തൃശൂര്‍: മുതിര്‍ന്നനേതാവ് തോമസ് ഉണ്യാടന്‍ കേരളകോണ്‍ഗ്രസ് ജോസഫ് വിഭാഗത്തില്‍ നിന്നും പുറത്തേക്ക്. പാര്‍ട്ടിയില്‍ നിന്നും വേണ്ടത്ര പരിഗണന കിട്ടുന്നില്ലെന്ന എന്നാണ് ആക്ഷേപം. കോണ്‍ഗ്രസ് പിന്തുണയോടെ മുമ്പോട്ട് പോകാനാണ് ഉദ്ദേശം. എന്നാല്‍ ഉണ്യാടന്റെ നീക്കത്തില്‍ തിടുക്കത്തില്‍ അനുനയ നീക്കം നടത്തേണ്ടതില്ലെന്ന നിലപാടാണ് കേരളാകോണ്‍ഗ്രസ്.
കേരളാകോണ്‍ഗ്രസിന്റെ ഇരു വിഭാഗത്തിന്റെയും സ്ഥാനാര്‍ത്ഥിയായി പല തവണ ജയിച്ച് നിയമസഭയില്‍ എത്തിയ അദ്ദേഹം പാര്‍ട്ടി മുതിര്‍ന്ന നേതാവായി പരിഗണിക്കുന്നില്ലെന്നാണ് ഉയര്‍ത്തുന്ന ആക്ഷേപം. 2001 ലാണ് ഇരിങ്ങാലക്കുടയില്‍ നിന്നും ആദ്യം മത്സരിച്ച് ജയിച്ചത്. തുടര്‍ച്ചയായി മൂന്ന് തവണ വിജയിക്കുകയും പിന്നീട് രണ്ടു തവണ തോല്‍ക്കുകയും ചെയ്തു.
നാലു തവണ യുഡിഎഫിന്റെ എംഎല്‍എ യായ തോമസ് ഉണ്യാടന്‍ മന്ത്രിസ്ഥാനം ആഗ്രഹിച്ചിരുന്നു. ഇത്തവണ യുഡിഎഫ് സര്‍ക്കാര്‍ രൂപീകരിച്ചപ്പോള്‍ രണ്ടു മന്ത്രിസ്ഥാനമാണ് ജോസഫ്ഗ്രൂപ്പ് ചോദിച്ചതെങ്കിലും കിട്ടിയത് ഒരു ചീഫ് വിപ്പ് സ്ഥാനമായിരുന്നു. അതിന് പരിഗണിച്ചതാകട്ടെ പി.ജെ. ജോസഫിന്റെ മകന്‍ അപു ജോസഫിനെയായിരുന്നു.
ഇതില്‍ കടുത്ത അതൃപ്തി രേഖപ്പെടുത്തുകയും പിന്നാലെ കോണ്‍ഗ്രസ് നേതാക്കളോട് അടുക്കുകയും ചെയ്തിരുന്നു. ജോസഫ് ഗ്രൂപ്പില്‍ നിന്നും പുറത്തുവന്നിരിക്കുന്ന അദ്ദേഹം കോണ്‍ഗ്രസ് പിന്തുണയോടെ ഒറ്റയ്ക്ക് മത്സരിക്കാനാണ് തീരുമാനം. പാര്‍ട്ടിയില്‍ നിന്നും പുറത്തുവന്നതോടെ കോണ്‍ഗ്രസ് പിന്തുണയില്‍ പുതിയ പാര്‍ട്ടി രൂപീകരിക്കുകയാണ് ലക്ഷ്യം.
അതേസമയം തോമസ് ഉണ്യാടനെ അവഗണിക്കാനാണ് ജോസഫ്ഗ്രൂപ്പിന്റെ ഉദ്ദേശം. പാര്‍ട്ടിക്കുള്ളില്‍ നിന്നും അദ്ദേഹത്തിന് കൂടുതല്‍ പരിഗണന നല്‍കുന്നത് ഒഴിവാക്കാനുള്ള നീക്കവും ജോസഫ് വിഭാഗം നടത്തുന്നുണ്ട്. പോകുന്നെങ്കില്‍ പൊയ്‌ക്കോട്ടെ എന്നാണ് ജോസഫ് ഗ്രൂപ്പിന്റെ വിലയിരുത്തല്‍. ഉണ്ണിയാടന്റെ നീക്കങ്ങള്‍ക്ക് വഴങ്ങേണ്ടതില്ലെന്നാണ് എടുത്തിരിക്കുന്ന നിലപാട്.
Comments