തനിക്ക് ടെന്നിസ് എല്‍ബോ എന്ന ആരോഗ്യപ്രശ്‌നമുണ്ടെന്ന് തുറന്നുപറഞ്ഞ് നടന്‍ പൃഥ്വിരാജ് സുകുമാരന്‍. പുതിയ ചിത്രം 'ദയ്‌റ'യുടെ പ്രസ് മീറ്റിനായി ഡല്‍ഹിയിലെത്തിയ താരം ഇടതുകയ്യില്‍ റിസ്റ്റ് ബ്രേസ് അണിഞ്ഞെത്തിയത് മാധ്യമങ്ങളുടെ ശ്രദ്ധയില്‍പ്പെട്ടിരുന്നു. കൈക്ക് പരിക്കേറ്റതിനെക്കുറിച്ചുള്ള മാധ്യമപ്രവര്‍ത്തകരുടെ ചോദ്യത്തിന് മറുപടി നല്‍കവെയാണ് താന്‍ നേരിടുന്ന ശാരീരിക ബുദ്ധിമുട്ടിനെക്കുറിച്ച് താരം വിശദീകരിച്ചത്.
'കൈക്ക് കുറച്ച് നാളായി ടെന്നീസ് എൽബോയുടെ ചെറിയൊരു ബുദ്ധിമുട്ടുണ്ട്. കുറച്ചു ദിവസത്തേക്ക് ഈ റിസ്റ്റ് ബ്രേസ് ധരിക്കാനാണ് ഡോക്ടർ നിർദേശിച്ചിരിക്കുന്നത്. ഇട്ട് കഴിഞ്ഞപ്പോൾ കൊള്ളാമല്ലോ എന്ന് എനിക്കും തോന്നി. പ്രസ് മീറ്റിന് എത്തുമ്പോൾ ഇത് അഴിച്ചുവയ്ക്കാമെന്നാണ് ഞാൻ ആദ്യം കരുതിയത്. എന്നാൽ ഉറങ്ങുമ്പോൾ പോലും ഇത് അഴിച്ചു മാറ്റരുതെന്നാണ് ഡോക്ടർ കർശനമായി പറഞ്ഞിരിക്കുന്നത്. അതിങ്ങനെയിട്ട് ശരിയായി കിട്ടാൻ വേണ്ടിയാണ് ഇപ്പോഴും ഇത് ധരിച്ചെത്തിയത്’ പൃഥ്വിരാജ് പറഞ്ഞു.
മേഘന ഗുല്‍സാറാണ് പൃഥ്വിരാജിന്റെ പുതിയ ബോളിവുഡ് ചിത്രം സംവിധാനം ചെയ്തിരിക്കുന്നത്. കരീന കപൂര്‍ ആണ് ചിത്രത്തില്‍ നായിക. ഇന്‍വെസ്റ്റിഗേറ്റീവ് രൈകം ത്രില്ലര്‍ ഴോണറില്‍ ഒരുങ്ങുന്ന ചിത്രത്തില്‍ പൃഥ്വിരാജ് പോലീസ് വേഷത്തിലാണെത്തുന്നത്. റാസി, തല്‍വാര്‍, സാം ബഹദൂര്‍ തുടങ്ങിയ മികച്ച ചിത്രങ്ങള്‍ സംവിധാനം ചെയ്ത സംവിധായികയാണ് മേഘ്‌ന ഗുല്‍സാര്‍.
Comments