എഡിറ്റിംഗ് കരിയറില്‍ നിന്നും അഭിനയത്തിലേക്ക് എത്തിയ യുവതാരമാണ് സംഗീത് പ്രതാപ്. മികച്ച എഡിറ്റർക്കുള്ള കേരള സംസ്ഥാന ചലച്ചിത്ര അവാർഡ് സ്വന്തമാക്കിയ താരം, അഭിനേതാവ് എന്ന നിലയിൽ ഹൃദയം എന്ന സിനിമയിലൂടെയാണ് അരങ്ങേറ്റം കുറിച്ചത്. സംഗീതിന് കരിയർബ്രേക്ക്‌ നൽകിയ ചിത്രം ഗിരീഷ് എ.ഡി സംവിധാനം ചെയ്ത പ്രേമലുവാണ്. അതിനു പിന്നാലെയെത്തിയ ഹൃദയപൂര്‍വ്വം, ബെത്ലേഹേം കുടുംബ യുണിറ്റ് എന്നിവയിലൂടെയാണ് താരം തന്റെ സ്ഥാനം വീണ്ടും മലയാളസിനിമയില്‍ ഉറപ്പിച്ചത്. അഭിനയത്തിലും എഡിറ്റിംഗിലും ഒരുപോലെ മികവു പുലർത്തുന്ന താരം, തന്റെ കരിയറിലെ ഏറ്റവും മികച്ച ഘട്ടത്തിലൂടെയാണ് കടന്നുപോകുന്നത്.
ഇപ്പോഴിതാ ഇറ്റ്സ് എ മെഡിക്കൽ മിറാക്കിൾ വിജയത്തില്‍ സംഗീത് പ്രതാപിനെ പ്രശംസിക്കുകയാണ് ഭാര്യ ആൻസി. ഈ സിനിമയ്ക്കായി സംഗീത് നടത്തിയ കഠിനാധ്വാനവും നേരിട്ട പ്രതിസന്ധികളും ഓരോ പരിശ്രമവും കണ്ടിട്ടുണ്ടെന്നും ‘റൂബൻ’ എന്ന കഥാപാത്രം തികച്ചും വ്യത്യസ്തമായ മറ്റൊരു വശം വെളിപ്പെടുത്തിയെന്നുമാണ് ആന്‍സി കുറിച്ചിരിക്കുന്നത്.
‘‘വികാരധീനയാകാതെ ഇത് എങ്ങനെ എഴുതണമെന്ന് എനിക്കറിയില്ല.. എന്റെ വികാരങ്ങളെ വാക്കുകളിലേക്ക് പകർത്താൻ ശ്രമിച്ചുകൊണ്ട് ഞാൻ ഇവിടെ ഇരിക്കുകയാണ്... എന്നാൽ അതിന് വാക്കുകൾ ഒരിക്കലും മതിയാകില്ലെന്ന് എനിക്ക് തോന്നുന്നു. ഈ സിനിമയ്ക്കായി താങ്കള്‍ നടത്തിയ കഠിനാധ്വാനവും നേരിട്ട പ്രതിസന്ധികളും ഓരോ പരിശ്രമവും ഞാൻ കണ്ടിട്ടുണ്ട്. ഹാസ്യ കഥാപാത്രങ്ങളിലൂടെ ഞങ്ങളെ ചിരിപ്പിക്കുന്ന നിങ്ങളെയാണ് ഞങ്ങൾ ഇതുവരെ കണ്ടിട്ടുള്ളത്; എന്നാൽ ‘റൂബൻ’ എന്ന കഥാപാത്രം നിങ്ങളിലെ തികച്ചും വ്യത്യസ്തമായ മറ്റൊരു വശമാണ് വെളിപ്പെടുത്തിയത്.
എനിക്ക് നിന്നെക്കുറിച്ച് വലിയ അഭിമാനം തോന്നുന്നു...ഇതും ഇതിലപ്പുറവുമായ പലതും നിങ്ങള്‍ക്ക് ചെയ്യാൻ കഴിയുമെന്ന് നീ തെളിയിച്ചിരിക്കുന്നു. നിരവധി ആളുകളുടെ കഠിനാധ്വാനവും സ്വപ്നങ്ങളും ഉറക്കമൊഴിഞ്ഞ നാളുകളും ഈ സിനിമയിൽ അടങ്ങിയിട്ടുണ്ട്... അത് ഒടുവിൽ യാഥാർത്ഥ്യമായി കാണുന്നത് ഇന്നത്തെ ദിവസത്തെ കൂടുതൽ സവിശേഷമാക്കുന്നു...’’ എന്നാണ് ആന്‍സി കുറിച്ചിരിക്കുന്നത്. ‘ഇറ്റ്സ് എ മെഡിക്കൽ മിറാക്കിൾ’ എന്ന ചിത്രത്തില്‍ റൂബിന്‍ എന്ന കഥാപാത്രമായിട്ടാണ് സംഗീത് എത്തുന്നത്. ഏറെ കൗതുകകരമായ ഒരു പ്രമേയം അവതരിപ്പിക്കുന്ന ചിത്രത്തിന് നല്ല രീതിയില്‍ നിരൂപ പ്രേക്ഷകപ്രശംസകളാണ് കിട്ടിക്കൊണ്ടിരിക്കുന്നത്. ദീർഘകാലം നീണ്ട കോമയിൽ നിന്ന് ശബ്ദവുമായി ബന്ധപ്പെട്ട ഒരു പ്രത്യേക ശക്തി കൈവരിച്ചുകൊണ്ട് ജീവിതത്തിലേക്ക് തിരിച്ചെത്തുന്ന റൂബിൻ എന്ന കഥാപാത്രമായിട്ടാണ് സംഗീത് പ്രതാപ് എത്തുന്നത്.
സംഗീത് പ്രതാപ് തന്റെ ജീവിതപങ്കാളിയായ ആൻസിയെ പരിചയപ്പെട്ട് വലിയ താമസമില്ലാതെയാണ് ഇരുവരും പ്രണയത്തിലായത്. കരിയറില്‍ മാത്രമല്ല വ്യക്തിജീവിതത്തിലും രണ്ടാളും വലിയ സന്തോഷത്തിലാണ്. സംഗീതും ഭാര്യ ആൻസിയും തങ്ങളുടെ ആദ്യത്തെ കൺമണിയെ വരവേൽക്കാനുള്ള ഒരുക്കത്തിലാണ്.
Comments