കോഴിക്കോട്: ഔദ്യോഗിക ആവശ്യങ്ങൾക്കായി മന്ത്രി കെ.എം. ഷാജി സുഹൃത്തിന്റെ ഉടമസ്ഥതയിലുള്ള ആഡംബര റേഞ്ച് റോവർ കാർ ഉപയോഗിച്ചതുമായി ബന്ധപ്പെട്ട വിവാദത്തിൽ പ്രതികരിച്ച് കൃഷി മന്ത്രി ടി. സിദ്ദിഖ്. കഴിഞ്ഞ സർക്കാരിന്റെ കാലത്തും മന്ത്രിമാർ സ്വന്തം വാഹനങ്ങൾ ഉപയോഗിച്ചിട്ടുണ്ടെന്നും കെ.എം. ഷാജിയുടെ നടപടിയിൽ നിയമവിരുദ്ധമായി ഒന്നുമില്ലെന്നും സിദ്ദിഖ് പറഞ്ഞു.
നാല് ലക്ഷം കിലോമീറ്റർ ഓടിയ ഔദ്യോഗിക വാഹനത്തിന് പകരം സ്വന്തം നിലയിൽ മറ്റൊരു കാർ ഉപയോഗിച്ചതാണോ തെറ്റെന്ന് മന്ത്രി ചോദിച്ചു. കെ.എം. ഷാജി ചെയ്തതിൽ നിയമവിരുദ്ധമായി ഒന്നുമില്ലെന്നും സിദ്ദിഖ് വ്യക്തമാക്കി.
കർഷക മരണങ്ങളിലും കൃഷിനാശത്തിലും സർക്കാർ നഷ്ടപരിഹാര തുക ഉയർത്തുമെന്നും മന്ത്രി പറഞ്ഞു. നഷ്ടപരിഹാരം 100 ശതമാനം വരെ ഉയർത്തിയാലും അത്ഭുതപ്പെടേണ്ടതില്ലെന്നും അദ്ദേഹം വ്യക്തമാക്കി.
വന്യജീവി ആക്രമണങ്ങൾ ശാസ്ത്രീയമായി പരിശോധിച്ച് പരിഹാരം കണ്ടെത്തുന്നതിനായി ഈ മാസം 29ന് തിരുവമ്പാടിയിൽ കൃഷി വകുപ്പിന്റെ നേതൃത്വത്തിൽ കോൺക്ലെവ് സംഘടിപ്പിക്കും. കൃഷി, വനം വകുപ്പുകൾക്കും വിവിധ ഗവേഷണ സ്ഥാപനങ്ങൾക്കും പുറമെ ബന്ധപ്പെട്ട മേഖലകളിലുള്ളവരും കോൺക്ലേവിൽ പങ്കെടുക്കും.
പരമ്പരാഗത പ്രതിരോധ മാർഗങ്ങൾക്കൊപ്പം എ.ഐ. ഉൾപ്പെടെയുള്ള സാങ്കേതിക സംവിധാനങ്ങൾ ഉപയോഗിക്കുന്നതിനെക്കുറിച്ചും കോൺക്ലേവിൽ ചർച്ച ചെയ്യും. നിലവിലെ സാഹചര്യം ‘മനുഷ്യ-വന്യജീവി സംഘർഷം’ എന്നതിനേക്കാൾ ഏകപക്ഷീയമായ വന്യജീവി ആക്രമണമാണെന്ന് മന്ത്രി പറഞ്ഞു. ഇനി ‘മനുഷ്യ-വന്യജീവി സംഘർഷം’ എന്നതിന് പകരം ‘വന്യജീവി ആക്രമണം’ എന്ന പ്രയോഗം ഉപയോഗിക്കുമെന്നും സിദ്ദിഖ് കൂട്ടിച്ചേർത്തു.
Comments