ചെന്നൈ: പ്രതിപക്ഷ കക്ഷികളുടെയും ജനങ്ങളുടെയും അഭിപ്രായങ്ങൾ അവഗണിച്ച് ഏകപക്ഷീയമായി തീരുമാനങ്ങളുമായി മുന്നോട്ടുപോയാൽ തമിഴക വെട്രി കഴകം (ടിവികെ) സർക്കാരിനുള്ള പിന്തുണ പുനഃപരിശോധിക്കാൻ നിർബന്ധിതരാകുമെന്ന് സിപിഎം. ചെന്നൈ പട്ടണപ്പാക്കത്ത് പുതിയ സെക്രട്ടേറിയറ്റും നിയമസഭാ സമുച്ചയവും നിർമിക്കാനുള്ള സർക്കാർ നീക്കത്തിനെതിരെ സിപിഎം സംഘടിപ്പിച്ച പ്രതിഷേധത്തിനിടെയാണ് തമിഴ്നാട് സംസ്ഥാന സെക്രട്ടറി പി. ഷൺമുഖം മുന്നറിയിപ്പ് നൽകിയത്.
തമിഴ്നാട്ടിലെ 34 ശതമാനം ആളുകളുടെ വോട്ടാണ് വിജയ്‌യുടെ നേതൃത്വത്തിലുള്ള ടിവികെയ്ക്ക് ലഭിച്ചതെന്ന് ഷൺമുഖം ചൂണ്ടിക്കാട്ടി. സിപിഎമ്മും സിപിഐയും ഉൾപ്പെടെയുള്ള പാർട്ടികളുടെ പിന്തുണയോടെയാണ് സർക്കാർ നിലനിൽക്കുന്നതെന്നും അദ്ദേഹം പറഞ്ഞു.
ഏകപക്ഷീയമായ തീരുമാനങ്ങളുമായി സർക്കാർ മുന്നോട്ടുപോകുന്ന സാഹചര്യം തുടർന്നാൽ നിലപാട് മാറ്റാൻ പാർട്ടി നിർബന്ധിതമാകും. അധികാരത്തിലിരിക്കുന്നവർ അടിസ്ഥാന ജനാധിപത്യ മര്യാദകൾ പാലിക്കാൻ തയ്യാറാകണമെന്നും ഷൺമുഖം ആവശ്യപ്പെട്ടു.
ഒക്ടോബർ ആറിന് മധുരാന്തകം, ധാരാപുരം സംവരണ മണ്ഡലങ്ങളിൽ നടക്കുന്ന ഉപതെരഞ്ഞെടുപ്പുകളിൽ ഇടതുപക്ഷ പാർട്ടികൾ സ്വന്തം നിലയിൽ മത്സരിക്കുമെന്ന് പ്രഖ്യാപിച്ചതിന് പിന്നാലെയാണ് സിപിഎം നിലപാട് കടുപ്പിച്ചത്.
Comments