റിയാദിൽ ഹൂതി ആക്രമണം? സൗദി മിസൈൽ ജാഗ്രതാ നിർദ്ദേശം പുറപ്പെടുവിച്ചു

റിയാദ്: സൗദി അറേബ്യയിലെ കേന്ദ്രങ്ങൾ ലക്ഷ്യമിട്ട് ഹൂതികളുടെ ബാലിസ്റ്റിക് മിസൈൽ ആക്രമണം ഉണ്ടായെന്ന റിപ്പോർട്ടുകൾക്കിടയിൽ റിയാദിനും അൽ-ഖർജിനും ചുറ്റും സ്ഫോടനങ്ങൾ റിപ്പോർട്ട് ചെയ്യപ്പെട്ടു. റിയാദിലേക്കുള്ള ചില വിമാനങ്ങൾ വഴിതിരിച്ചുവിടുകയോ വൈകിക്കുകയോ ചെയ്തതായും റിപ്പോർട്ടുണ്ട്.

സൗദി അറേബ്യയിൽ ഇറാൻ പിന്തുണയുള്ള ഹൂതി വിഭാഗമായ അൻസാറുള്ളയുടെ വലിയൊരു ബാലിസ്റ്റിക് മിസൈൽ ആക്രമണമുണ്ടായെന്ന റിപ്പോർട്ടുകൾക്കിടയിലാണ് റിയാദിലും അൽ-ഖർജിലും പരിസരങ്ങളിലും അതിരാവിലെ സ്ഫോടനങ്ങൾ റിപ്പോർട്ട് ചെയ്യപ്പെട്ടത്. മിസൈലുകൾ വരുന്നതായി റിപ്പോർട്ടുകൾ വന്നതിനെത്തുടർന്ന് തലസ്ഥാനത്തും മറ്റ് പല നഗരങ്ങളിലും സൗദി സിവില്‍ ഡിഫൻസ് ജാഗ്രതാ നിർദ്ദേശം പുറപ്പെടുവിച്ചു. റിയാദ് അന്താരാഷ്ട്ര വിമാനത്താവളത്തിലേക്കുള്ള ചില വിമാനങ്ങൾ വഴിതിരിച്ചുവിട്ടതോ തടഞ്ഞുവെച്ചതോ ആയ വിവരങ്ങളും ഫ്ലൈറ്റ് ട്രാക്കിംഗ് ഡാറ്റയിലൂടെ വ്യക്തമായി.

റിയാദിനും അൽ-ഖർജിനും സമീപം സ്ഫോടനം നടക്കുന്നതായി കാണിക്കുന്ന ദൃശ്യങ്ങൾ ഓൺലൈനിൽ പ്രചരിക്കുന്നുണ്ട്. മറ്റൊരു ദൃശ്യത്തിൽ ഒരു പാട്രിയട്ട് മിസൈൽ പ്രതിരോധ സംവിധാനം ലക്ഷ്യം കാണുന്നതിൽ പരാജയപ്പെടുന്ന രീതിയിൽ ഒരു ബാലിസ്റ്റിക് മിസൈൽ താഴേക്ക് പതിക്കുന്നതും കാണാം. എന്നാൽ ഈ റിപ്പോർട്ടുകളും ദൃശ്യങ്ങളും സൗദി അധികൃതർ ഔദ്യോഗികമായി സ്ഥിരീകരിച്ചിട്ടില്ല.

അതേസമയം, അപകടം ഒഴിഞ്ഞതായി സൗദി സിവില്‍ ഡിഫൻസ് അറിയിച്ചു. മുൻപ് നൽകിയ ജാഗ്രതാ നിർദ്ദേശങ്ങൾക്ക് ശേഷം, റിയാദിലും അൽ-ഖർജിലും അപകടം ഒഴിഞ്ഞതായി സൗദി സിവില്‍ ഡിഫൻസ് പിന്നീട് അറിയിച്ചു.എക്സ് പ്ലാറ്റ്‌ഫോമിലെ വെവ്വേറെ പോസ്റ്റുകളിലൂടെ, സിവില്‍ ഡിഫൻസ് നിർദ്ദേശങ്ങൾ തുടർന്നും പാലിക്കണമെന്നും കൂട്ടംകൂടുകയോ ചിത്രീകരിക്കുകയോ ചെയ്യരുതെന്നും അധികൃതർ ജനങ്ങളോട് അഭ്യർത്ഥിച്ചു. റിപ്പോർട്ട് ചെയ്യപ്പെട്ട ആക്രമണങ്ങളുടെ ദൃശ്യങ്ങൾ ഓൺലൈനിൽ പോസ്റ്റ് ചെയ്യുന്നതിനെതിരെയും അധികൃതർ ജനങ്ങൾക്ക് മുന്നറിയിപ്പ് നൽകി.