കൊച്ചി: കൊച്ചിയില്‍ സ്ത്രീകളെ വിവസ്ത്രരാക്കി നടത്തിയ കവര്‍ച്ചയില്‍ സ്വര്‍ണവും പണവും മൊബൈല്‍ ഫോണുകളും കവര്‍ന്നു. അസം, പശ്ചിമ ബംഗാള്‍ സ്വദേശികളായ യുവതികളാണ് അതിക്രമത്തിന് ഇരയായത്. അതിക്രമത്തിന് ശേഷം സംഘം കടന്നുകളഞ്ഞു. പ്രതികള്‍ക്കായുള്ള അന്വേഷണം പൊലീസ് ആരംഭിച്ചിട്ടുണ്ട്. രണ്ടുപേരെ തിരിച്ചറിഞ്ഞതായാണ് പൊലീസ് പറയുന്നത്.
പാലാരിവട്ടത്ത് വ്യാഴാഴ്ച പുലര്‍ച്ചെയായിരുന്നു സംഭവം നടന്നത്. ആണ്‍ സുഹൃത്തുക്കള്‍ക്കൊപ്പം യുവതികള്‍ വാടകയ്ക്ക് താമസിച്ചിരുന്ന വീട്ടിലേക്ക് മാരാകായുധങ്ങളുമായി അതിക്രമിച്ച് കയറുകയായിരുന്നു. തുടര്‍ന്ന് സ്വര്‍ണവും മൂന്ന് ലക്ഷത്തിലധികം വില വരുന്ന മൊബൈല്‍ ഫോണും 1,20,000 രൂപയും പിടിച്ചുവാങ്ങി. യുപിഐ വഴി പന്ത്രണ്ടായിരം രൂപയും ട്രാന്‍സാക്ഷനും നടത്തിച്ചു.
കത്തി കാണിച്ചും കൊന്നുകളയുമെന്ന് ഭീഷണിപ്പെടുത്തിയും സ്വര്‍ണവും പണവും മൊബൈല്‍ ഫോണുകളും കവരുകയായിരുന്നു. 3,05,000 വില വരുന്ന പത്ത് ഫോണുകളാണ് സംഘം കൈക്കലാക്കിയത്. തുടര്‍ന്ന് സ്ത്രീകളെ വിവസ്ത്രരാക്കി. അതില്‍ ഒരാളുടെ കഴുത്തിലുണ്ടായിരുന്ന ഒരു പവന്‍ തൂക്കത്തിലുള്ള സ്വര്‍ണമാലയും മറ്റൊരാളുടെ നാല് ഗ്രാം സ്വര്‍ണകമ്മലും കവര്‍ന്നു.
Comments