റൂർക്കി: ഐഐടി റൂർക്കിയിൽ നടത്തിയ പ്രസംഗത്തിനിടയിൽ ദേശീയ സുരക്ഷാ ഉപദേഷ്ടാവ് (എൻഎസ്എ) അജിത് ഡോവൽ 50 വർഷം മുമ്പ് നടന്ന തന്റെ രഹസ്യാന്വേഷണ ജീവിതത്തിന്റെ തുടക്കകാലത്തെ ഒരു സംഭവത്തെക്കുറിച്ച് വെളിപ്പെടുത്തി. തന്റെ രഹസ്യാന്വേഷണ കരിയർ തന്നെ അവസാനിച്ചേക്കാമായിരുന്ന ഒരു നിർണായക സംഭവത്തെക്കുറിച്ചാണ് അദ്ദേഹം ഓർത്തെടുത്തത്.
സിക്കിമിൽ വെച്ച് അതിർത്തി മാപ്പിലെ അബദ്ധം കാരണം തന്റെ ഏജന്റുമാരെ പീപ്പിൾസ് ലിബറേഷൻ ആർമി (പി‌ൽഎ) പിടികൂടിയതിനെക്കുറിച്ച് ബിരുദധാരികളുടെ കൂട്ടായ്മയെ അഭിസംബോധന ചെയ്തുകൊണ്ട് അദ്ദേഹം വിശദീകരിച്ചു. ഇരുപതുകളുടെ തുടക്കത്തിൽ, ഒരു ഐപിഎസ് ഉദ്യോഗസ്ഥനും സിക്കിമിൽ നിയമിതനായ ജൂനിയർ രഹസ്യാന്വേഷണ ഏജന്റും ആയിരുന്ന സമയത്ത്, സിക്കിം ഇന്ത്യയോട് കൂട്ടിച്ചേർക്കപ്പെടുന്നതിന് മുൻപ് അതിർത്തിയിലെ നീക്കങ്ങൾ നിരീക്ഷിക്കാൻ അജിത് ഡോവലിന് ഉത്തരവ് ലഭിച്ചിരുന്നു. ആ സമയത്താണ് സംഭവം നടക്കുന്നത്.
അതിർത്തിക്കപ്പുറത്തെ സാഹചര്യം നിരീക്ഷിക്കാൻ അഞ്ച്-ആറ് ദിവസത്തേക്ക് അയച്ച ദൗത്യ സംഘം, പത്ത് ദിവസമായിട്ടും തിരിച്ചെത്തിയിരുന്നില്ല.
അതിർത്തി പട്രോളിംഗിന് അയച്ച സംഘത്തെ കാണാതാവുകയും ചൈനീസ് സേന അവരെ കസ്റ്റഡിയിലെടുക്കുകയും ചെയ്ത വിവരം പറഞ്ഞ് ആസ്ഥാനത്തുനിന്ന് ഒരു ഫോൺ കോൾ ഡോവലിന് ലഭിച്ചു. പിന്നീട് അവർ തിരികെയെത്തി തിരികെവന്നവരെ ചോദ്യം ചെയ്തപ്പോൾ, അതിർത്തി പ്രദേശം മാപ്പ് ചെയ്യുന്നതിൽ വന്ന പിഴവാണ് പ്രശ്നമെന്ന് അന്വേഷണത്തിൽ വ്യക്തമായതിനെത്തുടർന്ന് ചൈനീസ് സേന അവരെ ഉപദ്രവിക്കാതെ വിട്ടയക്കുകയായിരുന്നുവെന്ന് മനസ്സിലായി.
വലിയ ഒരു ദുരന്തത്തിൽനിന്ന് തലനാരിഴയ്ക്ക് രക്ഷപ്പെട്ടതിനെക്കുറിച്ച് സംസാരിച്ച ഡോവൽ, തന്റെ ഔദ്യോഗിക ജീവിതത്തിലെ പ്രതിസന്ധികളെ നേരിടാൻ പരാജയങ്ങളും നിരന്തരമായ സമ്മർദ്ദങ്ങളും ഏതുതരത്തിൽ സഹായിച്ചു എന്ന് വ്യക്തമാക്കി.തടവിലായ തന്റെ ഏജന്റുമാരെക്കുറിച്ചുള്ള വിവരങ്ങൾ കാത്തിരുന്ന ആ യുവ ഏജന്റ്, തന്റെ കരിയർ അവിടെ അവസാനിച്ചേക്കാമെന്ന് ഭയപ്പെട്ടിരുന്നു.
ആ പ്രതിസന്ധിഘട്ടത്തിൽ ഒരു പ്രാദേശിക ഷെർപ്പ സുഹൃത്ത് അദ്ദേഹത്തിന്റെ സഹായത്തിനെത്തി. അതുവരെ ഓഫീസിനുള്ളിലിരുന്ന് മാപ്പുകൾ നോക്കി മാത്രം കാര്യങ്ങൾ വിലയിരുത്തിയിരുന്ന തനിക്ക്, താഴെത്തട്ടിലെ (ഫീൽഡ് ലെവലിലെ) യഥാർത്ഥ സാഹചര്യങ്ങളും വെല്ലുവിളികളും എന്താണെന്ന് മനസ്സിലാക്കി തന്നത് ആ ഷെർപ്പ സുഹൃത്താണെന്ന് അദ്ദേഹം ഓർത്തു. ഭാവിയിൽ ഇത്തരം അപകടകരവും നിർണ്ണായകവുമായ ദേശീയ സുരക്ഷാ ദൗത്യങ്ങളെ എങ്ങനെ സമീപിക്കണം, എങ്ങനെ കൃത്യമായ തീരുമാനങ്ങൾ എടുക്കണം എന്നതിനെക്കുറിച്ചുള്ള വിലയേറിയ പാഠങ്ങൾ ആ അനുഭവത്തിലൂടെയാണ് താൻ പഠിച്ചതെന്നും ഡോവൽ വ്യക്തമാക്കി.
ചൈനീസ് കസ്റ്റഡിയിൽ നിന്ന് മോചിതരായ ഏജന്റുമാർ തിരികെ എത്തിയ ശേഷം, അതിർത്തി മാപ്പിലെ അബദ്ധങ്ങൾ തിരുത്താനും ഭാവിയിലെ രഹസ്യാന്വേഷണ പ്രവർത്തനങ്ങൾ കൂടുതൽ കൃത്യതയോടെ മുന്നോട്ട് കൊണ്ടുപോകാനും അദ്ദേഹം ആ അനുഭവത്തെ ഒരു പാഠമായി ഉപയോഗിച്ചു.
Comments