തെലുങ്ക് സിനിമയിലെ നാച്ചുറൽ സ്റ്റാറാണ് നാനി. തെലുങ്ക് സിനിമകളിലാണ് അഭിനയിക്കുന്നതെങ്കിലും മലയാള സിനിമപ്രേക്ഷകർക്കും ഏറെയിഷ്ടമുള്ള താരമാണ് നാനി. നാനിയുടെ ചിത്രങ്ങള്‍ക്ക് മലയാളപ്രേക്ഷകര്‍ക്കിടയിലും വലിയ സ്വീകാര്യതയാണുള്ളത്. അതുകൊണ്ടു തന്നെ താരത്തിന്റെ സിനിമകളുടെ മലയാളം പതിപ്പുകള്‍ വലിയ വിജയം നേടാറുണ്ട്.
ഇപ്പോഴിതാ ‘പാൻ-ഇന്ത്യ’ എന്ന വിശേഷണത്തിന്റെ സാധുതയെയും അതിലെ ഇരട്ടത്താപ്പിനെയും ചോദ്യം ചെയ്യുകയാണ് നാനി. രാജ്യത്തുടനീളം മികച്ച വിജയം നേടുന്ന ഹിന്ദി സിനിമകൾക്ക് പോലും അപൂർവ്വമായേ ‘പാൻ-ഇന്ത്യ’ എന്ന വിശേഷണം ലഭിക്കാറുള്ളൂവെന്നും, അപ്പോള്‍പ്പിന്നെ എന്തുകൊണ്ടാണ് ദക്ഷിണേന്ത്യൻ സിനിമകൾക്ക് മാത്രം ഈ പദം പ്രധാനമായും ഉപയോഗിക്കുന്നതെന്നാണ് താരം ചോദിച്ചത്.
‘‘എന്റെ സിനിമയെ ‘പാൻ-ഇന്ത്യൻ’ എന്ന് വിളിക്കരുതെന്ന് ഞാൻ പറയാറുണ്ട്. കാരണം, ഒരു സിനിമയെയും അങ്ങനെ വിളിക്കുന്നത് എനിക്ക് ഇഷ്ടമല്ല. ഉദാഹരണത്തിന്, ഒരു ഹിന്ദി സിനിമ വരുന്നു, അത് തെലുങ്ക്, തമിഴ്, മലയാളം പതിപ്പുകളിലും വലിയ വിജയം നേടുന്നു. എന്നിട്ടും ആ ഹിന്ദി സിനിമയെ ‘പാൻ-ഇന്ത്യൻ’ എന്ന് വിളിക്കാറില്ല, അത് ഹിന്ദി സിനിമ എന്ന് തന്നെയാണ് അറിയപ്പെടുന്നത്.
ഷാരൂഖ് ഖാന്റെ ‘ജവാൻ’, ‘പത്താൻ’ എന്നീ സിനിമകള്‍ നോര്‍ത്ത് ഇന്ത്യയിലെ വിപണികളിൽ വലിയ വിജയം നേടിയിട്ടും അവയെ ‘പാൻ-ഇന്ത്യൻ’ സിനിമകളായി വിശേഷിപ്പിച്ചിരുന്നില്ല. ഈ സിനിമകള്‍ തമിഴ്, തെലുങ്ക് പതിപ്പുകളിൽ മികച്ച പ്രകടനം കാഴ്ചവെക്കുന്നത് നമ്മൾ കാണുന്നുണ്ട്. എന്നിട്ടും അവയെ ‘പാൻ-ഇന്ത്യൻ’ എന്ന് വിളിക്കുന്നില്ല, ഹിന്ദി സിനിമ എന്ന് തന്നെയാണ് പറയുന്നത്.
