യൂട്യൂബ് വ്ലോഗിംഗ് അവസാനിപ്പിക്കുന്ന കാര്യം പരിഗണനയിലാണെന്ന വെളിപ്പെടുത്തലുമായി നർത്തകിയും സോഷ്യൽ മീഡിയ താരവുമായ സൗഭാഗ്യ വെങ്കിടേഷ്. താൻ മാസങ്ങൾക്ക് മുമ്പ് ചെയ്തുവെച്ച വ്ലോഗുകൾ വോയ്സ് ഓവർ ചെയ്ത് പുറത്തുവിട്ടുകൊണ്ടാണ് താരം തന്റെ മാനസികാവസ്ഥയും ആശയക്കുഴപ്പങ്ങളും ആരാധകരുമായി പങ്കുവെച്ചത്.
എടുത്തു വെച്ചിരിക്കുന്ന പഴയ വ്ലോഗുകൾ പൂർത്തിയാക്കി നൽകിയ ശേഷം യൂട്യൂബ് വ്ലോഗിംഗ് നിർത്തുന്നതിനെക്കുറിച്ചാണ് താൻ ആലോചിക്കുന്നതെന്നും, തനിക്ക് കൃത്യമായൊരു തീരുമാനം എടുക്കാൻ സാധിക്കുന്നില്ലെന്നും സൗഭാഗ്യ വീഡിയോയിൽ പറയുന്നു. എന്നാൽ ഇക്കാര്യത്തിൽ അന്തിമ തീരുമാനം എടുത്തിട്ടില്ലെന്നും, മനസ്സ് മാറുകയാണെങ്കിൽ മാത്രം വ്ലോഗിംഗ് തുടരുമെന്നും സൗഭാഗ്യ വ്യക്തമാക്കി. താരത്തിന്റെ വീഡിയോ പുറത്തുവന്നതോടെ വ്ലോഗിംഗ് നിർത്തരുതെന്ന അഭ്യർത്ഥനയുമായി നിരവധി ആരാധകരാണ് കമന്റ് ബോക്സിൽ എത്തുന്നത്.
ജീവിതത്തിൽ തനിക്ക് നേരിടേണ്ടി വന്ന ചില വിഷമകരമായ സാഹചര്യങ്ങളെക്കുറിച്ചും താരം വീഡിയോയിൽ പരാമർശിക്കുന്നുണ്ട്. മകളെ സ്കൂളിലാക്കി തിരികെ വരുന്ന വഴിക്ക് വളരെ മോശമായൊരു അനുഭവം ഉണ്ടായെന്നും, അത് തന്റെ ആ ദിവസം മുഴുവൻ നശിപ്പിച്ചു കളഞ്ഞെന്നും സൗഭാഗ്യ പറയുന്നു. എന്നാൽ ആ വിഷമങ്ങളിൽ നിന്ന് പെട്ടെന്ന് പുറത്തുകടന്ന് മറ്റ് ആക്ടിവിറ്റികളിലേക്ക് കടന്നതുകൊണ്ടാണ് ഡിപ്രസ്ഡ് മൂഡ് നീണ്ടുപോകാതിരുന്നതെന്നും താരം വ്യക്തമാക്കുന്നു. പ്രതിസന്ധികളിൽ ഭർത്താവ് അർജുൻ നൽകുന്ന പിന്തുണ വളരെ വലുതാണെന്ന് താരം ഓർത്തെടുത്തു.
പരസ്പരം ഊർജ്ജവും മാനസികാവസ്ഥയും മനസ്സിലാക്കി മുന്നോട്ട് പോയാൽ മാത്രമേ നല്ലൊരു ദാമ്പത്യബന്ധം നിലനിർത്താൻ സാധിക്കൂ എന്നും, 'ഞാനിത്ര ചെയ്തു, ബാക്കി നീ ചെയ്യണം' എന്ന ആറ്റിറ്റ്യൂഡിൽ പോയാൽ ബന്ധങ്ങൾ വിജയിക്കില്ലെന്നും സൗഭാഗ്യ ഓർമ്മിപ്പിക്കുന്നു. തങ്ങൾ രണ്ടുപേരും പരസ്പരം മനസ്സിലാക്കിയാണ് മുന്നോട്ട് പോകുന്നതെന്നും, അതിന് ദൈവത്തോട് നന്ദി പറയുന്നതായും സൗഭാഗ്യ വീഡിയോയിൽ കൂട്ടിച്ചേർത്തു.
നടന്‍ അര്‍ജുന്‍ സോമശേഖരനാണ് സൗഭാഗ്യയുടെ ഭര്‍ത്താവ്. ഇരുവര്‍ക്കും ഒരു മകളാണ്. അഭിനേത്രിയും ഗായികയുമായ സുബ്ബലക്ഷ്മിയുടെ കൊച്ചുമകളാണ് സൗഭാഗ്യ.
Comments