കോഴിക്കോട്: അർജന്റീന ടീമിനെയും നായകൻ ലയണൽ മെസിയെയും കേരളത്തിലെത്തിക്കാമെന്ന് പറഞ്ഞ് നടത്തിയ തട്ടിപ്പ് കേസിൽ മുൻ കായികമന്ത്രി വി. അബ്ദുറഹ്മാനെ ഉടൻ ചോദ്യം ചെയ്യും. ടെൻഡറോ മറ്റ് ഉറപ്പോ ഇല്ലാതെ റിപ്പോർട്ടർ ബ്രോഡ്കാസ്റ്റിംഗ് കമ്പനിക്ക് വഴിയൊരുക്കിയതുമായി ബന്ധപ്പെട്ടാണ് അന്വേഷണം മുൻ കായികമന്ത്രിയിലേക്കും നീളുന്നത്.
അബ്ദുറഹ്മാനെ ചോദ്യം ചെയ്യാൻ കേസ് അന്വേഷിക്കുന്ന എസ്‌ഐടി ഉടൻ എത്തുമെന്നാണ് വിവരം. ചോദ്യം ചെയ്യലിന് ഹാജരാകാൻ നോട്ടീസ് നൽകാനുള്ള നടപടികളിലാണ് അന്വേഷണ സംഘം.
കലൂർ സ്റ്റേഡിയം ചട്ടംലംഘിച്ച് വിട്ടുനൽകിയതിലും ജിസിഡിയും ഇതിനായി രൂപീകരിച്ച സ്പോർട്സ് കേരള ഫൗണ്ടേഷനും എസ്‌ഐടിയുടെ അന്വേഷണ പരിധിയിലുണ്ട്. കൂടുതൽ ജിഎസ്ടി ഉദ്യോഗസ്ഥരുടെ മൊഴികളും അന്വേഷണ സംഘം രേഖപ്പെടുത്തും. റിപ്പോർട്ടർ കമ്പനി നികുതി വെട്ടിച്ചതുമായി ബന്ധപ്പെട്ട് രണ്ട് ജിഎസ്ടി ഉദ്യോഗസ്ഥരുടെ മൊഴി ഇതിനകം രേഖപ്പെടുത്തിയിട്ടുണ്ട്.
അതിനിടെ, അന്വേഷണ സംഘം പിടിച്ചെടുത്ത രേഖകളും ഇലക്ട്രോണിക് ഉപകരണങ്ങളും കോടതിയിൽ ഹാജരാക്കി. റിപ്പോർട്ടർ ചാനലിലെ റെയ്ഡ് ഉൾപ്പെടെയുള്ള പൊലീസ് നടപടികളിൽ ചട്ടലംഘനമില്ലെന്ന് ആഭ്യന്തര മന്ത്രി രമേശ് ചെന്നിത്തല ഇന്നും ആവർത്തിച്ചു.
Comments