ഉര്‍വശി, ജോജു ജോര്‍ജ്, ഐശ്വര്യ ലക്ഷ്മി എന്നിവരെ പ്രധാന കഥാപാത്രങ്ങളാക്കി പുതുമുഖ സംവിധായകന്‍ സനല്‍ സഫര്‍ ഒരുക്കിയ പുതിയ ചിത്രമാണ് ' ആശ'. ചിത്രം തിയേറ്ററുകളില്‍ മികച്ച പ്രതികരണം നേടി മുന്നേറുന്നതിനിടെ ചിത്രത്തെ പ്രശംസിച്ച് രംഗത്തെത്തിയിരിക്കുകയാണ് നടനും സംവിധായകനുമായ ജോയ് മാത്യു.
വ്യവസ്ഥാപിത സിനിമാ സങ്കല്‍പ്പങ്ങളെ അട്ടിമറിച്ച് പുതുമയും യാഥാര്‍ഥ്യവും നിറച്ച ചിത്രമാണ് 'ആശ' എന്ന് ജോയ് മാത്യു കുറിച്ചു. നിത്യജീവിതത്തിലെ യാദൃശ്ചികതകള്‍ സൃഷ്ടിക്കുന്ന സംഘര്‍ഷങ്ങളെ അതേ തീവ്രതയോടെ പ്രേക്ഷകരിലേക്ക് എത്തിക്കാന്‍ സിനിമയ്ക്ക് സാധിച്ചിട്ടുണ്ടെന്ന് അദ്ദേഹം പറഞ്ഞു.
‘‘പതിവ് ചേരുവകകളിൽ നിന്നു മാറി ,വ്യവസ്ഥാപിത സിനിമാ സങ്കൽപ്പങ്ങളെ അട്ടിമറിച്ച് പുതുമയുടെയും യാഥാർഥ്യത്തിന്റെയും മൂശയിലിട്ട് വാർത്തെടുത്ത ഒരു സിനിമ -ആശ. നിത്യജീവിതത്തിലെ യാദൃശ്ചികതൾ നൽകിയേക്കാവുന്ന സംഘർഷങ്ങളെ അതേ തീവ്രതയോടെ പ്രേക്ഷരിലേക്കെത്തിക്കാൻ "ആശ "ഒരുക്കിയവർക്ക് സാധിച്ചിട്ടുണ്ട് . ഉർവ്വശി എന്ന അഭിനേത്രിയെ,ജോജു ജോർജ്ജ് എന്ന നടനെ മധു നീലകണ്ഠൻ എന്ന ഛായാഗ്രാഹകനെ ,മറ്റു സാങ്കേതിക വിദഗ്ധരെ -ആരെയും മാറ്റിനിർത്താനാവാത്തവിധം അവരുടെ സർഗ്ഗാത്മകത വിളക്കിച്ചേർക്കാൻ നവാഗതനായ കഥാകൃത്തും സംവിധായകനുമായ സഫർ സനലിന് കഴിഞ്ഞിട്ടുണ്ട് ; അഭിനന്ദനങ്ങൾ .
ഫലിതബിന്ദുക്കൾ കണ്ടു കോരിത്തരിച്ചിരിക്കുന്ന പ്രേക്ഷകന്റെ തലയിലേക്ക് മികച്ച സിനിമയുടെ പ്രകാശം നിറച്ചതിന് .... ഈ നല്ല സിനിമയുടെ ഭാഗമാകാൻ കഴിഞ്ഞതിൽ അഭിമാനമുണ്ട് "ആശ "ഒരിക്കലും പ്രേക്ഷകർക്ക് ഒരു നിരാശയും സമ്മാനിക്കില്ല ; തീർച്ച ’’ , ജോയ് മാത്യു കുറിച്ചു.
Comments