ഒരു ഹിന്ദി ചിത്രം ദക്ഷിണേന്ത്യയിൽ വിജയിക്കുമ്പോൾ ഹിന്ദി ചിത്രം എന്ന് വിളിക്കുന്നവര്‍ ഒരു ദക്ഷിണേന്ത്യൻ ചിത്രം രാജ്യത്തുടനീളം വിജയിക്കുമ്പോൾ എന്തുകൊണ്ടാണ് ഈ വിശേഷണം നൽകുന്നത്? എന്തുകൊണ്ട് ഹിന്ദി സിനിമകൾക്ക് ഇത് ഉപയോഗിക്കുന്നില്ല. രാജ്യത്തുടനീളം പ്രേക്ഷകരെ നേടുന്ന സൗത്ത് ഇന്ത്യന്‍ സിനിമകളെ ‘പാൻ-ഇന്ത്യ സിനിമകൾ’ എന്ന് വിളിക്കുന്നത് എന്തിനാണ് ? അതുകൊണ്ടാണ് എന്റെ സിനിമകളെ അങ്ങനെ വിശേഷിപ്പിക്കാൻ ഞാൻ ആഗ്രഹിക്കാത്തത്.
ആളുകൾ അത് ഉപയോഗിക്കുന്നത് എനിക്ക് തടയാനാവില്ല, പക്ഷേ ആ പ്രയോഗം എനിക്ക് അർത്ഥവത്തായി തോന്നുന്നില്ല. തമിഴ്, ഹിന്ദി, മലയാളം, കന്നഡ ഭാഷകളിലെ പ്രേക്ഷകരിലേക്ക് എത്താൻ ഞാൻ എപ്പോഴും ശ്രമിക്കും. ആ രീതി തുടരുക തന്നെ ചെയ്യും, എന്നാൽ എന്റെ സിനിമകൾക്ക് അത്തരം ലേബലുകൾ നൽകുന്നത് എനിക്ക് ഇഷ്ടമല്ല...’’ നാനി പറഞ്ഞു. തന്റെ ആക്ഷൻ-ത്രില്ലർ ചിത്രമായ ‘ദി പാരഡൈസ്’ ന്റെ പ്രൊമോഷനിടെയാണ് തന്റെ സിനിമയെ 'പാൻ-ഇന്ത്യ' റിലീസ് എന്ന് വിശേഷിപ്പിക്കരുതെന്ന് നാനി മാധ്യമങ്ങളോടും പൊതുജനങ്ങളോടും പ്രത്യേകം അഭ്യർത്ഥിച്ചത്. നാനിയുടെ പുതിയ പരാമർശം സിനിമാലോകത്ത് വലിയ ചർച്ചയാവുകയാണ്.
ശ്രീകാന്ത് ഒഡേല സംവിധാനം ചെയ്യുന്ന ‘ദി പാരഡൈസ്’, ‘ദസറ’യ്ക്ക് ശേഷം നാനിയും സംവിധായകനും ഒന്നിക്കുന്ന രണ്ടാമത്തെ ചിത്രമാണ്. 1980-കളിലെ സെക്കന്തരാബാദിന്റെ പശ്ചാത്തലത്തിൽ ഒരുങ്ങുന്ന ഈ ചിത്രം, ഫ്യൂഡൽ അടിച്ചമർത്തലുകൾക്കെതിരെ അംഗീകാരത്തിനായി പോരാടുന്ന പാർശ്വവൽക്കരിക്കപ്പെട്ട ഒരു വിഭാഗത്തിന്റെ കഥയാണ് പറയുന്നത്. ഈ ചിത്രത്തിൽ 'ജഡൽ സമാന' എന്ന കഥാപാത്രത്തെയാണ് നാനി അവതരിപ്പിക്കുന്നത്; തന്റെ കരിയറിലെ ഏറ്റവും ശാരീരിക അധ്വാനം ആവശ്യമുള്ള വേഷങ്ങളിലൊന്നാണിതെന്ന് താരം പറഞ്ഞിട്ടുണ്ട്. മോഹൻ ബാബു, രാഘവ് ജുയാൽ , കയാദു ലോഹർ , സൊനാലി കുൽക്കർണി, സമ്പൂർണേഷ് ബാബു എന്നിവരാണ് മറ്റ് പ്രധാന വേഷങ്ങളിലെത്തുന്നത്. കീർത്തി സുരേഷും ചിത്രത്തിൽ അതിഥി വേഷത്തിലെത്തുന്നുണ്ട്.
Comments