താജ്മഹൽ കാണാനെത്തിയ വിദേശ വനിത ഫോട്ടോഷൂട്ട് നടത്തുന്നതിനിടെ സമീപത്ത് നിന്ന് തുടർച്ചയായി നോക്കിനിന്ന യുവാക്കളോട് ക്ഷുഭിതനായി ഫോട്ടോഗ്രാഫർ. ആഗ്രയിലെ താജ്മഹലിലാണ് സംഭവം. വിദേശ വനിതയ്ക്ക് അസ്വസ്ഥതയുണ്ടാക്കുന്ന തരത്തിൽ മൂന്ന് യുവാക്കൾ സമീപത്ത് തുടരുന്നതായി ശ്രദ്ധയിൽപ്പെട്ടതോടെയാണ് ഫോട്ടോഗ്രാഫർ ഇവരെ ചോദ്യം ചെയ്തത്. സംഭവത്തിന്റെ വീഡിയോ സമൂഹമാധ്യമങ്ങളിൽ പ്രചരിച്ചതോടെ വലിയ ചർച്ചയ്ക്കും വഴിവെച്ചിരിക്കുകയാണ്.
വീഡിയോയിൽ താജ്മഹലിന് മുന്നിൽ വിദേശ വനിത ഫോട്ടോയ്ക്ക് പോസ് ചെയ്യുന്നതും മൂന്ന് യുവാക്കൾ സമീപത്ത് നിന്ന് അവരെ നോക്കിനിൽക്കുന്നതുമാണ് കാണുന്നത്. ഇതോടെ ഫോട്ടോഗ്രാഫർ യുവാക്കളുടെ അടുത്തെത്തി, “എന്തിനാണ് ഇവിടെ നിൽക്കുന്നത്? താജ്മഹൽ കാണാനാണ് വന്നതെങ്കിൽ പോയി കാണൂ. എന്തിനാണ് അവരുടെ അടുത്ത് നിൽക്കുന്നത്?” എന്ന് ചോദിക്കുന്നുണ്ട്. എന്നാൽ തങ്ങൾ തെറ്റൊന്നും ചെയ്തിട്ടില്ലെന്ന രീതിയിൽ യുവാക്കളിൽ ഒരാൾ മറുപടി നൽകിയതോടെ വാക്കുതർക്കം തുടരുകയായിരുന്നു.
തുടർന്ന് മറ്റൊരാൾ ഇടപെട്ട് യുവാക്കളോട് അവിടെ നിന്ന് മാറിപ്പോകാൻ ആവശ്യപ്പെട്ടു. ഇതോടെ യുവാക്കൾ സ്ഥലത്തുനിന്ന് മാറുകയായിരുന്നു. വിദേശ വിനോദസഞ്ചാരികൾക്ക് അസ്വസ്ഥതയുണ്ടാക്കുന്ന തരത്തിലുള്ള പെരുമാറ്റം ഒഴിവാക്കണമെന്നും അവരുടെ സ്വകാര്യ ഇടത്തെ മാനിക്കണമെന്നും ഫോട്ടോഗ്രാഫർ പിന്നീട് സമൂഹമാധ്യമ കുറിപ്പിലൂടെ ആവശ്യപ്പെട്ടു. വിനോദസഞ്ചാര കേന്ദ്രങ്ങളിൽ വിദേശ സഞ്ചാരികൾക്ക് നേരിടേണ്ടിവരുന്ന അനാവശ്യ ശ്രദ്ധയെക്കുറിച്ചും അദ്ദേഹം ചൂണ്ടിക്കാട്ടി.
വീഡിയോ പുറത്തുവന്നതിന് പിന്നാലെ നിരവധി പേരാണ് ഫോട്ടോഗ്രാഫറുടെ ഇടപെടലിനെ പിന്തുണച്ച് രംഗത്തെത്തിയത്. വിദേശ സഞ്ചാരികളുടെ വ്യക്തിപരമായ ഇടം മാനിക്കണമെന്നും താജ്മഹൽ പോലുള്ള വിനോദസഞ്ചാര കേന്ദ്രങ്ങളിൽ ഉത്തരവാദിത്തത്തോടെയുള്ള പെരുമാറ്റം വേണമെന്നുമാണ് പലരും അഭിപ്രായപ്പെട്ടത്. സംഭവത്തെ ചുറ്റിപ്പറ്റിയുള്ള ചർച്ച ഇപ്പോൾ സോഷ്യൽ മീഡിയയിലും സജീവമാണ്.
Comments