എന്തിനീ ക്രൂരത?; ജീവനുള്ള നായയെ പുഴയിലേക്ക് വലിച്ചെറിഞ്ഞു, ദൃശ്യങ്ങൾ പുറത്ത്: നേപ്പാളിൽ വ്യാപക പ്രതിഷേധം

ജീവനുള്ള നായയെ പാലത്തിൽ നിന്ന് പുഴയിലേക്ക് എറിഞ്ഞതായി ആരോപിക്കുന്ന ദൃശ്യങ്ങൾ പുറത്തുവന്നതോടെ നേപ്പാളിൽ പ്രതിഷേധം ശക്തമാകുന്നു. ബജ്ഹാങ്ങിലെ പാങ്കോട്ട് പാലത്തിൽ നിന്ന് സെതി നദിയിലേക്കാണ് നായയെ എറിഞ്ഞതെന്നാണ് റിപ്പോർട്ട്. സംഭവത്തിന്റെ വീഡിയോ ബജ്ഹാങ്ങ് സ്വദേശിയായ നബിൻ പാണ്ഡെ ബുധനാഴ്ച ഫേസ്ബുക്കിൽ പങ്കുവെച്ചതോടെയാണ് ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചത്. സെപ്റ്റംബർ രണ്ടിനാണ് സംഭവം നടന്നതെന്നാണ് വിവരം.

സംഭവം നടക്കുമ്പോൾ താൻ ഇടപെട്ട് നായയെ പുഴയിലേക്ക് എറിയുന്നത് തടയാൻ ശ്രമിച്ചിരുന്നുവെന്ന് നബിൻ പാണ്ഡെ പറഞ്ഞു. എന്നാൽ, നായ ഒരാളെ കടിച്ചിരുന്നുവെന്ന് പറഞ്ഞ് സ്ത്രീ അത് പുഴയിലേക്ക് എറിഞ്ഞതായാണ് അദ്ദേഹത്തിന്റെ ആരോപണം. വെറ്ററിനറി മെഡിസിൻ പഠിച്ചിട്ടുള്ള തനിക്ക് നായ ശാന്തമായാണ് കാണപ്പെട്ടതെന്നും ആക്രമണ സ്വഭാവത്തിന്റെ ലക്ഷണങ്ങളൊന്നും ശ്രദ്ധയിൽപ്പെട്ടില്ലെന്നും പാണ്ഡെ പറഞ്ഞു.

പുഴയിലേക്ക് വീണ നായയെ ഒഴുക്കിൽപ്പെട്ട് പിന്നീട് കാണാതായെന്നാണ് പാണ്ഡെ പറയുന്നത്. നായയ്ക്ക് പിന്നീട് എന്ത് സംഭവിച്ചുവെന്നോ അത് രക്ഷപ്പെട്ടോ എന്നോ ഇതുവരെ വ്യക്തമായിട്ടില്ല. വീഡിയോ സമൂഹമാധ്യമങ്ങളിൽ പ്രചരിച്ചതോടെ മൃഗസംരക്ഷണ പ്രവർത്തകരടക്കം നിരവധി പേർ സംഭവത്തിൽ പ്രതിഷേധവുമായി രംഗത്തെത്തി. നായയെ പുഴയിലേക്ക് എറിഞ്ഞ വ്യക്തിയെ കണ്ടെത്തി നടപടി സ്വീകരിക്കണമെന്ന ആവശ്യവും ഉയർന്നു.

സംഭവത്തെക്കുറിച്ച് വിവരം ലഭിച്ചതായും അന്വേഷണം ആരംഭിച്ചതായും ബജ്ഹാങ്ങ് ജില്ലാ പോലീസ് അറിയിച്ചു. സംഭവത്തിൽ ഉൾപ്പെട്ട വ്യക്തിയെ തിരിച്ചറിയാനും കണ്ടെത്താനുമുള്ള ശ്രമങ്ങൾ തുടരുകയാണെന്ന് ഇൻഫർമേഷൻ ഓഫീസർ ദീപക് ബിസ്റ്റ വ്യക്തമാക്കി. അതേസമയം, നായയെ പുഴയിലേക്ക് എറിഞ്ഞതിന്റെ കൃത്യമായ സാഹചര്യങ്ങളും സംഭവത്തിന്റെ തുടർവിവരങ്ങളും പൊലീസ് അന്വേഷണത്തിന് ശേഷമേ വ്യക്തമാകൂ.