മകള്‍ പാപ്പു എന്ന അവന്തികയ്ക്ക് ജന്മദിനാശംസകള്‍ നേര്‍ന്ന് ഗായിക അമൃത സുരേഷ്. ' എന്റെ പൊന്നുമണിക്ക് ഒരായിരം പിറന്നാളാശംസകള്‍' എന്നാണ് മകള്‍ക്കൊപ്പമുളള ചിത്രം പങ്കുവെച്ച് അമൃത കുറിച്ചത്.
അമൃതയുടെ സഹോദരി അഭിരാമി സുരേഷും പാപ്പുവിന് ആശംസകള്‍ നേര്‍ന്ന് എത്തി. ഇന്‍സ്റ്റഗ്രാമില്‍ പങ്കുവെച്ച കുറിപ്പിലൂടെയാണ് അഭിരാമി ആശംസകള്‍ അറിയിച്ചത്.
'' ഞങ്ങളുടെ പ്രിയപ്പെട്ട പപ്പുവിന് ജന്മദിനാശംസകള്‍. എനിക്ക് ജനിച്ചതല്ലെങ്കിലും, എന്തുകൊണ്ടോ എപ്പോഴും എന്റെ ആദ്യത്തെ കുട്ടി നീയാണ്. അമ്മു എന്നെ അങ്ങനെ വിളിച്ചപ്പോള്‍ അതിന്റെ അര്‍ത്ഥം എന്താണെന്ന് എനിക്ക് ശരിക്കും മനസ്സിലായിരുന്നില്ല, നീ എന്റെ ജീവിതത്തിലേക്ക് വരുന്നതുവരെ. ഇപ്പോള്‍ എനിക്കറിയാം.
വളരെ ചെറിയ പ്രായത്തില്‍ തന്നെ നീ കൊടുങ്കാറ്റുകളെ നേരിട്ടിട്ടുണ്ട്, എന്നാല്‍ ഇന്ന് നീ തന്നെ ഒരു കൊടുങ്കാറ്റായി മാറുന്നത് കാണാന്‍ എന്ത് ഭംഗിയാണ്. ശക്തയായി, ചാരുതയോടെ, ദയയുള്ളവളായി, ഓരോ ദിവസവും നീ നിന്റെ ഏറ്റവും മനോഹരമായ രൂപത്തിലേക്ക് വളരുകയാണ്. ??
നിന്നെ വേദനിപ്പിക്കുന്ന എല്ലാറ്റില്‍ നിന്നും ദൈവം നിന്നെ കാത്തുരക്ഷിക്കട്ടെ, ഈ ലോകത്തിലെ എല്ലാ നന്മകളും നല്‍കി അനുഗ്രഹിക്കട്ടെ. ജീവിതത്തിലെ പാഠങ്ങള്‍ നിന്നെ നിന്റെ അമ്മയെയും അമ്മൂമ്മയെയും പോലെ ഞാന്‍ കണ്ടിട്ടുള്ളതില്‍ വച്ച് ഏറ്റവും കരുത്തുള്ള സ്ത്രീകളില്‍ ഒരാളായി മാറ്റുമെന്ന് എനിക്കറിയാം.
നീ ഇനി ഒരു കുഞ്ഞല്ലായിരിക്കാം, പക്ഷേ നീ എപ്പോഴും എന്റെ കുഞ്ഞായിരിക്കും. അവസാനത്തെ ചിത്രത്തിലേക്ക് സൈ്വപ്പ് ചെയ്യുമ്പോള്‍ ഞാന്‍ ഉദ്ദേശിച്ചത് എന്താണെന്ന് നിനക്ക് കൃത്യമായി മനസ്സിലാകും. ഐ ല വ് യൂ അനന്തരവളേ. അതോ നിന്നെ എന്റെ മകള്‍ എന്ന് വിളിക്കണോ?'', അവന്തികയ്‌ക്കൊപ്പമുളള ചിത്രങ്ങള്‍ പങ്കുവെച്ച് അഭിരാമി കുറിച്ചു.
നടന്‍ ബാലയുടേയും അമൃതയുടേയും മകളാണ് അവന്തിക. 2010-ല്‍ വിവാഹിതരായ അമൃതയും ബാലയും ഒമ്പത് വര്‍ഷങ്ങള്‍ക്ക് ശേഷം വിവാഹമോചിതരായി. അമൃതയുടെ കൂടെയാണ് മകള്‍ ഇപ്പോള്‍ താമസിക്കുന്നത്.
Comments