകൾ ഒപ്പുവെച്ചെന്നും ഇതിലൂടെ പതിനായിരത്തിലേറെ പേർക്ക് തൊഴിൽ ലഭിക്കുമെന്നും സർക്കാർ വ്യക്തമാക്കി.
സെപ്റ്റംബർ പത്തിനാണ് സി. ജോസഫ് വിജയ് ലണ്ടനിലേക്ക് യാത്ര തിരിച്ചത്. തമിഴ്നാട്ടിലേക്ക് നിക്ഷേപം എത്തിക്കുന്നതിന്റെ ഭാഗമായി വിവിധ കമ്പനികളുമായി കരാറുകളിൽ ഏർപ്പെടുകയായിരുന്നു സന്ദർശനത്തിന്റെ ലക്ഷ്യം. എന്നാൽ, ലണ്ടനിലെത്തിയ മുഖ്യമന്ത്രി ആദ്യം പങ്കെടുത്തത് നടൻ അജിത്തിന്റെ കാർ റേസിലായിരുന്നു. റേസിന്റെ ഫ്ലാഗ് ഓഫും മുഖ്യമന്ത്രി നിർവഹിച്ചു. നടി തൃഷയ്ക്കൊപ്പം റേസ് കാണുന്ന ദൃശ്യങ്ങളും പുറത്തുവന്നു.
ഇതോടെയാണ് പ്രതിപക്ഷ പാർട്ടികൾ മുഖ്യമന്ത്രിക്കെതിരെ രൂക്ഷ വിമർശനവുമായി രംഗത്തെത്തിയത്. റേസ് കാണാനാണ് ലണ്ടൻ സന്ദർശനമെന്നും നിക്ഷേപ സമാഹരണവുമായി ബന്ധപ്പെട്ട് ചർച്ചകളൊന്നും നടന്നില്ലെന്നും പ്രതിപക്ഷം ആരോപിച്ചു.
അതേസമയം, തുടർന്നുള്ള രണ്ട് ദിവസങ്ങളിൽ വിവിധ കമ്പനികളുമായി മുഖ്യമന്ത്രി ധാരണാപത്രങ്ങൾ ഒപ്പിടുന്നതിന്റെ ചിത്രങ്ങൾ ടിവികെ പുറത്തുവിട്ടു. വിവിധ കമ്പനികളുമായി 15,300 കോടി രൂപയുടെ കരാറുകൾ ഒപ്പുവെച്ചെന്നും ഇതിലൂടെ പതിനായിരത്തിലേറെ പേർക്ക് തൊഴിൽ ലഭിക്കുമെന്നും ടിവികെ സർക്കാർ വ്യക്തമാക്കി.
Comments