കാന്‍സര്‍ ബാധിച്ച് ചികിത്സയില്‍ കഴിയുന്ന രേണു സുധിയുടെ ആരോഗ്യ നില ഗുരുതരമാണെന്ന് അറിയിച്ച് സുഹൃത്ത് ശാരിക. സോഷ്യല്‍ മീഡിയയില്‍ പങ്കുവെച്ച വീഡിയോയിലൂടെയാണ് ശാരിക ഇക്കാര്യം പറഞ്ഞത്.
അഞ്ച് കീമോതെറാപ്പികള്‍ പൂര്‍ത്തിയാക്കിയതിന് പിന്നാലെയാണ് ആരോഗ്യനില കൂടുതല്‍ വഷളായത്. പ്ലേറ്റ്‌ലെറ്റ് കൗണ്ട് വളരെ കുറഞ്ഞതിനെ തുടര്‍ന്ന് കോട്ടയം മെഡിക്കല്‍ കോളേജ് ആശുപത്രിയിലെ ഐസിയുവില്‍ പ്രവേശിപ്പിച്ചിരിക്കുകയാണ്.
അഞ്ചാമത്തെ കീമോയ്ക്ക് ശേഷം എഴുന്നേല്‍ക്കാന്‍ പോലും കഴിയാത്ത വിധം ആരോഗ്യനില മോശമായെന്നും, നിലവിലെ സാഹചര്യത്തില്‍ മറ്റൊരു കീമോ നല്‍കുന്നത് വലിയ അപകടസാധ്യതയുള്ളതിനാല്‍ ഡോക്ടര്‍മാര്‍ അതിന് തയ്യാറാകുന്നില്ലെന്നും ശാരിക പറഞ്ഞു.
ഭക്ഷണം കഴിക്കാന്‍ ബുദ്ധിമുട്ടുള്ളതിനാല്‍ ആവശ്യമായ പോഷകങ്ങളും മരുന്നുകളും നല്‍കുന്നതിനുള്ള പ്രത്യേക സംവിധാനങ്ങള്‍ ഏര്‍പ്പെടുത്തിയിട്ടുണ്ടെന്നും ശാരിക പറയുന്നു.
അന്തരിച്ച നടനും മിമിക്രി കലാകാരനുമായ കൊല്ലം സുധിയുടെ ഭാര്യയാണ് രേണു സുധി. സുധിയുടെ മരണശേഷമാണ് രേണു മലയാളികള്‍ക്ക് കൂടുതല്‍ സുപരിചതയാകുന്നത്. സോഷ്യല്‍ മീഡിയയിലും ആല്‍ബങ്ങളിലുമൊക്കെ തിളങ്ങി നില്‍ക്കുന്ന സമയത്താണ് തനിക്ക് കാന്‍സര്‍ ആണെന്ന വിവരം രേണു വെളിപ്പെടുത്തിയത്. കോട്ടയം മെഡിക്കല്‍ കോളേജിലാണ് താരം ചികിത്സ തേടുന്നത്.
Comments