വഴിയിൽ തടഞ്ഞുനിർത്തി ശല്യം ചെയ്തു, ചോദ്യം ചെയ്തപ്പോൾ ആക്രമിച്ചു; നടുറോഡില്‍ പെൺകുട്ടികൾക്ക് നേരെ അതിക്രമം, വീഡിയോ വൈറൽ

ഗ്വാളിയോർ: മധ്യപ്രദേശിലെ ഭിതർവാറിൽ കോച്ചിങ് ക്ലാസ് കഴിഞ്ഞ് വീട്ടിലേക്ക് മടങ്ങുകയായിരുന്ന രണ്ട് പെൺകുട്ടികളെ ബൈക്കിലെത്തിയ രണ്ട് യുവാക്കൾ ശല്യം ചെയ്യുകയും ആക്രമിക്കുകയും ചെയ്തതായി പരാതി. കമല സ്കൂൾ റോഡിൽ പകൽസമയത്താണ് സംഭവമുണ്ടായത്. സംഭവത്തിന്റെ സിസിടിവി ദൃശ്യങ്ങൾ പുറത്തുവന്നതോടെ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.

തിങ്കളാഴ്ച ഉച്ചയോടെയാണ് പെൺകുട്ടികൾക്ക് നേരെ അതിക്രമമുണ്ടായതെന്നാണ് റിപ്പോർട്ട്. സ്പ്ലെൻഡർ ബൈക്കിലെത്തിയ രണ്ട് പേർ പെൺകുട്ടികളെ വഴിയിൽ തടഞ്ഞുനിർത്തി ശല്യം ചെയ്തെന്നാണ് ആരോപണം. ഇതിനെ പെൺകുട്ടികൾ ചോദ്യം ചെയ്തതോടെ യുവാക്കൾ അവരെ ആക്രമിച്ചതായും റിപ്പോർട്ടിൽ പറയുന്നു. പെൺകുട്ടികൾ മുന്നോട്ട് പോയപ്പോഴും ബൈക്കിലെത്തിയവർ പിന്തുടർന്ന് വീണ്ടും അതിക്രമം നടത്തിയെന്നാണ് വിവരം.

റോഡിൽ നടന്ന സംഭവത്തിന്റെ ദൃശ്യങ്ങൾ സമീപത്തെ സിസിടിവി ക്യാമറയിലാണ് പതിഞ്ഞത്. പിന്നീട് ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതോടെയാണ് സംഭവം പുറത്തറിയുന്നത്. വീഡിയോ പരിശോധിച്ച് യുവാക്കളെ തിരിച്ചറിയാനും കണ്ടെത്താനുമുള്ള ശ്രമത്തിലാണ് ഭിതർവാർ പോലീസ്. സംഭവത്തിൽ ഇതുവരെ പെൺകുട്ടികളോ അവരുടെ കുടുംബാംഗങ്ങളോ ഔദ്യോഗികമായി പരാതി നൽകിയിട്ടില്ലെന്നും ​പോലീസ് വ്യക്തമാക്കി.

സിസിടിവി ദൃശ്യങ്ങൾ ലഭിച്ചതായി എസ്ഡിഒപി ഗഗൻ ഹൻമത് അറിയിച്ചു. പെൺകുട്ടികളെ കണ്ടെത്തി അവരുടെ മൊഴി രേഖപ്പെടുത്താനും പോലീസ് ശ്രമിക്കുന്നുണ്ട്. സംഭവത്തിൽ നടപടി ആവശ്യപ്പെട്ട് ഭിതർവാർ നഗരസഭാ വൈസ് പ്രസിഡന്റ് മന്നു യാദവും രംഗത്തെത്തി. പെൺകുട്ടികൾക്കെതിരായ ഇത്തരം സംഭവങ്ങൾ ആശങ്കാജനകമാണെന്നും പ്രതികൾക്കെതിരെ നടപടി വേണമെന്നും അദ്ദേഹം ആവശ്യപ്പെട്ടു.