സെലിബ്രിറ്റികളെത്തുന്ന വേദികളില്‍ സദസ്സിനെ പിടിച്ചിരുത്തുന്നതില്‍ ഒരു വലിയ പങ്ക് അവതാരകര്‍ക്കുണ്ട്. മികച്ച അവതാരകരല്ലെങ്കില്‍ ആ വേദിയുടെ പോസിറ്റീവ് വൈബ് തന്നെ നഷ്ടപ്പെടും. മിനിസ്ക്രീന്‍ അവതാരകയായി തിളങ്ങിയിട്ടുള്ള മീര അനില്‍ പലപ്പോഴും വേദികളില്‍ വെച്ച്‌ അനാവശ്യ ചോദ്യങ്ങള്‍ ചോദിക്കുന്നതിന്റെ പേരില്‍ ട്രോളുകളും പരിഹാസങ്ങളും വിമര്‍ശനങ്ങളും ഏറ്റുവാങ്ങിയിട്ടുണ്ട്.
ഇപ്പോഴിതാ അത്തരത്തില്‍ വീണ്ടും മീരയുടെ ഒരു ചോദ്യം വലിയ വിമര്‍ശനങ്ങള്‍ക്ക് വഴിവച്ചിരിക്കുകയാണ്. എന്നാല്‍ അതേസമയം ആസിഫ് അലി സമയോചിതമായി ഇടപെട്ടതിനെ കൈയടിക്കുകയും ചെയ്യുന്നുണ്ട് ആരാധകര്‍. കോഴിക്കോട് വെച്ച്‌ ആസിഫ് അലി പങ്കെടുത്തൊരു പരിപാടിക്കിടെയാണ് സംഭവം നടന്നത്. മീരയുടെ പക്വതയില്ലാത്ത ഇടപെടലിനെ അപ്പോള്‍ തന്നെ ആസിഫ് വേദിയില്‍ വച്ച് തടയുകയും ചെയ്തു.
ഒരു സ്വകാര്യ സ്ഥാപനത്തിന്റെ ഐഫോണ്‍ 18 ലോഞ്ച് ആയിരുന്നു വേദി. പ്രൊമോഷന്റെ ഭാഗമായി നടത്തിയ നറുക്കെടുപ്പിലെ വിജയിക്ക് സമ്മാനം നല്‍കാനാണ് ആസിഫ് അലി അതിഥിയായി എത്തിയത്. ഐഫോണ്‍ തന്നെയാണ് വിജയിക്ക് ലഭിക്കുന്ന സമ്മാനം.
പരിപാടിക്കിടെ നറുക്കെടുപ്പില്‍ ജയിച്ച യുവാവിനോട് അവതാരകയായ മീര അനില്‍ സ്‌റ്റേജിലേക്ക് വരാന്‍ ആവശ്യപ്പെട്ടു. വേദിയിലെത്തിയ ഉടനെ യുവാവിനെ ആശംസിച്ച മീര, പെട്ടെന്നു തന്നെ യുവാവിന്റെ പഴയ ഫോണ്‍ കാണിക്കാൻ മീര പറഞ്ഞു. ഇത് യുവാവ് പോക്കറ്റില്‍ നിന്നും എടുക്കാൻ ശ്രമിക്കുന്നതിനിടെ ആസിഫ് മീരയെ തടഞ്ഞു. അനാവശ്യ ചോദ്യം ഒഴിവാക്കാന്‍ മീരയോട് ആസിഫ് ആംഗ്യവും കാണിച്ചു. ഇതോടെ മീര പിൻവാങ്ങുകയും ചെയ്തു. നിമിഷനേരം കൊണ്ടാണ് ഈ വീഡിയോ സോഷ്യല്‍ മീഡിയയില്‍ വൈറലായത്.
നിരവധി പേര്‍ മീരയെ വിമർശിച്ചും ആസിഫിന്റെ ഇടപെടലിന് കൈയ്യടിച്ചും കമന്റുകള്‍ നല്‍കുന്നുണ്ട്. ‘അവതാരക എന്ന നിലയില്‍ ഇനിയെങ്കിലും പക്വതയോടെ പെരുമാറാൻ മീര ശ്രമിക്കണം, ഒരു വ്യക്തിയുടെ ആത്മാഭിമാനത്തെ ചോദ്യം ചെയ്യരുത്...’ എന്നതടക്കമുള്ള കമന്റുകളാണ് മീരയ്ക്കെതിരെ വരുന്നത്. അതേ സമയം ആസിഫ് മികച്ച നടൻ മാത്രമല്ല നല്ലൊരു മനുഷ്യൻ കൂടിയാണെന്നും കമന്റുകളുണ്ട്. ‘ചില മനുഷ്യരോട് നമുക്ക് ഇഷ്ടം തോന്നും, അവരുടെ പെരുമാറ്റം കൊണ്ടാണത്, മറ്റുള്ളവരുടെ അഭിമാനത്തേക്കാള്‍ വലുതല്ല ഒരു സമ്മാനവും എന്നറിയാം ആസിഫ് അലിക്ക്, നല്ല മനസ്സുള്ളവർക്കേ അങ്ങനെയൊക്കെ പറയാൻ പറ്റുള്ളൂ...’ എന്നതടക്കമാണ് കമന്റുകള്‍.
Comments