വാഷിങ്ടൺ ഡിസി: അമേരിക്കയിൽ വൈറ്റ് ഹൗസും പ്രമുഖ മാധ്യമസ്ഥാപനങ്ങളും തമ്മിലുള്ള തർക്കം കൂടുതൽ രൂക്ഷമാകുന്നു. വൈറ്റ് ഹൗസ് ടെലിവിഷൻ പ്രസ് പൂളിന്റെ ചുമതലയിൽ നിന്ന് CNN-നെ ഒഴിവാക്കി. CNN, എംഎസ് നൗ, പൊളിറ്റിക്കോ എന്നിവയ്ക്ക് വിലക്ക് ഏർപ്പെടുത്തുമെന്ന് പ്രസിഡന്റ് ഡോണൾഡ് ട്രംപ് പ്രഖ്യാപിച്ചതിന് പിന്നാലെയാണ് നടപടി.
പതിവ് റൊട്ടേഷൻ പ്രകാരം തിങ്കളാഴ്ച ടിവി പൂളിന്റെ ചുമതല CNN-നായിരുന്നു. യുഎൻ ജനറൽ അസംബ്ലിക്കായി ട്രംപ് ന്യൂയോർക്കിലേക്ക് പോകുമ്പോൾ പ്രസിഡന്റിനൊപ്പം യാത്ര ചെയ്ത് ദൃശ്യങ്ങൾ മറ്റ് മാധ്യമങ്ങൾക്കും ലഭ്യമാക്കേണ്ടതും CNN ആയിരുന്നു. എന്നാൽ ഞായറാഴ്ച രാത്രി പുറത്തിറക്കിയ വൈറ്റ് ഹൗസിന്റെ അടുത്ത ദിവസത്തെ മാധ്യമ ഷെഡ്യൂളിൽ പ്രധാന ടിവി പൂൾ നെറ്റ്‌വർക്കായി ആരെയും ഉൾപ്പെടുത്തിയില്ല.
ദീർഘകാലമായി ABC, CBS, CNN, NBC, ഫോക്‌സ് ന്യൂസ് എന്നീ അഞ്ച് പ്രമുഖ നെറ്റ്‌വർക്കുകളാണ് മാറിമാറി വൈറ്റ് ഹൗസ് ടിവി പൂളിന്റെ ചുമതല വഹിക്കുന്നത്. പ്രസിഡന്റിന്റെ പരിപാടികൾ ചിത്രീകരിച്ച് തത്സമയ ദൃശ്യങ്ങൾ മറ്റ് മാധ്യമങ്ങൾക്കും നൽകുകയാണ് പൂളിന്റെ പ്രധാന ചുമതല.
CNN-നെ ഒഴിവാക്കിയതിൽ മറ്റ് നാല് നെറ്റ്‌വർക്കുകൾ സ്വീകരിക്കുന്ന നിലപാട് വ്യക്തമല്ല. അതേസമയം, നിയന്ത്രണത്തെ ചോദ്യം ചെയ്ത് ഫസ്റ്റ് അമെൻഡ്‌മെന്റ് അടിസ്ഥാനമാക്കിയുള്ള നിയമനടപടിക്ക് ബന്ധപ്പെട്ട മാധ്യമസ്ഥാപനങ്ങൾ തയ്യാറെടുക്കുന്നതായാണ് റിപ്പോർട്ട്. ഇതോടെ വൈറ്റ് ഹൗസും മാധ്യമങ്ങളും തമ്മിലുള്ള തർക്കം പുതിയ നിയമപോരാട്ടത്തിലേക്ക് നീങ്ങുകയാണ്.
Comments