കളമശേരി: വിമാനമാര്‍ഗം കൂട്ടത്തോടെ വന്ന് കേരളത്തിലെ വിവിധ ജില്ലകള്‍ കേന്ദ്രീകരിച്ച് മോഷണം നടത്തിവന്നിരുന്ന 11 അംഗ അന്തര്‍സംസ്ഥാന മോഷണ സംഘം പിടിയില്‍. കൊച്ചി സിറ്റി പോലീസിന്റെ ഏകോപനത്തില്‍ തൃശൂര്‍, കളമശേരി, കണ്ണൂര്‍ പോലീസുകളുടെ സംയുക്ത നീക്കത്തിലാണ് പ്രതികള്‍ പിടിയിലായത്.
ഉത്തര്‍പ്രദേശ് സ്വദേശികളായ സുഹൈല്‍, ഫര്‍മന്‍ അന്‍സാരി, റിഹാന്‍ ഖാന്‍, റിഹാന്‍, സൈഫുള്ള, ഷക്കിബ്, മൊഹ്‌സില്‍, സജിദ് അന്‍സാരി, സഹില്‍, മോനിഷ്, സമീര്‍ എന്നിവരെയാണ് പിടികൂടിയത്. തൃശൂരില്‍ നടന്ന മോഷണ ശ്രമത്തിനിടെ സംഘത്തിലെ ആദ്യ പ്രതിയെ തൃശൂര്‍ പോലീസ് പിടികൂടുകയായിരുന്നു. ഇയാളെ ചോദ്യംചെയ്തപ്പോള്‍ കൂട്ടാളികള്‍ കൊച്ചിയിലുണ്ടെന്ന് വ്യക്തമായി. തുടര്‍ന്ന് കളമശേരിയിലെ ഒരു ലോഡ്ജില്‍ കളമശേരി പോലീസും തൃശൂര്‍ പോലീസും ചേര്‍ന്ന് നടത്തിയ മിന്നല്‍ റെയ്ഡില്‍ 5 പ്രതികളെ പിടികൂടി.
ഇവരില്‍നിന്നും ലഭിച്ച വിവരത്തിന്റെ അടിസ്ഥാനത്തില്‍ കണ്ണൂര്‍ കേന്ദ്രീകരിച്ച് പ്രവര്‍ത്തിച്ചിരുന്ന അഞ്ചുപേരെ കണ്ണൂര്‍ പോലീസിന്റെ സഹായത്തോടെ പിടികൂടി. പ്രതികളില്‍നിന്നും മോഷണത്തിന് ഉപയോഗിക്കുന്ന കേബിള്‍ കട്ടറുകള്‍, വിവിധ താക്കോലുകള്‍, മൊബൈല്‍ ഫോണുകള്‍, വാച്ചുകള്‍, പണം, തിരിച്ചറിയല്‍ രേഖകള്‍ എന്നിവ പോലീസ് കണ്ടെടുത്തിട്ടുണ്ട്. കൂടാതെ ഇവര്‍ മോഷണ ആവശ്യങ്ങള്‍ക്കായി ഉപയോഗിച്ചിരുന്ന 4 ഇരുചക്രവാഹനങ്ങളും പോലീസ് കസ്റ്റഡിയിലെടുത്തു.
സംശയം തോന്നാതിരിക്കാന്‍ പണിസ്ഥലങ്ങളിലെ തൊഴിലാളികള്‍ ധരിക്കുന്ന തരത്തിലുള്ള വസ്ത്രങ്ങള്‍ ധരിച്ചാണ് ഇവര്‍ കുറ്റകൃത്യങ്ങളില്‍ ഏര്‍പ്പെട്ടിരുന്നത്. ഇത്തരത്തിലുള്ള വസ്ത്രങ്ങളും ഇവരുടെ പക്കല്‍നിന്നും കണ്ടെടുത്തു. വിമാനത്തില്‍ എത്തുന്ന ഇവര്‍ തങ്ങളുടെ ഇരുചക്ര വാഹനങ്ങള്‍ ട്രെയിന്‍ മാര്‍ഗം കേരളത്തിലെത്തിക്കുകയായിരുന്നു പതിവെന്നും പോലീസ് പറഞ്ഞു.
പ്രതികളില്‍ ചിലര്‍ക്കെതിരേ സമാനമായ കുറ്റകൃത്യങ്ങള്‍ക്ക് തൃക്കാക്കര പോലീസ് സ്‌റ്റേഷനില്‍ കേസുകള്‍ നിലവിലുണ്ട്. കൊച്ചി സിറ്റി കമ്മീഷണര്‍ കാളിരാജ് മഹേഷിന്റെ ഏകോപനത്തില്‍ തൃശൂര്‍ ഈസ്റ്റ് പോലീസ് സ്‌റ്റേഷന്‍ എസ്.എച്ച്. ഒ: നന്ദകുമാര്‍, ജി എസ് സി പി ഒ സൂരജ്, സി പി ഒ മാരായ മനീഷ്, സനു, കൊച്ചി സിറ്റി സ്‌ക്വാഡ് അംഗം മാഹിന്‍ അബു, കളമശേരി പോലീസ് സ്‌റ്റേഷന്‍ ഷാഡോ ടീമും, കണ്ണൂര്‍ സിറ്റി ക്രൈം ടീമും സംയുക്തമായി നടത്തിയ നീക്കമാണ് പ്രതികളെ വലയിലാക്കിയത്.
Comments