മലയാള സിനിമയെ വാനോളം പുകഴ്ത്തി നടന്‍ നാനി. പാരഡൈസ് എന്ന ചിത്രത്തിന്റെ പ്രെമോഷന്റെ ഭാഗമായി കേരളത്തിലെത്തിയപ്പോഴാണ് പ്രസ്മീറ്റില്‍ വെച്ച് താരം മലയാള സിനിമയോടുളള ഇഷ്ടവും ബഹുമാനവും വ്യക്തമാക്കിയത്. ചുരുങ്ങിയ സമയത്തിനുള്ളില്‍ വളരെ കുറഞ്ഞ റിസോഴ്സ് ഉപയോഗിച്ച് മലയാള സിനിമ ഏറ്റവും മികച്ച സിനിമകളാണ് നിര്‍മിക്കുന്നത് എന്നും അത് മറ്റെല്ലാ സിനിമാ ഇന്‍ഡസ്ട്രികളും കണ്ടുപഠിക്കേണ്ടതാണെന്നും നാനി പറഞ്ഞു.
'മലയാള സിനിമ എനിക്ക് എത്രത്തോളം ഇഷ്ടമാണെന്ന് ഞാൻ നേരത്തെയും പല തവണ പറഞ്ഞിട്ടുണ്ട്. മലയാള സിനിമയിൽ നിന്ന് ഒരുപാട് കാര്യങ്ങൾ പഠിക്കാനുണ്ട്. അതിലൊന്ന് സിനിമ നിർമിക്കാൻ അവർ എടുക്കുന്ന സമയാണ്. കുറഞ്ഞ സമയം കൊണ്ടാണ് ഇവിടെ സിനിമകൾ പൂർത്തിയാകുന്നത്. മറ്റൊന്ന് കുറഞ്ഞ ചെലവാണ്. എന്നിട്ടും അവർ ഏറ്റവും മികച്ച സിനിമകൾ ഒരുക്കുന്നു.
കുറഞ്ഞ സമയവും റിസോഴ്‌സും ഉപയോഗിച്ച് ഗംഭീരമായ പ്രമേയങ്ങളും പെർഫോമൻസുമുള്ള മികച്ച ക്വാളിറ്റിയുള്ള സിനിമകളാണ് മലയാളത്തിൽ നിന്നും വരുന്നത്. അക്കാര്യം എല്ലാ ഇൻഡസ്ട്രികളും തീർച്ചയായും കണ്ടുപഠിക്കേണ്ടതാണ്,' നാനി പറഞ്ഞു.
അതേസമയം, നാനി നായകനായി എത്തുന്ന ബിഗ് ബജറ്റ് ചിത്രമായ 'ദ പാരഡൈസ്' വമ്പൻ റിലീസായി കേരളത്തിലെത്തിക്കുന്നത് ദുൽഖർ സൽമാന്റെ വേഫെറർ ഫിലിംസാണ്. ശ്രീലക്ഷ്മി വെങ്കടേശ്വര സിനിമാസിന്റെ ബാനറിൽ ഒരുങ്ങുന്ന ചിത്രം 2026 സെപ്റ്റംബർ 24ന് ആഗോള റിലീസായി തിയേറ്ററുകളിലെത്തും.
Comments