രോഗിയുടെ ബന്ധുക്കളുമായുള്ള വാക്കുതർക്കത്തിനിടെ ഡോക്ടർ മുറിയിൽ നിന്ന് ഇറങ്ങിപ്പോകുന്ന ദൃശ്യങ്ങളാണ് ഇപ്പോൾ സമൂഹമാധ്യമങ്ങളിൽ വൈറലാകുന്നത്. മധ്യപ്രദേശിലെ അംബാഹ് സിവിൽ ആശുപത്രിയിലാണ് സംഭവം. സെപ്റ്റംബർ 16 ന് ഡ്യൂട്ടിയിലുണ്ടായിരുന്ന ഡോ. ആർതി ദണ്ഡോതിയയുമായി രോഗികളുടെ ബന്ധുക്കൾ വാക്കുതർക്കത്തിലേർപ്പെടുകയായിരുന്നു. ഇതിനിടെ ചിലർ മൊബൈൽ ഫോണിൽ ദൃശ്യങ്ങൾ പകർത്തുകയും ഡോക്ടർ അവിടെനിന്ന് മാറിപ്പോകുകയും ചെയ്തു.
വീഡിയോയിൽ ആശുപത്രിയിലെ മേശയ്ക്കരികിൽ ഇരിക്കുന്ന ഡോക്ടറെ ചിലർ ചുറ്റിനിൽക്കുന്നതും ഒരാൾ രോഗിയെ പരിശോധിക്കണമെന്ന് ആവശ്യപ്പെടുന്നതുമാണ് കാണുന്നത്. വാക്കുതർക്കം രൂക്ഷമായതോടെ ഡോക്ടർ എഴുന്നേറ്റ് മറ്റൊരു മുറിയിലേക്ക് പോകുകയായിരുന്നു. “എവിടേക്കാണ് പോകുന്നത്?” എന്ന് ഒരാൾ ചോദിക്കുന്നതും വീഡിയോയിൽ കേൾക്കാം. ഡോക്ടർ രോഗിക്ക് ചികിത്സ നിഷേധിച്ചുവെന്ന ആരോപണത്തോടെയാണ് ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചത്.
എന്നാൽ സംഭവത്തെക്കുറിച്ച് ആശുപത്രി അധികൃതർ നൽകിയ വിശദീകരണം മറ്റൊന്നാണ്. മൂന്ന് പരിക്കേറ്റവർ രണ്ട് ദിവസം മുമ്പ് ആശുപത്രിയിലെത്തിയിരുന്നെന്നും ഡോ. ആർതി ഉൾപ്പെടെയുള്ളവർ അവരെ ചികിത്സിച്ചിരുന്നെന്നും അംബാഹ് ബ്ലോക്ക് മെഡിക്കൽ ഓഫീസർ പ്രമോദ് ശർമ പറഞ്ഞു. ചികിത്സ കഴിഞ്ഞ ശേഷമാണ് ഡോക്ടറും രോഗികളുടെ ബന്ധുക്കളും തമ്മിൽ തർക്കമുണ്ടായതെന്നും ബന്ധുക്കൾ മൊബൈൽ ഫോണിൽ ഡോക്ടറെ ചിത്രീകരിക്കാൻ തുടങ്ങിയതോടെയാണ് അവർ അവിടെനിന്ന് മാറിയതെന്നും അദ്ദേഹം വ്യക്തമാക്കി. അതിനാൽ വൈറലായ വീഡിയോ രോഗികൾക്ക് ചികിത്സ നിഷേധിക്കുന്ന ദൃശ്യങ്ങളല്ലെന്നാണ് ആശുപത്രിയുടെ വിശദീകരണം.
സംഭവം ചർച്ചയായതിന് പിന്നാലെ ഐപിഎസ് ഉദ്യോഗസ്ഥൻ അരുൺ ബോത്ര ഡോക്ടർക്ക് പിന്തുണയുമായി രംഗത്തെത്തി. ഡോക്ടർമാരുടെ ജോലി രോഗികളെ ചികിത്സിക്കുകയാണെന്നും അധിക്ഷേപമോ ഭീഷണിപ്പെടുത്തലോ സഹിക്കേണ്ട ബാധ്യത അവർക്കില്ലെന്നും അദ്ദേഹം എക്സിലെ കുറിപ്പിൽ പറഞ്ഞു. സംഘർഷം രൂക്ഷമാകുന്ന സാഹചര്യത്തിൽ അവിടെനിന്ന് മാറിനിൽക്കുന്നത് തെറ്റായി കാണേണ്ടതില്ലെന്നും ഡോക്ടർമാരുടെ സുരക്ഷയും പ്രധാനമാണെന്നും അദ്ദേഹം അഭിപ്രായപ്പെട്ടു. അതേസമയം, രോഗികളുടെ പരിചരണം തർക്കങ്ങൾക്കിടയിലും ഉറപ്പാക്കേണ്ടതാണെന്ന അഭിപ്രായവും സമൂഹമാധ്യമങ്ങളിൽ ഉയർന്നിട്ടുണ്ട്.
Comments