തിരുവനന്തപുരം: തന്ത വൈബ് പിടിക്കാന്‍ ഉദ്ദേശിക്കുന്നില്ലെന്നും തനിക്ക് പ്രായം 37 വയസ്സേയുള്ളെന്നും മന്ത്രിമാര്‍ക്ക് സ്വകാര്യ നിമിഷങ്ങള്‍ പാടില്ലേയെന്നും കായികമന്ത്രി ഒ.ജെ. ജനീഷ്. സര്‍ക്കാരിനെ ബുദ്ധിമുട്ടിക്കാതെയും ചുമതലകളില്‍ വീഴ്ച വരുത്താതെയും പൗരന്റെ നികുതിപ്പണം നഷ്ടപ്പെടാതെയും ഇടയ്ക്കൊക്കെ യാത്ര പോയെന്നിരിക്കുമെന്നും യാത്രകള്‍ വിവാദമാക്കേണ്ട കാര്യമില്ലെന്നും പറഞ്ഞു.
ഒ.ജെ. ജനീഷ് അടക്കമുള്ള മന്ത്രിമാരുടെ വിദേശയാത്ര വിവാദമായതിന് പിന്നാലെയായിരുന്നു പ്രതികരണം. 'മന്ത്രിമാര്‍ക്ക് ആര്‍ക്കും സ്വകാര്യ നിമിഷങ്ങള്‍ പാടില്ലേ?. ഇത് ഏത് കാലമാണ്. തുടര്‍ച്ചയായ ജോലികള്‍ക്കിടയില്‍ ആരാണെങ്കിലും ചെറിയ ബ്രേക്ക് എടുക്കണം. എന്റെ വയസ് 37 ആണ്. തന്ത വൈബ് പിടിക്കാന്‍ ഉദ്ദേശിക്കുന്നില്ല. ചെറിയ യാത്രയൊക്കെ നടത്തും.', എന്നായിരുന്നു മന്ത്രി പറഞ്ഞത്.
ഒ ജെ ജനീഷിന് പുറമേ ആഭ്യന്തരമന്ത്രി രമേശ് ചെന്നിത്തല, തദ്ദേശ വകുപ്പ് മന്ത്രി കെ എം ഷാജി എന്നിവരായിരുന്നു വിദേശ സന്ദര്‍ശനം നടത്തിയത്. ജനീഷ് ഒമാനും രമേശ് ചെന്നിത്തല ഷിക്കാഗോയും കെ എം ഷാജി ബള്‍ഗേറിയയുമായിരുന്നു സന്ദര്‍ശിച്ചത്. ഇവര്‍ക്ക് പുറമേ സ്പീക്കര്‍ തിരുവഞ്ചൂര്‍ രാധാകൃഷ്ണനും മന്ത്രി പി സി വിഷ്ണുനാഥും വിദേശ യാത്ര നടത്തിയിരുന്നു. ഔദ്യോഗിക യാത്രകള്‍ എന്നാണ് ഇക്കാര്യത്തില്‍ പുറത്തുവന്ന വിശദീകരണം.
Comments