നടി അഹാന കൃഷ്ണയുടെ വിവാഹാഘോഷ ചിത്രങ്ങളും വീഡിയോകളും സോഷ്യൽ മീഡിയയിൽ തരംഗമാകുന്നതിനിടെ, സഹോദരി ദിയ കൃഷ്ണയുടെ ഭർത്താവ് അശ്വിൻ ഗണേഷിനെതിരെ ഉയർന്ന സൈബർ അധിക്ഷേപങ്ങളും ചർച്ചയാകുകയാണ്. വിവാഹദിവസം മകൻ ഓമിയെ മുഴുവൻ സമയവും കയ്യിലെടുത്ത് പരിചരിച്ച അശ്വിന്റെ ചിത്രങ്ങൾ പുറത്തുവന്നതിന് പിന്നാലെയാണ് ഒരു വിഭാഗം ആളുകൾ പരിഹാസവുമായി രംഗത്തെത്തിയത്.
അശ്വിൻ ഭാര്യയുടെ അടിമയാണെന്നും കുഞ്ഞിനെ നോക്കലാണ് ഇയാളുടെ പ്രധാന ജോലിയെന്നുമുള്ള രീതിയിലുള്ള മോശം കമന്റുകളാണ് ചിലർ പങ്കുവെച്ചത്. എന്നാൽ ഇത്തരം അധിക്ഷേപങ്ങൾക്കെതിരെ ശക്തമായ വിമർശനവും ഉയരുന്നുണ്ട്. ഇതിനെതിരെ ദിയ കൃഷ്ണ തന്നെ രംഗത്തെത്തിയിരിക്കുകയാണ്.അശ്വിനെ പരിഹസിച്ചവർക്ക് കൃത്യമായ മറുപടി നൽകിക്കൊണ്ട് ഇൻഫ്ലുവൻസറായ സുധി പങ്കുവെച്ച വീഡിയോ ഇൻസ്റ്റാഗ്രാം സ്റ്റോറിയായി പങ്കുവെച്ചുകൊണ്ടാണ് ദിയ പ്രതികരിച്ചത്. നിങ്ങള്‍ പറഞ്ഞത് വളരെ ശരിയാണ് എന്ന കമന്റോടെയാണ് ദിയ വീഡിയോ സ്‌റ്റോറിയാക്കിയിരിക്കുന്നത്.
'ഒരു അച്ഛന്‍ തന്റെ കുഞ്ഞിനെ എടുത്തു കൊണ്ട് നടക്കുന്ന വീഡിയോയാണിത്. അതിന്റെ താഴെ വന്നിരിക്കുന്ന കമന്റുകള്‍ കാണിച്ചു തരാം. എനിക്ക് ഈ കമന്റുകള്‍ മനസിലാകുന്നില്ല. തന്റെ കുഞ്ഞിനെ എടുത്തു നടക്കുന്ന ഒരു അച്ഛന്റെ വീഡിയോയെ പരിഹസിക്കാന്‍ മാത്രം എന്താണുള്ളതെന്ന് എനിക്ക് മനസിലാകുന്നില്ല. ആ കുട്ടിയുടെ അമ്മ എന്തെങ്കിലും തിരക്കിലാകാം, ശാരീര ബുദ്ധിമുട്ടുകള്‍ കാണാം. ഇതൊന്നുമല്ലെങ്കിലും, അച്ഛന്റേയും കൂടെ ഉത്തരവാദിത്തമല്ലേ തന്റെ കുഞ്ഞിനെ നോക്കുകയെന്നത്. അതിനെ ഇത്തരത്തില്‍ നോക്കി കാണുന്നത് എന്തിനാണ്?' എന്നാണ് യുവാവ് വീഡിയോയില്‍ ചോദിക്കുന്നത്.
''പക്ഷെ ഒരു സ്ത്രീ തന്റെ കരിയറും വിദ്യാഭ്യാസവും ഭര്‍ത്താവിനും കുഞ്ഞിനും വേണ്ടി മാറ്റി വച്ച് കുടുംബത്തില്‍ നിന്നാല്‍ അവള്‍ മാതൃകാ സ്ത്രീയാകും സമൂഹത്തില്‍. ഇതേ കാര്യം ഒരു പുരുഷന്‍, തന്റെ ഭാര്യയുടെ ബിസിനസിന് പിന്തുണയുമായി നില്‍ക്കുകയാണെങ്കില്‍ അവനെ ഇത്തരത്തിലുള്ള കമന്റുകള്‍ വിളിക്കും. ഏറ്റവും വലിയ തമാശ എന്താണെന്ന് വച്ചാല്‍, സോഷ്യല്‍ മീഡിയയിലൂടെ ഒരു പുരുഷനെ എത്രത്തോളം ആക്രമിക്കാന്‍ പറ്റുമോ അത്രയും ആക്രമിച്ചിട്ട്, എവിടെയെങ്കിലും എന്തെങ്കിലും നടക്കുമ്പോള്‍ പുരുഷന്മാരുടെ പ്രശ്‌നം ആരും ചര്‍ച്ച ചെയ്യുന്നില്ലേ, ഞങ്ങളെ സഹായിക്കാന്‍ ആരുമില്ലേ എന്ന് പറയുന്ന ആള്‍ക്കാരുടെ പ്രതീകമാണ് ഈ കമന്റ് ബോക്‌സ്'' എന്നും വീഡിയോയില്‍ പറയുന്നുണ്ട്.
Comments