മിനിസ്‍ക്രീനിലൂടെ കരിയര്‍ ആരംഭിച്ച് കൈയടി നേടിയ ശേഷം ബിഗ്സ്ക്രീനില്‍ തന്റേതായ ഐഡന്റിറ്റി സ്വന്തമാക്കിയ താരമാണ് സ്വാസിക വിജയ്. ബോള്‍ഡായ ഒരുപിടി വേഷങ്ങൾ ചെയ്താണ് സ്വാസിക വെള്ളിത്തിരയില്‍ ശ്രദ്ധിക്കപ്പെട്ടത്. മികച്ച നടിക്കുള്ള കേരള സംസ്ഥാന ചലച്ചിത്ര പുരസ്കാരമടക്കം സ്വന്തമാക്കിയ താരം, സൂര്യ നായകനായി എത്തിയ ആർജെ ബാലാജി ചിത്രം കറുപ്പിലും മികച്ച പ്രകടനം കാഴ്‌ചവച്ചു. ലബ്ധര്‍പന്ത് എന്ന തമിഴ് ചിത്രത്തിലെ സ്വാസികയുടെ പ്രകടനവും ശ്രദ്ധിക്കപ്പെട്ടതാണ്. മികച്ച ഒരു നര്‍ത്തകി കൂടിയായ സ്വാസിക സോഷ്യല്‍ മീഡിയയിലും തിളങ്ങി നില്‍ക്കുന്ന താരമാണ്.
കരിയറില്‍ തിളങ്ങി നില്‍ക്കുമ്പോള്‍ തന്നെയാണ് ടെലിവിഷന്‍ താരവും മോഡലുമായ പ്രേം ജേക്കബിനെ സ്വാസിക വിവാഹം ചെയ്തത്. ഒരുമിച്ചഭിനയിച്ച സീരിയലിലൂടെ സുഹൃത്തുക്കളായ സ്വാസികയും പ്രേമും പിന്നീടാണ് പ്രണയത്തിലായത്. പിന്നീടത് വിവാഹത്തിലേക്ക് എത്തുകയായിരുന്നു. വിവാഹിതയാകാന്‍ താന്‍ ഏറെ ആഗ്രഹിച്ചിരുന്നുവെന്നും ഭാര്യയെന്ന പദവിയില്‍ ഏറെ സംതൃപ്തയാണെന്നും പലതവണ സ്വാസിക പറഞ്ഞിട്ടുണ്ട്.
ഇപ്പോഴിതാ പ്രേമിനൊപ്പമുള്ള പ്രണയാതുരമായ ചിത്രങ്ങള്‍ പങ്കിടുകയാണ് സ്വാസിക. ഇത്രയധികം പെൺകുട്ടികൾക്കിടയിൽ നിന്ന് തന്നെ എങ്ങനെ തെരഞ്ഞെടുത്തുവെന്നും പ്രേമിന് വേറെ ആരെയും കിട്ടിയില്ലേ എന്ന കമന്റുകള്‍ താനും വായിച്ചിട്ടുണ്ടെന്നുമാണ് സ്വാസിക കുറിച്ചിരിക്കുന്നത്.
‘‘ഇത്രയധികം പെൺകുട്ടികൾക്കിടയിൽ നിന്ന് എങ്ങനെയോ നീ എന്നെ തിരഞ്ഞെടുത്തു... ‘പ്രേമിന് വേറെ ആരെയും കിട്ടിയില്ലേ?’ എന്ന് ചോദിച്ചുള്ള കമന്റുകൾ ഞാനും കണ്ടിട്ടുണ്ട്....
പക്ഷേ സത്യം പറഞ്ഞാൽ, എനിക്ക് ഭാഗ്യമുണ്ടെന്ന് തോന്നുന്നു... കാരണം എനിക്ക് നിന്നെ കിട്ടിയല്ലോ...എന്റെ ജീവിതത്തിൽ നിന്നെ ലഭിച്ചത് എപ്പോഴും ഒരു ഭാഗ്യമായി കരുതുന്നു...’’ എന്നാണ് പ്രേമിനൊപ്പമുള്ള റൊമാന്റിക് ചിത്രങ്ങള്‍ പങ്കിട്ട് സ്വാസിക കുറിച്ചിരിക്കുന്നത്. പോസ്റ്റിനു താഴെ ഇവരുടെ ജോഡിയെ പ്രശംസിച്ച് പലരും കമന്റുകള്‍ കുറിക്കുന്നുണ്ട്. ‘ആരാണ് അങ്ങനെ കമന്റ് ചെയ്തത്??നിങ്ങൾ രണ്ടുപേരും തമ്മിൽ നല്ല ജോഡിയാണ്..., ഇരുവരെയും ഒന്നിച്ചുള്ള ഒരു നല്ല സിനിമ എത്രയും വേഗം ഉണ്ടാകട്ടെ, ക്യൂട്ട് കപ്പിള്‍ പ്രേംസിക...’ എന്നതടക്കമാണ് കമന്റുകള്‍.
Comments