മറാഠി ത്രില്ലർ ചിത്രം ‘ഗൊന്ധൽ’ഓസ്കാറിനുള്ള ഇന്ത്യയുടെ ഔദ്യോഗിക എൻട്രി

ന്യൂഡൽഹി: മറാഠി ത്രില്ലർ ചിത്രമായ 'ഗൊന്ധൽ' 2027-ലെ ഓസ്കാറിനുള്ള ഇന്ത്യയുടെ ഔദ്യോഗിക എൻട്രിയായി തിരഞ്ഞെടുക്കപ്പെട്ടു. ഫിലിം ഫെഡറേഷൻ ഓഫ് ഇന്ത്യയാണ് വെള്ളിയാഴ്ച ഈ പ്രഖ്യാപനം നടത്തിയത്.

സന്തോഷ് ദവാഖർ സംവിധാനം ചെയ്ത ഈ ചിത്രം, 99-മത് അക്കാദമി അവാർഡിലെ 'മികച്ച അന്താരാഷ്ട്ര ഫീച്ചർ ഫിലിം' വിഭാഗത്തിൽ രാജ്യത്തെ പ്രതിനിധീകരിക്കും. ഈ സംവിധായകൻ 2025-ലെ ഗോവ അന്താരാഷ്ട്ര ചലച്ചിത്രമേളയിൽ സിൽവർ പീക്കോക്ക് പുരസ്കാരം നേടിയിട്ടുണ്ട്. പി ശേഷാദ്രി, വിജയ് പട്കർ, ഹുതു കനോഡിയ, ശാന്തി കുമാർ, സന്ദീപ് പരാശർ, സഞ്ജയ് പാട്ടീൽ, സാബു ജോസഫ്, അനിൽ തോമസ്, വിവേക് ​​വസ്വാനി, ബിജോയ് ദാസ്ഗുപ്ത, ഹാസൻ, വസൻ, താനിഷ്ഠ ചാറ്റർജി എന്നിവരടങ്ങുന്നതായിരുന്നു ജൂറി പാനൽ.

ഹിന്ദിയിൽ നിന്ന് 14 എണ്ണവും, മറാഠി, തെലുങ്ക്, ഗുജറാത്തി ഭാഷകളിൽ നിന്ന് നാല് വീതവും, തമിഴിൽ നിന്ന് മൂന്നും, മലയാളം, നാഗാമീസ് ഭാഷകളിൽ നിന്ന് ഓരോന്നും അടക്കം മൊത്തം 33 ചിത്രങ്ങളാണ് ഈ വിഭാഗത്തിലേക്ക് സമർപ്പിക്കപ്പെട്ടത്. ഇതിൽ ഒരു മൂകചിത്രവും ഉൾപ്പെടുന്നു.

കഴിഞ്ഞ വർഷം നീരജ് ഘയ്വാൻ സംവിധാനം ചെയ്ത് ഇഷാൻ ഖട്ടർ, വിശാൽ ജെത്വ എന്നിവർ പ്രധാന വേഷങ്ങളിൽ അഭിനയിച്ച കോവിഡ് പശ്ചാത്തലത്തിലുള്ള 'ഹോംബൗണ്ട്' (Homebound) എന്ന ചിത്രമായിരുന്നു ഇന്ത്യയുടെ ഔദ്യോഗിക എൻട്രിയായി തിരഞ്ഞെടുക്കപ്പെട്ടിരുന്നത്. ലോസ് ഏഞ്ചൽസിലെ ഡോൾബി തിയേറ്ററിൽ 2027 മാർച്ച് 14-നാണ് 99-മത് ഓസ്കാർ ചടങ്ങ് നടക്കുന്നത്.